Cuaya, el conde qu’amedranó Asturies

Cuaya, el conde qu’amedranó Asturies

La ferviente historia del noble moscón que semó’l terror na Asturies del sieglu XIV

Por Denis Soria

La fin de la Edá Media trexo a la nuesa tierra una serie de cambios perfondos; al dir desplazándose los centros de poder a Llión primero y al Reinu de Castiella dempués, Asturies vive una situación d’aislamientu motivada pola esclusión de la nobleza asturiana na realidá política. Con too ello, les crisis económiques y la decadencia de la sociedá feudal europea propiciaron una atmósfera de delincuencia xeneralizada. Nos milenta caminos d’aquella Asturies escura y asilvestrada existíen dende recaldadores illegales qu’estafaben a los mercaderes esixendo portalgos desorbitaos, hasta otros que directamente asaltaben a espada y cuchiellu a los viaxeros, que podíen perder la bolsa o l’honor nel meyor de los casos, o la vida nos más.

Y ye equí onde entra’l nuesu Gonzalu Peláiz, qu’a pesar del nome nun tien nada que ver con aquelli que se sublevara en 1132 contra’l rei de Llión en pro -paez ser- de la independencia d’Asturies. Esti conde, el de Cuaya, que yera analfabetu a conciencia y más feu qu’una nevera per detrás, nació en Villanueva (Grau) a últimos del sieglu XIII. Yá dende mozu empezó a cobiciar la villa de Grau, que tentó de tomar pola fuercia en dalguna ocasión. La cosa prometía. Esta pola taba baxo reguengu (ello ye, baxo xurisdicción directa del rei de Castiella), asina que cuando Fernando IV -con diez años namás- accede al tronu en 1295, Peláiz aprovecha la minoría d’edá del monarca y solicita la concesión de la villa. Los moscones, conocedores de los antecedentes del conde, dixeron que nin de Blas y unviaron una comitiva a la corte evitando les sos pretensiones.

Pero como Gonzalu Peláiz nun lo tomó mui bien, decidió cafiar tolo que pudo; afaró les tierres y aldees del conceyu y aniquiló a tol qu’entraba o salía de les muralles de la pola de Grau. Ansí, por más que los vecinos de la villa defendieren el so llar acérrimes, el comerciu y l’agricultura apararon dafechu, poniéndolos nuna situación realmente desesperada. Ello llevólos -en 1301- a rogar auxiliu al rei de Castiella, qu’inora la petición y más tarde al conceyu d’Uviéu, que nun-yos lu da por mor del conflictu ente l’Obispu de San Salvador (Fernando Gonzali) y el so Cabildu colos vecinos de la ciudá. Informáu Cuaya, amplía les sos malfetríes al alfoz d’Uviéu y al valle del Nora usando como resorte la fortaleza de Priorio (el rei Fernando IV ordenaría valtala, en devanéu, nel añu 1306) combalechándose col obispáu y compartiendo cola mitra’l botín de los sos crímenes.

Y como si too ello nun-y bastare, na nueche del 1 de marzu de 1308 llanza un ataque por sorpresa sobre Grau. Esta vez llogra trevesar les muries, masacra a cuasi tola población y priende fueu a la villa primero de tornar pa Cuaya col productu del saquéu. Persabiendo del desentendimientu del monarca castellanu con Asturies y en vengación por negase aquelli a reconoce-y “los sos derechos” sobre Grau, toma’l castiellu quirosanu d’Aguilar (de propiedá real) díes dempués.

La indignación de los asturianos arrama’l vasu y dalgunos homes d’armes d’Uviéu, más otros de los conceyos vecinos, axúntense a los supervivientes de la quema de Grau y alcuerden poner sitiu a la plaza onde s’alcontraba’l conde. Pero nun foi l’amenaza de les milicies conceyeres lo que-y fixo abandonar la torre, sinón el socorru oportunu del obispáu carbayón, quien -engarráu colos siervos y comerciantes de la capital- entréga-y oficialmente los baluartes de Priorio y Tudela xunto col Cotu de Lluniego y bien de refuerzos militares.

Nun yera (el castiellu de Tudela) pocu choyu. Anque nel solar qu’antaño ocupó güei malpenes queden unes poques piedres amontonaes con poca xuxa, yera daquella una de les fortaleces más imponentes d’Asturies. Amás, asitiábase nuna ubicación estratéxica; guardando’l Cotu de Lluniego y a la entrada mesma de la capital asturiana, onde toles recues de mercaderes que veníen del camín de Castiella pagaben portalgu.

