Cuideiru, ¿un pueblu viquingu n’Asturies?

Por Denis Soria

La imaxe d’esta villa ye icónica. Cuideiru ye una xuntanza de color y vida encaramada sobre un anfiteatru arramáu que tien al mar por escenariu. Por elli los sos vecinos reciben el nomatu de pixuatos, en referencia al pexe y polo tanto al oficiu de pescador, mayoritariu hasta hai unes décades. Nun ye raro, y ye que los vecinos d’As Figueiras (Castripol) son tamién conocíos como pixotos.

Cuidadín, non tolos que viven en Cuideiru ostenten esti xentiliciu. Los que se dedicaben a otros oficios (al comerciu o a la llabranza fundamentalmente) yeren conocíos como caízos, por ocupar el barriu de La Cai. De fechu, tradicionalmente estes dos comunidaes llevábense a matar, tando inclusive escluyíos estos últimos de participar en delles fiestes (y yá nun digamos los vaqueiros). Porque yá se sabe, qu’en pueblu pequeñu, infiernu grande

La villa de Cuideiru (Foto: Mampiris).
La Ribera (GETTY IMAGES)

Pero muncho se dixo y se diz sobre los sos vecinos, especialmente alredor del so orixe nos viquingos qu’afararon les costes europees hai un mileniu y -supuestamente- asentaos equí o acerca de la so fala, distinta al restu y estrada de pallabres de raigaños nórdicos. Una lienda que cobró fuercia nos caberos años seducida pola épica de les noveles y les series de televisión. Sicasí, ¿qué hai de verdá en too esto? ¿Existe un dialectu pixuatu? Y… ¿Son realmente los sos vecinos descendientes de los normandos?

vikings-season-3-spoilers
Reproducción de los drakkars o långskip lordomanos para la famosa serie Vikings.

Les cróniques medievales asturllioneses fálenmos ciertamente d’hasta cuatro foles d’estes incursiones de turistes escandinavos pel Reinu de los Astures ente los sieglos IX y XII. N’efectu, nel branu del añu 844 foi avistada una flota viquinga na costa de Xixón al aldu de Galicia, onde s’entregaron a la rapiña. El rei Ramiro I derrotólos a los pies de la Torre d’Hércules, quemándo-yos alredor de 70 naves, anque los supervivientes continuaríen les sos correríes pel Al-Ándalus saquiando Lisboa y Sevilla.1 Inclusive Uvieo foi asaltada en tiempos d’Alfonso III, motivando la construcción de La Torre Vieya de Samiguel, anexa a la Catedral. Magar que n’ocasiones los propios monarques recurrieron a los sos servicios, bien pa les sos lluches intestines o bien pa la guerra escontra los musulmanes, como nel casu d’Alfonso II escontra Hisham I nel 795.2

Por embargu, a pesar de cuntar con indicios d’asentamientos temporales en Galicia, el que fora ún de los territorios peninsulares más castigaos polos sos ataques, nun poseyemos prueba documental nin arqueolóxica nenguna qu’acredite l’establecimientu improbable de grupos de normandos na nuesa tierra.

Los pixuatos inda siguen fieles a l’actividá pesquera.

Sí acasu de celtes britones, refuxaos cristianos que fuxíen de la invasión anglosaxona de les Isles Britániques nel sieglu VI pa llugares como Armórica (la Bretaña francesa actual), Galicia y Asturies, onde fundaríen la Diócesis de Britonia. Inda güei conservamos topónimos qu’evidencien la so presencia, como El Bretón (La Madalena, Avilés), Bretones (Belonciu, Piloña) o La Playa los Bretones (Vidiago, Llanes).

 

Pa con too, resulta mui aventurao afirmar que foren estos britones o viquingos los fundadores de Cuideiru. ¿Y qué hai de la so herencia nel dialectu local? Quiciás podia desilusionar a más d’ún, y ye que la fala pixuata nun ye nenguna particularidá, sinón que resulta idéntica al asturianu faláu en Pravia o en Grau. Ello ye, que nun existe un dialectu pixuatu.

 

Más allá de la xíriga rellacionada cola mar y la pesca, la fala de los pixuatos y de los sos vecinos caracterízase pol fuerte zarramientu vocálicu (fonti/fontis, gatu/gatus), l’apertura de la tónica na diptongación de /ǒ/  y /ĕ/ llatinos (pueblu-puablu, bien-bian) o l’emplegu de los diptongos /éi, ou/ (veiga, mariñeiru, outru…). Na mesma web del Conceyu pueden consultase delles pallabres comunes, dalgunes realmente interesantes.

Asturllionés occ. Tipo A Asturllionés central Castellano std
Bulichi Boliche Boliche (red, aparejo)
Castiallu Castiellu Castillo
Chama Chama Palo que se coloca en el carel de una embarcación donde se pone el estrobo para fijar el remo].
Chicoti Chicote Chicote (extremo, remate o punta de cuerda, o pedazo pequeño separado de ella.)
Fuau Fueu Fuego
Gaxarti Gaxarte Gancho, garfio
Guai Güei Hoy
Guavada Güevada Hueva
Guayu Güeyu Ojo
Güichi Güinche Guinche (grúa o torno para subir cajas o material)
Llubricante Brugre, llocántanu Bogavante
Lleichi Lleche Leche
Quiquirimandi Cascoxu Caracol
Zurria Orbayu, orpín, muga, zurria Llovizna

L’Amuravela

Pero si realmente queréis oyer una bona muestra del asturllionés del baxu Nalón podéis averavos el día de San Pedru (29 de xunu) a la multitudinaria fiesta de L’Amuravela, declarada Bien d’Interés Turísticu Nacional en 1979, un sermón laicu cargáu de rima y soca que resume tolo asocedío nel añu.

Dende hai más de 30 años l’encargáu de recitalu ye l’escritor Cesáreo Marqués, anque foron célebres otros narradores como Xuacu Gaitanu o Xuan de la Cuca. Paez ser que por mor del escozor de les pallabres d’esti últimu’l párracu decidió prohibir la fiesta per 1900, recuperándose de nuevo en 1946.

Dichos versos escomiencen asina:

Nel nomi de Xuasús
ya la Virxi Soberana,
vou ichar l’Amuravela
comu San Pedru asperaba.

A lo que, tres recitar el sermón, conclúi con un saludu al santu nel códigu náuticu:

Mientras Cuideiru viva
ya duri la Fonti’l Cantu,
vei San Pedru a la Ribera
con toudus lus demás Santus.

¡Amura vela!
¡Isa vela!
¡Fuau a babor!
¡Fuau a estribor!

¡Viva Pedru!

 

¿Y d’ónde vien esta tradición? Nun se sabe con certeza, pero se diz que l’orixe ta venceyáu al regresu de los marineros que participaron na conquista de La Florida enrolaos na nave «El Espíritu Santo», hai más de 400 años.

Zumba la pelleya…

 

Referencies:

  1. Carlos Sánchez, J., 2012, “Los ataques vikingos y su influencia en la Galicia de los siglos IX-XI”. Anuario Brigantino: 5. URL: http://anuariobrigantino.betanzos.net/Ab2010PDF/2010%20057_086%20VIKINGOS%20EN%20GALICIA.pdf
  2. Chao, R., 2015, “Los ataques vikingos al reino asturleonés”. Corazón de León. URL: http://corazonleon.blogspot.com.es/2015/09/los-ataques-vikingos-al-reino.html

Los enigmáticos asturcones de manta castaña

Sobre la variedá de caballos autóctonos más rara y amenazada d’Asturies

Por Denis Soria

Corría l’añu 218 a.C. y un engalláu Aníbal Barca estrapallaba’l so exércitu de cien mil homes escontra les muralles de los Alpes a llombos d’asturcones, unos caballos estraños y pequeñucos que mandara trayer dende les tierres llonxanes del norte d’Hispania pola gran sonadía que tenía’l so trote de desafiar al vértigu.

Yeren los caballos del pueblu astur, los sos compañeros nel trabayu, pero tamién na guerra, especialmente mientres aquella conquista romana qu’acabaría convirtiéndose nel peor dolor de mueles del emperador Augustu a lo llargo d’una década entera. Ello ye que la so silueta sagrada va apaecer representada en delles llábanes funeraries de guerreros, llevando l’alma de los sos dueños al galopu, n’aldu a la eternidá.

Los romanos continuarán almirándolos y, de fechu, van gociar de gran popularidá na mesma capital del Imperiu. Sábese que Nerón llegó tener una burrina asturcona a la que curiaba como la so neñina guapa. Inclusive alcontramos rellatos de caballos astures ganadores nes carreres perfamoses d’Alepo y Cartaxena. Pero los tiempos foron cambiando, y los asturcones “pasarán de moda” pola introducción de caballos de porte mayor, relegándolos al usu domésticu a lo llargo de tola Edá Media y Moderna. Sicasí, de magar el sieglu XX la hibridación y l’abandonu de la so cría en favor d’otres races más rentables van emburriar al poni astur a la vera de la estinción. Talo ye asina que nos años 80 malpenes quedaba un garrapiellu d’ellos aferráu a les fanes del Puertu Sueve.

María del Pucho con una burra asturcona en Máñules, Tinéu (Fritz Krüger, 1927).

LA RECUPERACIÓN

El llabor de los futuros miembros de la ACPRA (Asociación de Criadores de Ponis de Raza Asturcón) foi determinante pa salvar esta especie in extremis. Pero había un problema: la recuperación basóse na escoyeta d’una ventena d’exemplares moros (de manta prieta), popularizando la imaxe del asturcón como un animal escuru dafechu, sacante pola estrella blanca de la so frente. Delantre d’esto, los espertos Miguel Ángel García Dory y Antón Álvarez Sevilla llamarán l’atención pa la existencia d’una población d’asturcones de manta castaña específica de los montes del occidente asturianu, que llograrán incluyir nel llibru xenealóxicu de la especie dende 2005. Anguaño queda n’Asturies una población creciente de 2348 asturcones (censu de 2011), de los qu’alredor de 580 son de manta castaña.

(Foto: Braniego)
Asturcón al galopu (Foto: Braniego)

¿CUÁLU YE’L SO ORIXE?

Tradicionalmente, los caballos atlánticos del norte de la península (Garranu, Gallegu, Asturcón, Losino, Pottoka…) foron axuntaos baxo la etiqueta de “ponis celtes”, puesto que -hasta va poco- pensábase que foren trayíos por pueblos indoeuropeos na Edá del Fierro. Nesti sen, investigadores de la Universidad de Llión llegaron emparentar l’asturcón col Exmoor de Cornualles.

En cualesquier casu, nun paez que los burros asturcones seyan los mesmos de les pintures de les cueves del Paleolíticu (Candamu, El Pozu’l Ramu…), ya que néstos apréciase un llombu acebráu, una característica propia de los caballos primitivos. Al empar, un estudiu de caracterización xenética de les races equines ibériques dirixíu pol SERIDA en 2005 resolvió que, si bien existe una diferenciación ente les races atlántiques ibériques y les del restu de la península, el llinaxe de toes elles ye común y probablemente d’orixe africanu. Quier dicir, que los asturcones nun arribaron colos celtes na Edá del Fierro, sinón mucho primero, na Edá del Cobre o na del Bronce, quiciás. Amás, nel mesmu quedó claro que la so rellación col Exmoor nun yera tan grande, poniendo en dulda el tan aceptáu orixe “celta” de los ponis del norte peninsular.

Ente’l gorbizu (Foto: Braniego)
Dos greños col pelo d’iviernu (Foto: Braniego)

¿ÓNDE VELOS?

Hasta los años 70 inda quedaben bonos corros d’asturcones de manta castaña en Tinéu, pero les repoblaciones de los montes comunales con pinos per parte del ICONA condenarán a muchos propietarios a la emigración, daqué fatal pa la especie.

Güei, el mayor corru d’asturcones de manta castaña podemos atopalu en Busecu, en La Montaña de Ḷḷuarca: ye’l corru de Braniego, con unos 60 exemplares. Los sos propietarios, David Martín y Ana García, diéronse a conocer, ya non solo por ser unos pioneros na recuperación d’esta manta nel Occidente, sinón tamién por ser de les poques pareyes moces qu’apostaron por formar una familia nun territoriu que les alministraciones enfotáronse n’abandonar a la so suerte. David, que complementa la cría de caballos col trabayu de madreñeiru, viende asturcones tanto a hípicos como a particulares asturianos y españoles llueu d’un manexu non siempre fácil polos ataques continuos de los llobos. Tovía inclusive fixéronse con un pequeñu güecu nel mercáu d’Alemaña, llugar de destín de dalgún de los sos greños.

Por fin, paez que’l futuru pinta daqué meyor para los antigos caballos pésicos.

“Distínguese esti burru astur pola blanca estrella qu’adorna la so frente, marca propia de los del so país. Blanques son tamién les sos pates veloces, que destaquen sobre el fondu prietu de la so mante. Anque d’estatura mediana y estampa poco vistosa, son enforma sobrios, veloces y resistentes”. Silo Itálicu.

 

Asturcones en La Montaña valdesana (Foto: Braniego)
Asturcones al galopu (Foto: Braniego)
Potros d’asturcón col so pelo característico (Foto: Braniego)
Dos greños o garañones (machos ensin capar) solucionando les sos diferencies (Foto: Braniego)

25 de mayu, ¿Día de la Bandera Asturiana?

Sobre’l significáu y la reinterpretación d’una fecha cargada d’arguyu pa los asturianos

Por Denis Soria

N’artículos anteriores yá vos despliquemos cuálu yera l’orixe de la bandera asturiana. Güei centrarémonos nos fechos qu’arrodiaron la so elección como símbolu de los asturianos y que munchos consideraron qu’habríen ser conmemoraos, si non como’l Día d’Asturies, a lo menos sí como’l Día de la Bandera Asturiana.

El Parllamentu asturianu actual, la Xunta Xeneral, aguapáu por sales onde les talles de madera de carbayu del vieyu hemiciclu acompañen una fina colección de pintures costumistes y cristaleres d’estilu francés, írguese güei como un palaciu neoclásicu centenariu nel centru de la capital d’Asturies. Pero lo cierto ye que non siempre tevo equí.

La sede de la Xunta Xeneral allugábase históricamente na catedral, más concretamente na llamada sala capitular. Tal vez l’espaciu presidíu por una impresionante cúpula gótica nun fora enforma ampliu p’acoyer una asamblea, pero ye ún de los llugares más vieyos del templu, llevantáu a últimos del sieglu XIII.

¿Qué yera realmente la Xunta Xeneral? Podríemos dicir que consistía nuna institución oligárquica «más o menos» representativa de los conceyos, mediadora ente los intereses d’Asturies y l’autoridá real, pero’l so valor reside en que foi la única figura d’autogobiernu que caltuvimos los asturianos dempués la conquista castellana del sieglu XIV, que mos arrincaría del reinu de Llión como un Principáu sometíu a la voluntá del rei de Castiella.