Ruines del castiellu de Tudela (Fotografía: Asturgeografic)

Los asaltos a les caravanes nun se fixeron esperar, interrumpiendo’l comerciu de la ciudá per meses. Y como la pela és la pela, los uvieínos nun diben quedar coles manes en bolsu mientres Cuaya facía lo que-y pegaba la gana. Accedieron a contratar a un mercenariu pa facer frente al conde; Suer del Dado, un ayerán que tenía -xunto colos sos homes- sonadía de ser el meyor guerreru d’ente la brava nobleza asturiana. En pocos meses consiguen caltener a Peláiz a raya y restablecer el comerciu. Uviéu aprovecha l’impasse pa firmar -el 21 d’ochobre de 1309- una Carta de Xermandía con Grau. Esta alianza permitirá-yos organizar meyor l’ayuda militar, polo qu’al poco contraten a otru noble batallador; Suer Menendi de Valdés. Resulta interesante que fore precisamente un Valdés el que punxera les armes al serviciu de los conceyos, pos Valdés yera tamién la segunda muyer de Cuaya; Urraca Suari (vilba de Menén Suari de Valdés), que volviera casar col polémicu Don Gonzalu obligada de xuru polos problemes financieros que llevaba arrastrando.

Nos seis años siguientes tien llugar una auténtica guerra civil ente’l bandu laicu (la causa de los conceyos) y l’eclesiásticu (representáu pol obispáu d’Uviéu y el Conde de Cuaya) hasta que -por fin- la rexente del recién coronáu Alfonsu XI, María de Molina, unvia una carta al Obispu de San Salvador y al so Cabildu poniéndolos pingando y esixéndo-yos que retiraren l’apoyu a Gonzalu Peláiz.. Al tiempu, manden al Comenderu Real (Rodrigu Álvariz de les Asturies, conde de Noreña) pa encargase del gobiernu del país.

Llega Rodrigu a terrén d’Asturies cola seña real y bien llueu acuden al so llau les milicies conceyeres que planten cara a Peláiz hasta que llogren neutralizalu nel castiellu de Tudela. El sitiu dura cuatro meses y empléguense pa ello máquines de guerra que’l Comenderu solicita a les autoridaes uvieines, desafiando’l requerimientu interpuestu pol Obispu pa que los fierros et cuerdas del Engenio nun salieren de la capital.

Por fin, na primavera de 1316 les tropes tomen la plaza. Enteraos los de Grau, y fartos yá de tantos años de calamidaes, entren nes tierres de Cuaya tronzando y quemando tolo que pillen. Pero como mala yerba nunca muerre, Gonzalu Peláiz escapa en dalgún momentu del asediu y exiliáse en Navarra -piénsase- hasta la so muerte.

La “Ruta del Conde de Cuaya” percuerre dellos pueblos del valle del ríu las Varas.

Nos meses que siguieron a la toma de la fortaleza Rodrigu Álvariz, quien complementaría’l gobiernu d’Asturies cola llucha contra los musulmanos de Granada, ordena confiscar les propiedaes de Gonzalu y valtar el baluarte de Tudela pa evitar que sirviere de puntu d’apoyu pa futuros llevantamientos contra la corona. Quién diba pensar que vaiga ser so fíu adoptáu, Enrique de Trastámara (bastardu d’Alfonso XI), el que prienda la mecha n’Asturies dando pasu a la Guerra Civil Castellana (1351-1369) y dalgunos años más tarde’l so nietu; Alfonso Enríquez el que se subleve contra so tíu, Juan I de Castiella, hasta la toma de Xixón en 1395. Pero en fin, d’ello falaremos otru día.

Volviendo al nuesu conde preferíu, ye evidente qu’esti personaxe debió dexar una güelga bien fonda nos moscones pa que, siete sieglos dempués, la so alcordanza siga tovía viva na tradición oral del conceyu de Grau.

Como vemos, el mitu del prototipu de caballeru feudal empáticu y bonable colos sos súbditos, a los que protexía de bárbaros y cuélebres, ye una falacia. El medievu foi una dómina na que les élites politiques nun duldaben n’aprovechar la so situación pa satisfacer los sos placeres mundanos pasando penriba del bientar de la xente del común. Una época na que la desigualdá y corrupción taben a la orde del día… Por desgracia, dende la Edá Media poco cambiemos como sociedá nesi sen.

Palaciu de Villanueva (Grau), llugar de nacimientu del Conde de Cuaya.