En mayu de 1808 esta Xunta celebraba les sos sesiones equí, cuando’l día 9 d’esi mes escomiencen a aportar a Asturies les noticies de la represión del 2 de mayu escontra’l pueblu de Madrid per parte de les tropes franceses. Los asturianos, encabezaos por dos muyeres -Xuaca Bobela y Marica Andayón- amotínense, y un xenteríu escomanáu empobinóse contra la sala capitular. Baxo presión popular, la Xunta Xeneral promulgó la creación d’un exércitu defensivu asturianu y declaró la guerra a Napoleón. Pasaos unos díes, el 13 de mayu l’Audiencia obligó a retractase a los diputados de la Xunta por mieu a la reacción de los franceses. Tres d’ello, asociedieronse unos díes de calma tensa, hasta’l 25 de mayu de 1808.

Na nueche del 24 una minoría de diputaos axunten a miles de campesinos, que tomen la fábrica d’armes d’Uviéu y asalten la capital. Dempués de tomar la Real Audiencia obliguen al so presidente a convocar una sesión estraordinaria de la Xunta Xeneral na que participen 15 miembros, ente los que destacaben Álvaro Flórez Estrada, Pedro Álvarez Celleruelo, Ramón de Llano Ponte, Manuel María Acevedo, el Conde de Torenu o García Busto.

Álvaro Flórez Estrada

Trés díes más tarde, el 28 de mayu, proclamaráse como Xunta Suprema, qu’unviará embaxadores a Gran Bretaña solicitando encontu militar y diseñaráse la bandera asturiana actual baxo’l lema «Asturias xamás vencida» a propuesta de Xovellanos. Tiempu dempués alcordaríase la formación d’una Xunta Suprema Gubernativa d’España y Indies (más conocida como «Xunta Central»), conformada por dos diputaos de cada provincia. Nesi sen, por Asturies van ser escoyíos Xovellanos y el Marqués de Camposagráu.

«La Asturias guerrera». J.E. Casariego

Infelizmente, el xeneral del exércitu borbónicu, el Marqués de la Romana llegará a Uviéu en 4 d’abril de 1809. Esti maizón yera conocíu polos soldaos como’l «marqués de les Romeríes», pos dicía Marx; «nun s’armaba nunca combate sinón cuando daba la casualidá de qu’elli taba ausente». De secute, ordena al coronel José O’Donell desaniciar la Xunta peles armes mientres aconceyaba, un 2 de mayu de 1809. Darréu, ésta va ser suplantada por una Xunta d’Armamentu y Observación. Esti fechu va llevantar una defensa ferviente de la Xunta de la mano de Xovellanos, aludiendo a la “Constitución histórica” asturiana:

Sabemos los derechos que da al Principado su constitución; sabemos que tiene el de no obedecer y reclamar toda providencia que fuere contraria a ella, y de resistirlas hasta donde permitan su fidelidad y respeto; y no ver algún peligro en excitar esta lucha entre la autoridad soberana y los derechos de un pueblo respetable, entre la fuerza armada de la una y el amor a la libertad del otro.

L’infame Marqués de la Romana

Los asturianos van ser testigos de la entrada n’Uviéu del xeneral napoleónicu Kellerman, que la saquea a lo llargo de trés díes. El «valiente» Marqués de La Romana fuxe en barcu, dexando la capital a mercé de los franceses. Kellerman tentará d’implementar una alministración collaboracionista colos 300 vecinos que quedaben na ciudá (frente los 6000 colos que cuntaba), hasta que’l 10 de xunu les tropes franceses son movilizaes a otros destinos.

La Guerra Peninsular nun acabará hasta 1814, y la capital asturiana sufrirá otres trés ocupaciones más. Dempués de too, la bandera asturiana convertiráse nel recuerdu celeste de la epopeya d’un pueblu que tomó la iniciativa como un actor protagonista, faciendo usu de les sos propies instituciones d’autogobiernu y combatiendo con valentía -inda traicionáu- a unos invasores de los que’l so pasu va quedar inmortalizáu en delles pintures de los nuesos horros.

Eses xuntes ordenaren un reclutamientu xeneral ensin escepciones pa clases nin persones, impunxeren tributos a los capitalistes y propietarios, menguaron los sueldos de los funcionarios públicos, ordenaren a les congregaciones relixoses que punxeren a la so disposición los ingresos guardaos nes sos arques; nuna pallabra, adoptaron midíes revolucionaries. Dende l’arribada del gloriosu «marqués de las Romerías», Asturies y Galicia, les dos provincies que más se distinguieron pola so resistencia unánime a los franceses, poníense al marxe de la guerra de la Independencia cada vuelta que nun se víen amenazaes por un peligru inmediatu d’invasión. (Karl Marx, 1854)

Pintura de soldaos franceses n’horros d’Amieva (Semeyes. Belén Menéndez Solar)

7 escritores ‘clásicos’ en llingua asturllionesa

Una propuesta p’averase a la lliteratura de la llingua que comparten asturianos, llioneses y mirandeses

Por Denis Soria

Manuel Rodríguez Rivero, historiador y crítico castellanu, vien defendiendo que la concepción d’un llibru como «clásicu» va acullá d’una clasificación ente artistes antigos y modernos. Pela cueta, falamos d’obres que, nel so ámbitu, influyeron en cómo interpretamos la historia de la nuesa lliteratura o foron determinantes nel desenvolvimientu lliterariu posterior. Güei proponémosvos 7 autores en llingua asturllionesa qu’entraríen dientro d’esta categoría, anque por supuesto, somos a meter munchos más.

1. Antón de Marirreguera (1605-1662), el primeru conocíu

Antón González Reguera, más conocíu como Antón de Marirreguera, yera un autor natural de Llorgozana (Carreño), párracu de Priendes (1634-1644) y Albandi (1645-1661) y que llegó ser Arcipreste de Carreño dende 1656.

El so poema «Cuando ensamen les abeyes» ta consideráu como la primer obra lliteraria -documentada- en llingua asturiana. Dichos versos foron presentaos y premiaos nel certame lliterariu qu’amenizó les celebraciones pola proclamación de Santa Olaya de Mérida como patrona de la Diócesis d’Uviéu pol Papa Urbanu VIII nel añu 1639. En pallabres de José María de Cossío, estilísticamente ye vistu como un puntu de transición ente’l modelu medieval y el barrocu, observándose una adaptación estructural de les fábules clásiques al rellatu oral tradicional.

Cuando esamen les aveyes

Fujendo con el calor

Ya saben u esta el cajiellu.

Santolaya fó la abeya

Que de Mérida ensamó

Enfadada que adorasen

Les fegures de llatón.

Entonces el re don Sil

Andaba en guerra feroz

Con los moros que querín

Encabezase en Lleón.

Permitiolo aquesta Santa

Que les victories yi dio,

Siendo en ellos matanzua.

Fasta que en Mérida entró.

[…]

2. Xosefa Xovellanos (1745-1807), la primer muyer escritora

De vida tráxica, esta xixonesa mudaría a Uviéu en 1788 llueu d’enviudar y perder a los sos trés fíos. Ellí dedicaríase a la formación de muyeres recluses y a obres diverses de caridá. Finalmente, ingresará nel Conventu de les Agustines Recoletes de Xixón.

Xosefa pertenez a la llamada Xeneración del Mediu Sieglu, cercana a un círculu d’escritores d’influyencia neoclásica venceyaos a la Ilustración que -con too- apostaron por un usu cultu del asturianu, como yera’l casu de Xuan González Villar o Antón de Balvidares. Na so obra lliteraria (namás cinco poemes), amuesa una converxencia amañosa ente la soca tradicional cola perspectiva ilustrada. Y ye que’l mensaxe que solíen enzarrar los sos poemes nun ye otru que la crítica al lluxu y a la idolatría.

[…]

Por aquel caminón nuevu

Que fasta Xixón llegaba,

Tantos vivientes fervín

Y tanta xente colába,

Que parecía un formigueru

Cuando daquién lu destapa.

Quixe cudiar contra min,

Si quiciaves Santolalla

Habrá baxado del Cielo

Y dirín á visitalla,

O si nes santes reliquies

S’hobíes abridu aquell’arca,

que magar Uviedo é Uviedo

Ñunca se vió despesllada.

(La proclamación de Carlos IV)

 

3. Xuan María Acebal (1815-1894), la poesía burguesa

Escultor, poeta, profesor universitariu, cofundador del diariu católicu El Carbayón (1879)… Acebal foi una figura polifacética vinculada al carlismu y al conservadurismu políticu. Mui reconocíu nel so tiempu, l’uvieín supondrá la escepción na lliteratura asturiana de la segunda metá del sieglu XIX, estancada y empapiellada nel costumismu y nun bucolismu anacrónicu que va facela incapaz de captar al públicu burgués. Según Ramos Corrada, esta sedría una de les razones poles qu’Asturies nun esperimentó un fenómenu asemeyáu a la Renaixença o el Rexurdimento.

Asina, «Cantar y más cantar» marcaría un puntu d’inflexón na lliteratura asturiana. La voz protagonista ye un asturianu que vuelve del exiliu y xube a L’Aramo pa elevar un cantu a la so patria. Un poema nel que, como Señala Cubero de Vicente, Acebal sal al pasu d’una arcaica visión llocalista enllena de complexos y trata a Asturies -por fin- como una verdadera entidá colectiva.

Pel Poniente hay les sierres de Bedures,
Que el Feniciu furó la vez primera,
Y tras elli el Romanu, que sacaba
Co les venes de sangre d’ oru vena.
Entovía se atopen les migayes
Per un llau y per utru, y per Navelgas;
Y baXando pel río á Cornellana
Cuéyenles los paisanos ente arena,
Que mezclen con el zógue y dempués lleven
Regolviéndolo xunto ‘nunca duerna.
Qué tó decir de Cangues, nin de Pravia,
De les Luiñes, Caranga y de Teberga;
De Grao, de Quirós nin de Proaza,
O sitios qu’ endayuri el güeyu viera?
Yo non tengo palabres pa esplicallo,
Y déxolo p’algunu que más sépia.

4. Enriqueta González Rubín (1832-1877), la primer novela

Orixinaria de Santianes del Agua (Ribeseya), foi collaboradora de la efímera revista lliteraria El Nalón y nel periódicu El Faro Asturiano, onde avezaba firmar como La Cantora del Sella.

Enriqueta ye enforma conocida por ser l’autora de «Viaxe del tiu Pacho el Sordu a Uviedo» (1875), nada menos que la primer novela escrita n’asturianu, concretamente nel dialectu oriental. Esta autora -a caballu del romanticismu- toma’l relevu de la lliteratura costumista y, anque ye cierto que les sos obres tienen como fondu un ambiente rural, nun lu idealiza, al aviesu recurre a la sátira pa denunciar la desigualdá social.

-¡Sima Dios! -arrespondí yo-, esa culpa non é de ellos sinón nuestra; a güen seguru que si nós jeciéramos asina cuando ellos traten de que los unviemos a Madrid de deputaos, ¡otra cosa jora! Pero dixo elli que cuando los homes que non están avezaos a vevir en palacios se van avevir a ellos, como tienen que subir tantes escaleres, hasta el jumu del cigarru los amoria y-yos desvanez la cabeza, y non pueden amirar pa baxu. Eso será. (…)

5. Fernán Coronas (1884-1939), la busca de lo ‘asturllionés’

Galo Antonio Fernández, más conocíu como “Fernán Coronas”, o “el Padre Galo” foi un relixosu nacíu en Cadavéu (Ḷḷuarca) con un conocimientu fuera de lo común sobre Historia y Llingüística, al puntu de dominar con remangu l’asturianu, el llatín, l’italianu, el portugués, el francés y l’occitanu, destacándose amás como traductor d’inglés, alemán, finés, griegu y hebréu.

Cuasi tola so producción n’asturianu faila na década de 1920, parte d’ella publicada en Rimas en astur-leonés (1928). Trátase de poesía modernista, con una temática basada na reivindicación identitaria y llingüística d’Asturies. Nesti sen, Galo foi una figura esmolecida por topar un modelu llingüísticu y ortográficu válidu pa los dialectos del asturllionés.

Güey que cruciu estrañu suelu

Mueiru de malencoliyas

Au tan los mieus esturianus?

Au tan las Estudias miyas?

L’augüina miya chorosa

Ensin gracia pa cantare

Vey trista ya amargurida

Cumu el corazón del mare!

Así respondeu l’Esva

Cun un queixúmene fondu,

[…]

6. Eva González (1918-2007), la voz del Cordal

Ye la escritora n’asturllionés más conocida de Llión. Perteneciente a la Xeneración de Posguerra, Eva nació al calor d’una familia humilde y campesina de Palacios del Sil, anque tenía un espíritu autodidacta; nun entamaría a escribir hasta los años 70, pasando -de repente- a componer cuentos y poesíes a diario.

D’estilu frescu, espresivu y espontaneu, la palaciega destacóse por adaptar los modelos rítmicos de la tradición popular oral. Al tiempu, la so temática tendrá como telón de fondu’l mundu campesín, el paisaxe y la natura, pero nel que dexa albentistate les costures del alma humana con una dulzura emocionante.

El so primer llibru, Poesías ya cuentus na nuesa tsingua (1980), tevo un impactu escomanáu, ya que yera la primer vez que se publicaba una obra lliteraria en llionés nel Altu Sil, onde se conoz tradicionalmente como pauezu. Más tarde, va asoleyar una serie d’obres en collaboración col fíu, l’académicu Roberto González-Quevedo: dende la serie «Na nuesa tsingua», escrita ente 1980 y 1990, a libros como «Poesía completa» (1980-1991), y de manera póstuma: «Cuentos completos» (2008), «Pequena enciclopedia de nós» (2011) y «Hestoria de la mia vida» (2018).

Los xeitos de la mia tierra,

Las cousinas del mieu pueblu

Hai que las contar aspaciu

Dando-ys gracia ya xeitu.

7. Amadeu Ferreira (1950-2015), el faru de Miranda

Al empar qu’en Llión, na Tierra de Miranda la producción lliteraria na nuesa llingua ye enforma tardiega y malpenes escomienza en 1940. De magar entós, l’escritor que meyor encarnó la renovación y el tránsitu a la modernidá foi Amadeu Ferreira. Nacíu en Sendín, esti abogáu, profesor de la Universidá de Lisboa y políticu va ser ún de los actores principales del movimientu de revitalización del asturllionés nesta pequeña comarca de Portugal, ocupando la presidencia de l’Associaçon de la Lhéngua i Cultura Mirandesa.

Entamó a escribir dende los años 70 por influyencia d’Antonio Mourinho, sobremanera poesía, resultáu non d’una inspiración espontánea, sinón d’un trabayu llargu y escrupulosu: «Cebadeiros», «Ars Vivendi / Ars Moriendi» y «Norteando»; y prosa, «La bouba de la Tenerie / Tempo de Fogo», «Cuntas de Tiu Jouquin», «Ditos Dezideiros / Provérbios Mirandeses» o «Belheç».