Acullá del Cabrales: 6 quesos asturianos pa descubrir

Acullá del Cabrales: 6 quesos asturianos pa descubrir

Seis propuestes asturianes pa los llocos de los quesos

Por Denis Soria

Toos conocen el Quesu Cabrales, pero con una tradición ganadera milenaria que se remonta a les tribus astures, la mancha quesera más grande d’Europa ofrez munches más alternatives pal nuesu paladar. Asturies ye’l país de los 40 quesos. Güei trayémosvos seis d’ellos.

1. Quesu Casín

Esti quesu debe’l nome al conceyu de Casu, nel valle altu del Nalón, anque la so producción abarca tamién Sobrescoyu y Piloña, conceyos qu’integren la DOP. Ellabórase con pasta amasao a partir de lleche crudo de vaca casina, una raza autóctona del monte asturianu. Piénsase que ye ún de los más antigos, pos ta documentáu dende’l sieglu XIII.

Ye un quesu de tastu fuerte y mantecosu. La so particularidá reside en que, una vuelta desuerao, amásase formando gorollos que se dexen reposar unos díes pa dempués pasalos per una máquina de rabilar cuantes veces se queria aumentar el picor y la intensidá del sabor. Finalmente, grábense con un marcu de madera al envís d’identificar la quesería.

Cuenta con cuatro queseríes: Ca Llechi, El Viejo Mundo, Quesería Reciegos y La Corte (les dos últimes vistables). Amás, la fin de selmana postrera d’agostu tien llugar el Certame del Quesu Casín nos altos de La Collá d’Arniciu (Casu), un momentu afayadizu pa conocer les últimes novedaes y esfrutar d’unes vistes bien guapes al Parque Natural de Redes.

2. Quesu Gamonéu

Ellaborao nos conceyos de Cangues d’Onís y Onís, ye ún de los trés quesos azules que se faen nel entornu de los Picos d’Europa. El so tastu ye asemeyáu daqué al Cabrales, pero’l preciu nun tien res que ver. Ello ye que la so producción ye muncho más pequeña y artesanal.

Lo que lo fai tan especial ye tanto’l so afumáu como la so curación en cueva, ente dos y cinco meses, que consigue una consistencia semidura, con manches de penicilium espardíes pela corteya y un sabor penetrante. Ellabórase a partir de lleche de vaca, oveya y cabra, si bien nel casu del quesu Gamonéu del Puertu han mecese a lo menos dos tipos de lleche (mínimu un 10% la d’ovín y/o caprín). La producción d’esta variedá acútase a los meses de primavera y branu, tiempu de pastoréu nes vegues y mayaes, razón pola que ye más cotizada que la del Gamonéu del Valle.

Con cerca de 18 queseríes inscrites na DOP, tolos 23 d’ochobre celébrase en Benia, capital del conceyu d’Onís, el Certame del quesu Gamonéu, que s’allarga a la fin de selmana.

3. Quesu de Los Beyos

Con Indicación Geográfica Protexida (IPG), produzse nos conceyos asturianos de Ponga y Amieva y nel llionés d‘Oseya de Sayambre. El so nome vien del escobiu de Los Beyos.

El quesu de Beyos puede ellaborase con lleche de vaca, cabra y oveya, magar qu’ensin amestar. Ye un quesu cremoso, fácil d’esfaraguyar al corte y daqué acedo, más intensu nos d’oveya y de cabra, y más suave nos de vaca.

Existen trés certámenes d’esti quesu:

  • San Xuan de Beleño (Ponga): Domingu últimu de mayu.
  • Amieva: Primer sábadu de xunu.
  • Oseya de Sayambre (Llión): Ochobre.

 

4. Quesu Pría

Propiu de la parroquia costera de Pría, nel conceyu de Llanes, esti quesu tien lo singular de ser ellaborao con lleche de vaca y mantega d’oveya. De les sos muches variedaes, la más demandada ye’l famosu ḥumáu de Pría, un quesu afumao con madera de carbayu, tienro, de tastu semidulce y prestosu.

 

5. Quesu picón

Ye ún de los quesos más enigmáticos d’Asturies y, a xulgar pola so ellaboración, de los más antigos. La so producción ye doméstica cuasi dafechamente, arrequexada al monte meridional asturianu, onde tien nomes distintos y variaciones según el conceyu: queisu de fonte, queisu d’odre, queisu de bota o queixu de vexiga en Quirós, Proaza y Somiedu, quisu picón en Ḷḷena y quisu d’Urbiés nel valle de Turón (Mieres).

Trátase d’un quesu fecho a base de calostru o caliestru (lleche de vaques paríes de recién), poco graso, pastoso y cremoso, ideal pa untar. El so sabor nun ye aptu pa tolos gustos, pos ye particularmente intensu y picante, motivu pol qu’en delles cases suelen amestar cantidaes pequeñes d’aguardiente de miel o mantega, p’amatagar l’acidez.