Otramiente, Amadeu foi mui reconocíu pol so llabor como traductor pal dialectu mirandés del asturllionés: «Ls Quatro Eibangeilhos», «Ls Lúsiadas», «Mensaige», dos aventures de «Astérix» y obres d’Horacio, Virxilio y Cátulo, ente otros.

«Hai un tiempo para nacer i un tiempo para un se morrer. L’alma nun puode bolar pa l cielo. Senó, cumo podien nacer cousas nuobas? Essa ye la rucerreiçon de las almas: son bidas nuobas. Son bichicos, arbicas i todo l que bibe. Ye por esso que fázen mui mal an anterrar las pessonas ne l semitério: habien de las anterrar pul campo para ajudar las almas a nacer. Assi, Dius, seia quien fur, ten muito mais trabalho.»

5 coses que ver en Siero

Por Denis Soria

Siero ye un llugar estupendu pa esplorar Asturies dende’l centru a cualesquier puntu del Paraísu, pero tien tamién muncho pa ofrecer. Güei proponémoste 5 coses pa ver y facer nel conceyu

1. Les Campes

Interior del chigre Pumarín (Foto: Imanol Rimada)

Fuisti al Carmín de La Pola,

llevasti medies azules,

llevástiles emprestaes,

qu’aquélles nun yeren tuyes.

(popular)

¿Andes con fame? Los meyores sitios pa xintar tán nesta plaza del centru de La Pola: Casa Manolo, Viento del Norte, El Rinconín de Les Campes, El Madreñeru, El Pozu… Anque Pumarín tien fama d’ofrecer un ambiente más tradicional y la Sidrería Les Campes la meyor rellación calidá-preciu.

Lo más llamativo, amás de la so arquitectura tradicional, ye’l monumentu n’homenaxe a les fiestes d’El Carmín (celebraes a últimos de xunetu). El so orixe remóntase a 1695, cuando Andrés del Quintanal Nosti fundó nesti mesmu llugar una ermita advocada a la Nuestra Señora del Carme (bastiada en 1810), dando orixe a una romería qu’anguaño ye, xunto colos Güevos Pintos (Domingu de Pascua), la fiesta más popular de Siero, con cerca de 50.000 asistentes. Obra de Constantino Rozada, recrea la danza prima cola que se da acabación la celebración d’El Carmín.

2. Valdesoto

Ilesia de San Félix (Fotografía: Pueblastur)

Valdesoto ye, quiciás, la parroquia más folixera del conceyu de Siero. Les dos fechas más importantes son les fiestes de San Félix (segunda fin de selmana d’agostu), nes que se celebra’l Desfile de Carroces (declarada Fiesta d’Interés Turísticu de magar 2002) y los Sidros y Comedies (primer domingu dempués de Reis), una mazcarada d’iviernu guapa y divertida que tien llugar a la solombra de la ilesia modernista de San Félix y bien cerquina del Palaciu de los Carreño, del sieglu XVIII y declaráu Bien d’Interés Cultural.

3. Tiñana

Palaciu de Meres (Foto: Wikipedia)
Interior del Palaciu de Meres (Fotografía: Turismo Asturias)

A malpenes 10 minutos de La Pola, esta parroquia ye conocida pola gran bayura de llagares, siendo un destín enforma valoráu pa facer espiches: Llagar de Fonciello, Llagar de Quelo, Llagar Juanín, Viuda de Palacio o Llagar Muñiz. Per otru llau, siempre paga la pena acercase a conocer el formosu Palaciu de Meres, declaráu BIC. Llevantáu ente los sieglos XV y XVII, apaez en delles películes de José Luiz Garci (El abuelo, You’re the One, Historia de un beso, etc.) y en La Regenta, de Fernando Méndez-Leite.

4. Cualloto

Ponte de Cualloto (Fotografía: Conceyu de Siero)

Cualloto, ye un llugar singular. Parte de la llocalidá pertenez a Granda (Siero) y parte a Uviéu, pero ye esta cercanía a la capital lo que fai que tenga tamién una ufierta prestosa de llagares y sidreríes bien afayadices pa comer pela fin de selmana, combinada con un importante caseríu tradicional. No tocante a Siero, lo más interesante ta na ponte medieval (anque se piensa que les sos bases son d’orixe romanu) y na vieya fábrica de cerveza Águila Negra, d’estilu neoclásicu y restaurada de recién llueu de dos décades d’abandonu.

5. Valles mineros de Pumarabule y Candín

Valle de Pumarabule (Foto: rpasturias)

Esta parte del Este de Siero contrasta col paisaxe del restu del conceyu, pos equí faise bultable la güelga del so pasáu mineru, colos típicos castilletes, escombreres y poblaos de trabayadores. Na parroquia de Santa Marta podremos conocer el Pozu Pumarabule (o El Pozu la Muerte), furáu en 1917 y que tien l’honor de ser el primer pozu vertical d’Asturies, amás de l’aldea de Llamuñu. Siguiendo pela AS-324 hasta la parroquia de Carbayín espérenmos los de La Paulina (en La Rasa), reconocida por Xovellanos y el Pozu Mosquitera (desde la AS-323), peslláu nos ochenta. Per último, dende Candín podremos percorrer la SI-12 y contra Lieres pela SI-14 hasta’l conxuntu mineru de Solvay, un exemplu magníficu de pobláu mineru y pozu, perteneciente a los Valdeón Cabanilles, pero compráu en 1903 por Solvay y Cia.

 

Pozu Pumarabule (Fotografía. MTI Minas Asturias)

Foces del Ríu Pendón, Nava

Ye la ruta más conocida de Nava, una circular de dificultá moderada que s’adientra nel escobiu formáu pol ríu Pendón

Por Denis Soria

Ente la montonera de propuestes que mos esperen na Comarca de la Sidra, el conceyu de Nava ofrez esfrutar del auténticu sabor del monte astur a malpenes 20 minutos de la costa. Na ruta que güei vos trayemos percorreremos una preciosa garganta natural, pero ensin el vértigu y la dificultá d’otros paisaxes asemeyaos (como’l Cares).

Distancia
10,2 Km
Desnivel
350 m
Tiempu aproximáu
4 h
Dificultá
Media/Baxa

Powered by Wikiloc

Entamamos el nuesu itinerariu xunta la conocida embotelladora de Fuensanta, en Ḥuentesanta, un vieyu balneariu inauguráu en 1846. Llueu de pasar la ponte sobre’l ríu Pra xubiremos per un camín ascendente hasta la primer encruceyada, dándomos la posibilidá de continuar per Los Fornos o contra’l Mayáu Pastor pel llanu de Tabléu. Escoyeremos nesti casu la primer opción, contra l’Este.

El bebederu del Colláu Los Fornos indicarámos que tamos bien empobinaos. Tamién, un lletreru señalará l’empiezu del beyu furáu pol Ríu Pendón, conocíu per equí como La Peña. Dende esti puntu tendremos unes vistes perguapes sobre’l sur de Nava, Piloña y Parres, alcanzando inclusive a ver El Monte Incós y la Xerra del Sueve.

El senderu que cuerre paralelu al ríu dirá estrechándose cada vegada más hasta aportar al colector d’agua de Les Meceúres, sumiéndose nuna tupida viesca d’ablanos, carbayos, castañales y fayes. La calma y la paz del llugar cargarámos les piles primero de vadiar la riega de Bomalu y ascender al Colláu de la Boca de la Canal. Esti cachu en zig-zag bautizáu -curioso- como Les Vueltes va ser el más emprunu de la ruta, anque podremos facer pequeñes poses pa descansar y reparar na soberbia naturaleza qu’arrama a la solombra del Picu la Múa.

Ascendiendo per Les Vueltes, col Picu la Múa al fondu.

Una vuelta arriba, el paisaxe va paecemos puzzle de mayaos y cabañes. Y ye qu’esta zona de La Llama de Les Canellines, onde s’enmarca’l Mayáu Pastor, sirve d’abellugu pa los ganaderos de Nava y Bimenes pela primavera y el branu. Dende equí’l camín va enanchando nuna pista cómoda, per onde baxaremos pali pali pelos mayaos d’Entrexerres y la fonte del Faeu, volviendo a gozar de la panorámica sobre Nava y los pueblos de Grátila, Piloñeta, Ovín, Oméu y Buyeres. En pasando Los Xerrapos la ruta retoma una pindirura piquiñina, anque la nuesa mirada quedará prindada d’una casona señorial cuasi amatagada ente la frondosidá del valle del ríu Pra: el Palaciu de La Ferrería, de propiedá particular. Esti edificiu tien la so historia. Venceyáu a los Álvarez de les Asturies, trátase del solar de la Casa de Nava. Nel sieglu XV foi asediáu polos Condes de Ḷḷuna, que capturaron a Pedro de Nava. El fíu, Suero de Nava, entardará cinco años en lliberalu dempués de muncho batallar.

Los últimos pasos van ser ente carbayos americanos (quercus rubra), una especie procedente del este de Norteamérica que compite colos carbayos del país na fabricación de moblames de calidá y -especialmente- de pipes de vinu. Ye fácil d’identificar poles sos fueyes grandes, con llóbulos fondos y puntíos, que pela seronda pañen un color encarnáu mui intensu. Tornamos seliquino al puntu de partida cuasi ensin decatanos, en Ḥuentesanta, pa pegar un suerbu na fonte de La Vegona y alitar. El siguiente vamos pegalu de sidra, yá na villa de Nava, con un culete bien merecíu.

Reines asturllioneses

Tol mundu conoz a Pelayu, pero pocos saben que la última soberana d’Asturies foi una muyer

Por Denis Soria

Urraca de Llión

“¿A qué nun s’atreve l’alloriu de la muyer? ¿Qué nun intenta l’astucia de la sierpe? ¿Qué nun ataca la víbora criminal? L’exemplu d’Eva, la nuesa primer madre, indica a les clares a qué s’atreven, qué intenten, qué ataquen los inventos de la muyer. La miente cucia de la muyer llánzase contra lo prohibío, viola lo más sagrao, tracamundia lo llícito y lo illícito”

Atendiendo a esta descripción que fai Xiraldo na so Historia Compostelana (sieglu XII) d’Urraca de Llión -y de la muyer en xeneral- nun ye difícil entender por qué malpenes se citen trés reines consortes nes cróniques asturianes. Y anque tengamos más información al rodiu de les llioneses éstes nun suelen salir bien paraes. Obviaes, tapecíes, relegaes a la figura de xestantes cuando non a simples oxetos decorativos, el reinu asturllionés cuntó -pa con too- con dos reines titulares, quier dicir, con poder efectivu; Urraca de Llión y Urraca l’Asturiana.

Lleistis bien, falamos de «reinu asturllionés» porque la entidá política que fundó Pelayu en Cangues d’Onís nel sieglu VIII nun muerre col treslláu de capital que fai Alfonso III a Llión nel 910. Ésta mudara yá otres veces (Cangues, Samartín, Pravia, Uviéu…) y por ello les xenealoxíes escrites na dómina, como la Nómina llionesa traten los monarques del reinu de los astures como regis Legionensis. Asina que pal casu pataques…

 

URRACA DE LLIÓN (1081-1126)

La nuesa cazurrina accede al tronu dempués de la muerte de so hermanu Sanchu -de 14 años namás- na batalla d’Uclés (1108) contra los almorávides. Muertu l’únicu fíu varón d’Alfonso V, el rei decide otorga-y los derechos de socesión a so fía Urraca, un fechu insólitu que la llevaría a convertise na primer reina titular d’Europa, nel añu 1109.

Foi una muyer familiarizada bien ceo colos asuntos de gobiernu, en devanéu nun dirixera’l condáu de Galicia en xunto col maríu Raimundo de Borgoña. Y pese a qu’enviudara va pocos años, los nobles llioneses presionáronla pa que volviere casar cuanto primero, puesto que, como afirma Ricardo Chao na so Historia de los reyes de León, «Estas prisas (…) responen a la incomodidad que provocaba una mujer mandando.»

Vamos, un campu de nabos…

El so matrimoniu col machiruelu d’Alfonso I d’Aragón y Pamplona tornóse nun infiernu. El mui «valiente» mayábala de contino y enzarrábala baxo llave, conque tres muncho atetuyar la reina llogra tornar pa Llión. Sicasí, el so maríu invade’l reinu nel añu 1111, obligándola a fuxir a Galicia. Nun queda coles manes en bolsu. Consciente de que la llexitimidá del so bandu taba n’entredichu, Urraca y l’obispu de Compostela proclamen rei a Alfonso Raimúndez a la edá de siete años, el fíu que tuviera nel matrimoniu anterior.

Los aragoneses terminaríen por ser espulsaos de Llión, hasta qu’en 1116 alcuérdase’l repudiu d’Urraca per parte d’Alfonso’l Batallador como alternativa al divorciu. La reina pudo pasar páxina, pero, con too, el so maríu nun foi la única piedra con la que zapicaría a lo llargo la vida. Les disputes de poder -tamién col fíu-, los intentos d’independencia de Portugal y el descontentu popular fixeron muezca na so autoridá, siempre cuestionada pola so condición de muyer. Urraca, de fechu, emulando a Cersei na famosa serie Xuegu de tronos, sobrevivirá a un tagayu de compostelanos furiosos que la deshonró públicamente llanzándola desnuda a una llamarga (posteriormente, la prudencia política torgó que decidiera quemar la ciudá).

Muerre en 1126 a los cuarenta y picu años, siendo eternamente maltratada poles cróniques y la lliteratura, atrincheraes nuna visión insultantemente machista y parcial sobre’l so reináu.

 

URRACA L’ASTURIANA (1133-1179)

Toos conocen a Pelayu, pero pocos saben que la última monarca d’Asturies foi una muyer.

«quando domina Urraca regina et dominus Alvarus Roderici voluerount quod perdisse dominus rex Fernandus Asturiis»

Nel cursu los sieglos, les referencies a Asturies van llimitase yá al territoriu al norte del cordal. Tal vez pola xeografía, tal vez porque cola nueva capital en Llión la nobleza asturiana ya nun lo vertía tanto, ésta va protagonizar dos intentos serios d’independencia de Llión.