Anque una vuelta cuayada la masa puede desuerase en fardeles de tela, en dellos pueblos siguen faciéndolo en pelleyes de corderu o cabritu, onde se dexa formentar al calor del llume de la cocina pa que sude’l sueru. Trés meses más tarde pásase a una fonte o tarreña onde se remueve a lo llargo d’ocho meses pa que’l mofu de la superficie s’esparda de manera homoxénea.

Esti quesu en peligru de desaniciu ye enforma difícil de mercar, conque lo recomendable ye acudir a les distintes feries:

  • Certame del Quesu d’Urbiés (Mieres): Segundu domingu de xunu.
  • Certame del Quesu de Bota (Bermiego, Quirós): Primeros de xunu.
  • Certame del Quesu de Fonte (Proaza): Primeros de febreru.

 

6. Quesu Afuega’l Pitu

Al empar que’l Casín, ye ún de los quesos asturianos más antigos, y de fechu ta documentao como moneda de pagu d’impuestos nel sieglu XVIII. Faise con lleche de vaca carreña o frisona en pequeñes caseríes, si bien antaño la so producción taba presente en cuasi tolos conceyos ente’l Narcea y el Seya. Poseye la so propia DOP de magar el 2008.

L’orixe del so nome, raru cuanti si más, dio llugar a interpretaciones alloriaes. Pa unos el nome alude a que, al tragar, la so testura pastosa apégase al paladar y al gargüelu, como un pitu. Otros defenden que se debe al procesu de desueráu de la variedá de puñu, na que s’afuega’l trapu o fardela pa recudir primero d’engolala.

El quesu Afuega’l Picu preséntase en trés modalidaes, curaos, semicuraos o tienros y hasta cuatro variedaes en función de la so forma: Atroncáu blancu, de forma troncocónica, de color blancu y ensin amasar o Atroncáu roxu, de forma troncocónica, con pimentón (lo que-y da un color encarnáu) y amasao. Les otres variedaes son de trapu o de puñu, Trapu blancu y Trapu roxu, que s’estremen de les anteriores pola so forma ronda y pol desueráu en trapos o fardeles.

El certame más importante d’estu quesu tien llugar a últimos de xineru en La Foz (Morcín), onde participen delles queseríes llegaes de diferentes conceyos: Tinéu (Tierra de Tineo), Salas (Valle del Narcea, Agrovaldés, El Viso y La Arquera) Grau (Ca Sanchu, Borbolla y Temia), Pravia (La Peñona y Rey Silo) y Morcín (La Figar).

El cuélebre de San Llorienzo

El cuélebre de San Llorienzo

Sobre la lienda que da nome al famosu sablón xixonés

Por Denis Soria

El Cuélebre ye una de les criatures más conocíes de la mitoloxía asturiana. Los más de los testimonios coinciden en que se trata d’un machu de culiebra que sigue medrando a lo llargo de sieglos hasta algamar un tamañu xigante y criar nales d’esperteyu. Pero esti ser monstruosu estráu d’escames con una dureza mayor que la del fierro taba envizcáu pol oro y los oxetos brillantes, guardando les sos ayalgues nel interior de les cueves. Asina, la so presencia ye fácil de rastrexar en bien de llugares n’Asturies y Llión, como La Cabeza’l Cuélebre (Ḷḷena), La Vuelta’l Cuélebre (Colunga), Valdecuélabre (Somiedu) o El Pozu’l Cuélebre (Cangues d’Onís). Hasta Victor Manuel va dedica-y una de les sos canciones.

L’etnógrafu y dibuxante Bertu Álvarez Peña recueye nel so llibru Mitos de Xixón la lienda tresmitida por Manín de Selmo al folcklorista Luis Argüelles na década de 1940. Manín, un xixonés que yá rondaba los noventa y tantos años cuntó-y esta vieya historia sobre’l cuélebre qu’habitaba cabo la playa de San Llorienzo. Conocemos más rellatos sobre esti bichu nel conceyu de Xixón, pero’l de Manín ye el únicu que fai referencia al arenal.

Dicíase que, fai munchos años, un Cuélebre vivía dientro d’una cueva del cabu de San Llorienzo, frente La Isla de la Fontica (llamada modernamente La Isla la Tortuga, pola forma), que tenía amedranaos a los pescadores de Cimavilla. Desesperaos por ver cómo la sierpe frayaba de contino les sos llanches y apareyos colos que ganaben el sustentu, pidieron ayuda a Gorín, un ermitañu que moraba nel Picu’l Sol. Ésti ofrecióse a dar muerte a la bestia, pero, empara, los playos habríen alimentalu’l restu la vida.