El primer intentu tendrá llugar col fíu d’Urraca, Alfonso VII de Llión, de la mano del conde Gonzalu Pelaiz en trés ocasiones (1132, 1135 y 1137), hasta que’l rei cansa de tanto derrotalu-perdonalu y da-y patada a Portugal, territoriu que se marca una DUI frente Llión (mas de les de verdá). Pero mientres unes vacaciones dempués d’una de les sos campañes escontra’l conde, Alfonso enxendra una bastarda con una ayerana llamada Gontrodo. Frutu d’esta aventura va nacer Urraca (llamada, paradoxes de la vida, igual que so güela). Criada na corte llionesa y nun momentu d’alianza colos vascones, el casoriu con García Ramírez IV el Restaurador convertirála en reina de Navarra. Un braguetazu, pero cortín. Enviudó a los seis años

A la vuelta y pa nun revolver quiciabes colos asuntos navarros, so padre concéde-y el reinu d’Asturies (subordináu a Llión). ¿Pero de qué val tener un reinu pa una sola ensin naide al llau con quien compartilu? El segundu matrimoniu d’Urraca va ser con una golosina del occidente, nada menos que con Álvaro Rodríguez, el señor de Navia. El casu ye qu’en 1164, pocos meses dempués de la boda, tenten de xebrar Asturies del reinu de Llión. Porque toa pareya moza sabe aquello de que meyor el pisu en propiedá, que lo de vivir d’alquiler ye tirar les perres…

La cosa debió salir regular, ya que’l nuevu rei de Llión, so hermanastru Fernando II, pon fin al alzamientu en menos d’un añu y manda al matrimoniu a la Castiella de pensar.

A partir d’equí les noticies de la pareya son contradictories, unos dicen que morrieron en destierru, otros qu’Urraca tornó p’Asturies como monxa llueu d’enviudar por segunda vez. Seya como fore dambos recibieron sepultura na catedral de Palencia, u siguen tovía. Más nada se sabe de quien foi la postrer reina d’Asturies «stricto sensu».


Castiellu de Soto (Ayer), xunto con Peḷḷuno, posible llugar de nacimientu d’Urraca l’Asturiana

Orixe del Antroxu

El que mos visite nestes feches sorprenderáse de serguro al ver anunciáu el Carnaval pol nome d’Antroxu, o engurriará la cara al comprobar que llocalidaes como Nueva (en Llanes) celébrenlo ¡nada menos que’l 19 de marzu! Tranquilos, que too tien un por qué.

Cipriano el Hojalatero (Evaristo Valle, 1947)

Pa poder entendelo tornaremos a los díes de fiesta, fartura y escesos previos a la Cuaresma (Quadragesima, periodu de 40 díes previos a la Selmana Santa), qu’emprincipiaba’l Miércoles de Ceniza, momentu que los fieles recoyíense na austeridá y na reflexón, ayunando o abandonando’l consumu de carne. D’ehí la pallabra carnaval, del venecianu carnevale, de carne (carne) y levare (quitar).

Pero l’Antroxu (en delles partes; Antrueyu, Antruidu, Antroiru, Entroido…) nun tien res que ver col cultu cristianu. Remanez del llatín introitus (entrada), ya qu’antecedía al añu nuevu (solía escomenzar el mesmu día de Navidá), teniendo’l so orixe nes celebraciones campesines de la Europa pagana -como les Saturnales o Lupercales– armaes ente l’equinocciu d’iviernu hasta la primavera. Ello ye, en ciertu mou conmemorábase’l “nacimientu de la lluz”, cuando los díes empezaben a allargase, razón pola que tamién coinciden coles fiestes –cristianizaes- de Santa Llucía (20-23 d’avientu na Edá Media) y de La Candelaria o de la Lluz (2 de febreru). El ciclu agrariu reanudábase y la vida volvía a referver, pero había qu’ayudar a espertar a la tierra.

Esti ye l’aniciu, por cierto, de la curiosa tradición en delles zones del occidente asturianu de prender ramones de paya pa beneficiar la collecha; El Pachizu o Los Payones.

 

Asina, en munchos pueblos los vecinos amazcaraben, emprestándose a la fiesta y a la tresgresión, gastando bromes y faciendo sonar lloqueros. Esto venía acompañao tamién por banquetes abondosos y esaxeraos enantes de la Cuaresma, sobremanera de carne de gochu y de llambionaes (frixuelos, picatostes, casadielles…). Equí tenemos, asina, l’orixe de les célebres mazcaraes d’iviernu celebraes hasta la primavera, del nuesu verdaderu Antroxu.

‘Carnavalada de Oviedo’ (Evaristo Valle, 1928)

 

Y nun teníen llugar únicamente nes aldees, les pintures d’Evaristo Valle danmos testimoniu de la so celebración n’Uviéu. Tenemos constancia de L’Obispín, una mazcarada festexada dientro de la propia Catedral de San Salvador ente’l 18 d’avientu y los Santos Inocentes, o de personaxes tan pecuñares como La Destrozona, un varón vestíu de muyer que repartía escobazos a degüellu.

Otru testigu de l’Antroxu uvieín foi’l conocíu escritor carbayón Perfecto Fernández (Nolo), quien en 1906 recueye delles referencies na so obra “Veyures y Caxigalines”.

«¡Morrer tú?… Ha haber abondo
Pa que Xuanín ciarr’el güeyu
Sin ver d’isti añu les fiestes
Que se cellebren n’Uvieu
d’Antroxu les bullicioses
galanes de Samateu.»

Pero, ¡ai amigu! Col cleru topemos. La ilesia nunca nun vio con bon güeyu estes festividaes escandaloses, que tentó de restrinxiles por tolos medios a los díes previos al Miércoles de Ceniza (Xueves de Comadres, Domingu’l Gordu, Llunes y Martes d’Antroxu), anque nun siempre con éxitu. Foi la so prohibición tres la Guerra Civil lo que realmente determinó la so desapaición.

15961245149_f0172d8342_z
El Guirria de Ponga (fotografía: Desdeasturias.com)

Cola llegada de la Democracia munchos conceyos rescataron l’Antroxu, pero la influyencia de la televisión afitó’l referente nel Carnaval de Brasil, de Cádiz o de Tenerife, escaeciendo la tradición asturiana. Güei menos d’una decena d’estes mazcaraes sobrevivieron, cuasi toes recuperaes. Ye’l casu de Los Sidros y Les Comedies (Valdesoto, Siero), El Guirria (San Xuan de Beleño, Ponga), Os Reises d’El Valledor (Ayande), Os Reises de Tormaleo (Ibias), Los Zamarrones de Ḷḷena, Los Aguilandeiros de San Xuan de Villapañada (Grau) y Los Guilandeiros de Tinéu.

Otres, como Los Bardancos de Casu, Las Comparsas de Quirós, Los Aguilanderos de Xedré o La Puela o Los Zaparrastros de Ayer alcuéntrense n’hibernación, esperando ser retomaes polos sos vecinos.

antroxu
«Les Mazcaraes n’Asturies» (diseñu: Denis Soria)

Antroxando pallabres…

Nesti ambiente de folixa y socarronería nun faltaben los cantares y les coples inda presentes na tradición oral. Les más d’elles anónimes, anque entá conservamos l’autoría de dalgunes como les del popular Antón el Coque, resucitaes pol cantante Jerónimo Granda en 1977.

 

Por eso son tan valiososos estos otros versos recitaos por Araceli Noval, vecina d’Oles (Villaviciosa), porque amuesen la cara más instrospectiva del Antroxu, la más sobria y moralizante.

 

Conque non, si mos averamos a la so historia, L’Antroxu nun ye namás una fiesta de disfraces. Baxo la mázcara, llatente, escuéndese esi pulsu eternu ente’l llume que s’abre pasu baxo la fría calma de lo qu’un día foi primavera, convertíu asina nel ciclu mesmu de la vida.

La *xuventú ye folixa, ye diversión, ye folgueta.
Les penes y desengaños quédense pa la vieyera.
Vosotros sois l’Antroxu, nosotros la Cuaresma.