Gorín escoyó a Xuana, una moza de quince años, fía de madre soltera, pa que lu acompañás hasta’l covayu del Cuélebre. Una vegda na entrada, Gorín llamó a la bestia y, en sintiendo que s’acercaba, l’ermitañu garró la faxa de Xuana y mangó-yla na cabeza al reptil namás apaecer, quedando mansu y suave. Darréu, l’ermitañu allegó al cubil de la sierpe onde atopó un lloréu d’oro, el tesoru que’l taba guardando. Gorín llanzó’l lloréu a la mar y ordenó al Cuélebre que marchara tres d’elli, desapaeciendo pa siempre baxo les foles furioses del cantil.

L’ermitañu pasó a vivir entós a la cueva del Cuélebre, mientres los pescadores cumplíen col so tratu toles selmanes llevándo-y alimentu. Sicasí, si dalguna vez olvidaben facelo, un cuervu posaba nel llugar que güei se conoz como La Colina’l Cuervu y colos sos glayíos recordaba-yos a los playos la so obligación.

La Colina’l Cuervu (Fotografía: MACHBEL)

Col tiempu, enriba de la cueva del lloréu edificóse la capiella de San Llorienzo de Mar, bautizando tamién al cabu y al inmensu sablón cercanu: la playa de San Llorienzo. Lo cierto ye qu’esa capiella existió, y de fechu Xovelllanos trescribiría delles coples y cantares populares que facíen referencia a les procesiones marineres ancestrales ente la capiella de San Llorienzo de Tierra (cerca del Conceyu) y la de San Llorienzo de Mar. Como aquella que diz:

«Vengo de San Llorienzo de la Tierra,
voi pa San Llorienzo de la mar,
enguedeyar, enguedeyar, enguedeyeme,
nunca me pudi desenguedeyar…»

Un cuélebre de cartón domina sobre les muralles de Xixón, obra de los vecinos de Cimavilla nes sos fiestes.

 

Reines asturllioneses

Reines asturllioneses

Tol mundu conoz a Pelayu, pero pocos saben que la última soberana d’Asturies foi una muyer

Por Denis Soria

Urraca de Llión

“¿A qué nun s’atreve l’alloriu de la muyer? ¿Qué nun intenta l’astucia de la sierpe? ¿Qué nun ataca la víbora criminal? L’exemplu d’Eva, la nuesa primer madre, indica a les clares a qué s’atreven, qué intenten, qué ataquen los inventos de la muyer. La miente cucia de la muyer llánzase contra lo prohibío, viola lo más sagrao, tracamundia lo llícito y lo illícito”

Atendiendo a esta descripción que fai Xiraldo na so Historia Compostelana (sieglu XII) d’Urraca de Llión -y de la muyer en xeneral- nun ye difícil entender por qué malpenes se citen trés reines consortes nes cróniques asturianes. Y anque tengamos más información al rodiu de les llioneses éstes nun suelen salir bien paraes. Obviaes, tapecíes, relegaes a la figura de xestantes cuando non a simples oxetos decorativos, el reinu asturllionés cuntó -pa con too- con dos reines titulares, quier dicir, con poder efectivu; Urraca de Llión y Urraca l’Asturiana.

Lleistis bien, falamos de “reinu asturllionés” porque la entidá política que fundó Pelayu en Cangues d’Onís nel sieglu VIII nun muerre col treslláu de capital que fai Alfonso III a Llión nel 910. Ésta mudara yá otres veces (Cangues, Samartín, Pravia, Uviéu…) y por ello les xenealoxíes escrites na dómina, como la Nómina llionesa traten los monarques del reinu de los astures como regis Legionensis. Asina que pal casu pataques…

 

URRACA DE LLIÓN (1081-1126)

La nuesa cazurrina accede al tronu dempués de la muerte de so hermanu Sanchu -de 14 años namás- na batalla d’Uclés (1108) contra los almorávides. Muertu l’únicu fíu varón d’Alfonso V, el rei decide otorga-y los derechos de socesión a so fía Urraca, un fechu insólitu que la llevaría a convertise na primer reina titular d’Europa, nel añu 1109.

Foi una muyer familiarizada bien ceo colos asuntos de gobiernu, en devanéu nun dirixera’l condáu de Galicia en xunto col maríu Raimundo de Borgoña. Y pese a qu’enviudara va pocos años, los nobles llioneses presionáronla pa que volviere casar cuanto primero, puesto que, como afirma Ricardo Chao na so Historia de los reyes de León, “Estas prisas (…) responen a la incomodidad que provocaba una mujer mandando.”

Vamos, un campu de nabos…

El so matrimoniu col machiruelu d’Alfonso I d’Aragón y Pamplona tornóse nun infiernu. El mui “valiente” mayábala de contino y enzarrábala baxo llave, conque tres muncho atetuyar la reina llogra tornar pa Llión. Sicasí, el so maríu invade’l reinu nel añu 1111, obligándola a fuxir a Galicia. Nun queda coles manes en bolsu. Consciente de que la llexitimidá del so bandu taba n’entredichu, Urraca y l’obispu de Compostela proclamen rei a Alfonso Raimúndez a la edá de siete años, el fíu que tuviera nel matrimoniu anterior.

Los aragoneses terminaríen por ser espulsaos de Llión, hasta qu’en 1116 alcuérdase’l repudiu d’Urraca per parte d’Alfonso’l Batallador como alternativa al divorciu. La reina pudo pasar páxina, pero, con too, el so maríu nun foi la única piedra con la que zapicaría a lo llargo la vida. Les disputes de poder -tamién col fíu-, los intentos d’independencia de Portugal y el descontentu popular fixeron muezca na so autoridá, siempre cuestionada pola so condición de muyer. Urraca, de fechu, emulando a Cersei na famosa serie Xuegu de tronos, sobrevivirá a un tagayu de compostelanos furiosos que la deshonró públicamente llanzándola desnuda a una llamarga (posteriormente, la prudencia política torgó que decidiera quemar la ciudá).

Muerre en 1126 a los cuarenta y picu años, siendo eternamente maltratada poles cróniques y la lliteratura, atrincheraes nuna visión insultantemente machista y parcial sobre’l so reináu.

 

URRACA L’ASTURIANA (1133-1179)

Toos conocen a Pelayu, pero pocos saben que la última monarca d’Asturies foi una muyer.

«quando domina Urraca regina et dominus Alvarus Roderici voluerount quod perdisse dominus rex Fernandus Asturiis»

Nel cursu los sieglos, les referencies a Asturies van llimitase yá al territoriu al norte del cordal. Tal vez pola xeografía, tal vez porque cola nueva capital en Llión la nobleza asturiana ya nun lo vertía tanto, ésta va protagonizar dos intentos serios d’independencia de Llión.

El primer intentu tendrá llugar col fíu d’Urraca, Alfonso VII de Llión, de la mano del conde Gonzalu Pelaiz en trés ocasiones (1132, 1135 y 1137), hasta que’l rei cansa de tanto derrotalu-perdonalu y da-y patada a Portugal, territoriu que se marca una DUI frente Llión (mas de les de verdá). Pero mientres unes vacaciones dempués d’una de les sos campañes escontra’l conde, Alfonso enxendra una bastarda con una ayerana llamada Gontrodo. Frutu d’esta aventura va nacer Urraca (llamada, paradoxes de la vida, igual que so güela). Criada na corte llionesa y nun momentu d’alianza colos vascones, el casoriu con García Ramírez IV el Restaurador convertirála en reina de Navarra. Un braguetazu, pero cortín. Enviudó a los seis años

A la vuelta y pa nun revolver quiciabes colos asuntos navarros, so padre concéde-y el reinu d’Asturies (subordináu a Llión). ¿Pero de qué val tener un reinu pa una sola ensin naide al llau con quien compartilu? El segundu matrimoniu d’Urraca va ser con una golosina del occidente, nada menos que con Álvaro Rodríguez, el señor de Navia. El casu ye qu’en 1164, pocos meses dempués de la boda, tenten de xebrar Asturies del reinu de Llión. Porque toa pareya moza sabe aquello de que meyor el pisu en propiedá, que lo de vivir d’alquiler ye tirar les perres…

La cosa debió salir regular, ya que’l nuevu rei de Llión, so hermanastru Fernando II, pon fin al alzamientu en menos d’un añu y manda al matrimoniu a la Castiella de pensar.

A partir d’equí les noticies de la pareya son contradictories, unos dicen que morrieron en destierru, otros qu’Urraca tornó p’Asturies como monxa llueu d’enviudar por segunda vez. Seya como fore dambos recibieron sepultura na catedral de Palencia, u siguen tovía. Más nada se sabe de quien foi la postrer reina d’Asturies “stricto sensu”.


Castiellu de Soto (Ayer), xunto con Peḷḷuno, posible llugar de nacimientu d’Urraca l’Asturiana
Orixe del Antroxu

Orixe del Antroxu

El que mos visite nestes feches sorprenderáse de serguro al ver anunciáu el Carnaval pol nome d’Antroxu, o engurriará la cara al comprobar que llocalidaes como Nueva (en Llanes) celébrenlo ¡nada menos que’l 19 de marzu! Tranquilos, que too tien un por qué.