La lienda de la ponte del beisu de Ḷḷuarca

Sobre l’orixe de la lienda más conocida de la villa blanca

Asturies ye un país arrogante n’histories, calistraes davezu pol arume de los sos montes y viesques, del so mar o de la so sidra, pos na monotonía de los díes grises munchos de los nuesos cuentos y seres mitolóxicos xorrecieren al calor de la lleña, cuando non del alcohol…

Eso sábenlo bien los vecinos de la villa de Ḷḷuarca, que nun desaprovechen la ocasión pa rellatar con arguyu la lienda del pirata Cambaral, asocedida nel tiempu en que pirates berberiscos y otros malfechores afaraben les costes gallegues y asturianes al envís d’afogar la so sede en sangre y gafos vicios. El de más sonadía foi’l vil Cambaral, conocíu pola so crueldá y que tevo la osadía d’atacar la redolada de Ḷḷuarca. Pa la so mala fortuna, no más alto d’esta villa vivía’l señor de La Telaya, un home de gran inxeniu que llogró entama-y una bona, faciendo pasar a los sos homes por pescadores, y prindando al pirata dempués d’una dura batalla.

Enllenu de mancadures al berberiscu metiéronlu presu nes mazmorres de La Telaya a la espera de xusticia. La lienda repara, sicasí, na fía del señor de Ḷḷuarca, una rapacina con una pureza y piedá que la llevaron hasta los barrotes de la cárcele pa curiar les feríes de Cambaral. Cuando cruciaron les sos miraes pela primer vez, l’amor surdió cola mesma intensidá qu’aquelles foles azotaes escontra los cantiles nes nueches de galerna. Foi por esa mesma pasión que fuxeron una nueche, cuidando sortiar la vixilancia de los guardies confiaos, pero non la de so padre.

En llegando al puertu, onde esperaba una barca, los amantes cuntaron tar a salvu y fundieron selino nun besu baxo la lluz de la lluna. Pero’l padre de la mocina, azotáu y borrachu pola ira, corrió a tarazar cola so espada les cabeces de los amantes, que cayeron xuntes besándose per siempre al fondu de la mar. De magar entós, el llugar va ser conocíu polos lluarquinos como la ponte del beisu, mientres qu’ún de los barrios más marineros y populares, El Cambaral, fixo suyu’l nome del pirata.

Arruñando daqué al redor del orixe de la historia, que munchos pensaron ancestral, El Cambaral nun ha interpretarse como un nome árabe, turcu o bereber, sinón qu’en realidá fai referencia a un llugar con presencia de cámbaros. Pero amás, Juan Antonio Martinez Losada, cronista oficial de Ḷḷuarca, atribúi l’autoría d’esta lienda nada menos qu’al escritor y periodista Jesús Evaristo Casariego, quien fore director del RIDEA y una persona dada a la fabulación, faciendo pasar munches de les sos creaciones lliteraries por liendes recoyíes supuestamente de la oralidá pa -quiciás- otorgar al so llugar de nacimientu de mayor nobleza. Queda demostrao, asina, que la lienda del pirata Cambaral y la ponte del beisu, tienen un orixe eruditu y bastante nuevu.

Al final, paez que delles de les nueses liendes más conocíes y espardíes nun tienen un brillu tan vieyu nin tan popular, anque ye verdá que dalgún perdió la cabeza por amor…

Orixe y significáu de la bandera asturiana

Por Denis Soria

Ye’l símbolu más poderosu d’Asturies, el que mos fai visibles como pueblu, como identidá. Amosada con arguyu en viaxes y celebraciones, nunca nun foi difícil reconocer el coche d’un asturianu, pero pocos conocen la so historia…

Bandera asturiana. Fotografía: EL COMERCIO

 

¿Cuándo se crea la bandera d’Asturies?

En 1794, cuando’l Marqués de Camposagrado consultó a Xovellanos sobre l’escudu que debía portar el reximientu de nobles asturianos. Nuna carta espuesta güei na Xunta Xeneral, l’ilustráu va proponer l’emblema de los reis astures emplegáu primero de mudar la capital a Llión: la Cruz de la Victoria.

Yera esa mesma cruz de madera que portara Pelayu, según la lienda, na batallla de Cuadonga y qu’Alfonso III mandara recubrir d’oru y piedres precioses nel añu 908. Esa mesma que se conserva dende hai más de mil años na catedral d’Uviéu y que ta representada en dellos edificios prerrománicos. ¡Cuidadín! Enantes qu’eso, el reinu d’Asturies enxamás nun tuviere una bandera, pos los emblemes yeren símbolos que s’identificaben namás colos reis. Ye de magar el sieglu XVIII cuando escomienza a cuayar la idea de que la nación trescendía al monarca.

Basta pues para fixar el blasón de Asturias haber indicado la insigna de que nuestros reyes usaron como divisa propia. Fundado el reyno de León esta divisa se hizo si no más propria, más peculiar de Asturias (…)

 

¡L’omega siempre minúscula!

Le lletres alpha y omega qu’engolen de los sos brazos simbolicen el principiu y fin de toles coses, la eternidá.

[Apocalipsis, 1-8: “Yo soi l’Alpha y l’omega, diz el señor Dios; el que ye, el que yera, el que vien, el toupoderosu”.]

Lo qu’a munchos se-yos escapa, inclusive a Xovellanos, ye que l’omega ha ser SIEMPRE minúscula, ya que figura d’esta manera en toles sos representaciones en tiempos del reinu de los astures. Sicasí, l’error de poner dambes lletres en mayúscula foi recurrente a lo llargo de la historia.

Inscripción del palaciu d’Alfonso III (Uviéu)

 

El color de la bandera ye azul… o encarnao

Xovellanos recueye dambos colores como válidos, anque la oficial reconoza l’azul namás.

«(…) pudiera serlo también en representación y colocarse en campo de gules o encarnado según Díaz del Valle.»

Sala Constitución de la Xunta Xeneral d’Asturies. Fotografía: Xunta Xeneral d’Asturies

La primer vez que s’isó foi…

El 25 de mayu de 1808, en plena invasión francesa. Esi día, la Xunta Xeneral d’Asturies proclámase soberana, declara la guerra a Napoleón y crea l’Exércitu Defensivu Asturianu, pal que necesitaben dotar d’una bandera. La Xunta echa mano entós del informe de Xovellanos, optando pol color azul y amestándo-y el lema «Asturias nunca vencida».

Tiempu dempués, “l’azuleste” -como la llamaría l’escritor Fernán Coronas- va ser emplegada tímidamente nos escudos de l’autoridá provincial dende 1857, anque consta’l so usu en celebraciones y mítines a lo llargo del sieglu XIX y primeros del XX. Llegada la Guerra Civil, la cruz y el lleón son reproducíos nos emblemes del Conseyu Soberanu presidíu por Belarmino Tomás.

Milicia provincial d’Uviéu (“La Asturias Guerrera”, J.E.Casariego).

Vidreres de la Xunta Xeneral. Fotografía: Xunta Xeneral d’Asturies.

 

¿Y en democracia?

La primer bandera d’Asturias exhibida llueu de la dictadura franquista foi fecha en 1976 por Amelia Valcarcel, quien afirmó portala pela primer vegada nel Día de la Cultura celebráu na carbayera de Los Maizales.

Al añu siguiente, un 21 d’abril de 1977, Avilés tornaríase nel primer conceyu qu’isó la bandera asturiana oficialmente, gracies a la iniciativa del colectivu asturianista Conceyu Bable. Finalmente, La oficialidá pa la bandera nun va aportar hasta la aprobación de la Llei de la bandera de 1990.

 

«Bable a la escuela, autonomía rexonal», manifestación del 22 de xunu del 1976.

astAsturianu