Cipriano el Hojalatero (Evaristo Valle, 1947)

Pa poder entendelo tornaremos a los díes de fiesta, fartura y escesos previos a la Cuaresma (Quadragesima, periodu de 40 díes previos a la Selmana Santa), qu’emprincipiaba’l Miércoles de Ceniza, momentu que los fieles recoyíense na austeridá y na reflexón, ayunando o abandonando’l consumu de carne. D’ehí la pallabra carnaval, del venecianu carnevale, de carne (carne) y levare (quitar).

Pero l’Antroxu (en delles partes; Antrueyu, Antruidu, Antroiru, Entroido…) nun tien res que ver col cultu cristianu. Remanez del llatín introitus (entrada), ya qu’antecedía al añu nuevu (solía escomenzar el mesmu día de Navidá), teniendo’l so orixe nes celebraciones campesines de la Europa pagana -como les Saturnales o Lupercales– armaes ente l’equinocciu d’iviernu hasta la primavera. Ello ye, en ciertu mou conmemorábase’l “nacimientu de la lluz”, cuando los díes empezaben a allargase, razón pola que tamién coinciden coles fiestes –cristianizaes- de Santa Llucía (20-23 d’avientu na Edá Media) y de La Candelaria o de la Lluz (2 de febreru). El ciclu agrariu reanudábase y la vida volvía a referver, pero había qu’ayudar a espertar a la tierra.

Esti ye l’aniciu, por cierto, de la curiosa tradición en delles zones del occidente asturianu de prender ramones de paya pa beneficiar la collecha; El Pachizu o Los Payones.

 

Asina, en munchos pueblos los vecinos amazcaraben, emprestándose a la fiesta y a la tresgresión, gastando bromes y faciendo sonar lloqueros. Esto venía acompañao tamién por banquetes abondosos y esaxeraos enantes de la Cuaresma, sobremanera de carne de gochu y de llambionaes (frixuelos, picatostes, casadielles…). Equí tenemos, asina, l’orixe de les célebres mazcaraes d’iviernu celebraes hasta la primavera, del nuesu verdaderu Antroxu.

‘Carnavalada de Oviedo’ (Evaristo Valle, 1928)

 

Y nun teníen llugar únicamente nes aldees, les pintures d’Evaristo Valle danmos testimoniu de la so celebración n’Uviéu. Tenemos constancia de L’Obispín, una mazcarada festexada dientro de la propia Catedral de San Salvador ente’l 18 d’avientu y los Santos Inocentes, o de personaxes tan pecuñares como La Destrozona, un varón vestíu de muyer que repartía escobazos a degüellu.

Otru testigu de l’Antroxu uvieín foi’l conocíu escritor carbayón Perfecto Fernández (Nolo), quien en 1906 recueye delles referencies na so obra “Veyures y Caxigalines”.

«¡Morrer tú?… Ha haber abondo
Pa que Xuanín ciarr’el güeyu
Sin ver d’isti añu les fiestes
Que se cellebren n’Uvieu
d’Antroxu les bullicioses
galanes de Samateu.»

Pero, ¡ai amigu! Col cleru topemos. La ilesia nunca nun vio con bon güeyu estes festividaes escandaloses, que tentó de restrinxiles por tolos medios a los díes previos al Miércoles de Ceniza (Xueves de Comadres, Domingu’l Gordu, Llunes y Martes d’Antroxu), anque nun siempre con éxitu. Foi la so prohibición tres la Guerra Civil lo que realmente determinó la so desapaición.

15961245149_f0172d8342_z

El Guirria de Ponga (fotografía: Desdeasturias.com)

Cola llegada de la Democracia munchos conceyos rescataron l’Antroxu, pero la influyencia de la televisión afitó’l referente nel Carnaval de Brasil, de Cádiz o de Tenerife, escaeciendo la tradición asturiana. Güei menos d’una decena d’estes mazcaraes sobrevivieron, cuasi toes recuperaes. Ye’l casu de Los Sidros y Les Comedies (Valdesoto, Siero), El Guirria (San Xuan de Beleño, Ponga), Os Reises d’El Valledor (Ayande), Os Reises de Tormaleo (Ibias), Los Zamarrones de Ḷḷena, Los Aguilandeiros de San Xuan de Villapañada (Grau) y Los Guilandeiros de Tinéu.

Otres, como Los Bardancos de Casu, Las Comparsas de Quirós, Los Aguilanderos de Xedré o La Puela o Los Zaparrastros de Ayer alcuéntrense n’hibernación, esperando ser retomaes polos sos vecinos.

antroxu

“Les Mazcaraes n’Asturies” (diseñu: Denis Soria)

Antroxando pallabres…

Nesti ambiente de folixa y socarronería nun faltaben los cantares y les coples inda presentes na tradición oral. Les más d’elles anónimes, anque entá conservamos l’autoría de dalgunes como les del popular Antón el Coque, resucitaes pol cantante Jerónimo Granda en 1977.

 

Por eso son tan valiososos estos otros versos recitaos por Araceli Noval, vecina d’Oles (Villaviciosa), porque amuesen la cara más instrospectiva del Antroxu, la más sobria y moralizante.

 

Conque non, si mos averamos a la so historia, L’Antroxu nun ye namás una fiesta de disfraces. Baxo la mázcara, llatente, escuéndese esi pulsu eternu ente’l llume que s’abre pasu baxo la fría calma de lo qu’un día foi primavera, convertíu asina nel ciclu mesmu de la vida.

La *xuventú ye folixa, ye diversión, ye folgueta.
Les penes y desengaños quédense pa la vieyera.
Vosotros sois l’Antroxu, nosotros la Cuaresma.

La lienda de la ponte del beisu de Ḷḷuarca

La lienda de la ponte del beisu de Ḷḷuarca

Sobre l’orixe de la lienda más conocida de la villa blanca

Asturies ye un país arrogante n’histories, calistraes davezu pol arume de los sos montes y viesques, del so mar o de la so sidra, pos na monotonía de los díes grises munchos de los nuesos cuentos y seres mitolóxicos xorrecieren al calor de la lleña, cuando non del alcohol…

Eso sábenlo bien los vecinos de la villa de Ḷḷuarca, que nun desaprovechen la ocasión pa rellatar con arguyu la lienda del pirata Cambaral, asocedida nel tiempu en que pirates berberiscos y otros malfechores afaraben les costes gallegues y asturianes al envís d’afogar la so sede en sangre y gafos vicios. El de más sonadía foi’l vil Cambaral, conocíu pola so crueldá y que tevo la osadía d’atacar la redolada de Ḷḷuarca. Pa la so mala fortuna, no más alto d’esta villa vivía’l señor de La Telaya, un home de gran inxeniu que llogró entama-y una bona, faciendo pasar a los sos homes por pescadores, y prindando al pirata dempués d’una dura batalla.

Enllenu de mancadures al berberiscu metiéronlu presu nes mazmorres de La Telaya a la espera de xusticia. La lienda repara, sicasí, na fía del señor de Ḷḷuarca, una rapacina con una pureza y piedá que la llevaron hasta los barrotes de la cárcele pa curiar les feríes de Cambaral. Cuando cruciaron les sos miraes pela primer vez, l’amor surdió cola mesma intensidá qu’aquelles foles azotaes escontra los cantiles nes nueches de galerna. Foi por esa mesma pasión que fuxeron una nueche, cuidando sortiar la vixilancia de los guardies confiaos, pero non la de so padre.

En llegando al puertu, onde esperaba una barca, los amantes cuntaron tar a salvu y fundieron selino nun besu baxo la lluz de la lluna. Pero’l padre de la mocina, azotáu y borrachu pola ira, corrió a tarazar cola so espada les cabeces de los amantes, que cayeron xuntes besándose per siempre al fondu de la mar. De magar entós, el llugar va ser conocíu polos lluarquinos como la ponte del beisu, mientres qu’ún de los barrios más marineros y populares, El Cambaral, fixo suyu’l nome del pirata.

Arruñando daqué al redor del orixe de la historia, que munchos pensaron ancestral, El Cambaral nun ha interpretarse como un nome árabe, turcu o bereber, sinón qu’en realidá fai referencia a un llugar con presencia de cámbaros. Pero amás, Juan Antonio Martinez Losada, cronista oficial de Ḷḷuarca, atribúi l’autoría d’esta lienda nada menos qu’al escritor y periodista Jesús Evaristo Casariego, quien fore director del RIDEA y una persona dada a la fabulación, faciendo pasar munches de les sos creaciones lliteraries por liendes recoyíes supuestamente de la oralidá pa -quiciás- otorgar al so llugar de nacimientu de mayor nobleza. Queda demostrao, asina, que la lienda del pirata Cambaral y la ponte del beisu, tienen un orixe eruditu y bastante nuevu.

Al final, paez que delles de les nueses liendes más conocíes y espardíes nun tienen un brillu tan vieyu nin tan popular, anque ye verdá que dalgún perdió la cabeza por amor…