Por Denis Soria

Xosefa Xovellanos y Xove Ramírez nació en Xixón un 4 de xunu de 1745, añu y mediu dempués que so hermanu Gaspar. La folgada posición económica y política de la so familia contrasta cola traxedia que marcó la so vida personal; casada con Domingo González de Argandona, Procurador Xeneral en Corte del Principáu, treslládase a Madrid en 1769 onde criaría dos fíes que morreríen siendo tovía neñes. Pa encima, enviuda a la edá de 28 años, poco antes de dar a lluz a un tercer ñácaru que malpenes sobreviviría unos díes.

En 1779 vuelve a la casa paterna llueu de la muerte del padre pa ocupase de l’alministración de la propiedá familiar y poco dempués, en 1788, múdase a casa de so hermana (la condesa de Peñalba) n’Uviéu, ciudá onde se dedica a la formación de muyeres recluses y a obres diverses de caridá. Mentanto, la so vocación relixosa va esconsoñando hasta qu’en 1793 -diendo a la escontra del paecer de so hermanu Gaspar- decide ingresar nel Conventu de les Agustines Recoletes de Xixón, nelli llegaría a ser nomada priora. L’Argandona, como la conocíen cariñosamente, finaría ellí en 1807 (Arias Cabal, 1996).

Xosefa vivió nuna época (la segunda metá del sieglu XVIII) na que l’asturllionés yera entá l’idioma abrumadoramente mayoritariu de la población asturiana, pero relegáu yá como un estigma asociáu a la masa popular analfabeta y impropia de la comunicación formal y escrita. Nesti contestu diglósicu sorprende y muncho la existencia d’un círculu d’escritores d’influyencia neoclásica venceyaos a la Ilustración que -con too- apostaron por un usu cultu del asturianu na estaya lliteraria y qu’Álvaro Ruiz de la Peña bautizaría como la Xeneración del Mediu Sieglu (Mori, 2012). Aquella formaríenla; Benito de l’Auxa Manuel (1742-1814), Bruno Fernández Cepeda (1744-1803), Xosefa Xovellanos (17451807), Xuan González Villar (1746-1820) y Antón Balvidares Argüelles (1751-1792). Y yá a caballu de la lliteratura prerromántica quedaríen fuera d’esta xeneración los autores Teresa Escolástica Cónsul (c 1760-1834) y Benito Pérez Valdés (1751-1842)

Ye importante sorrayar que l’actividá poética de Xovellanos desenróllase a lo llargo de cuatro años namás, ente 1789 y 1793, teniendo tratu con dellos autores de la Xeneración del Mediu Sieglu, como yera’l casu de Xuan González Villar y -especialmente- de Antón de Balvidares, col que coincidía nes frecuentes tertulies poétiques organizaes na casa de los condes de Peñalba.

D’ente la so obra lliteraria conocida (namás cinco poemes) recoyemos equí La proclamación de Carlos IV, un verdaderu documentu históricu pel que, como una ventana al pasáu, podemos asomamos a los dos díes festexos celebraos el 10 de xineru de 1790. Descrito en boca d’un aldeanu, el so llinguaxe burllón amuesa una converxencia amañosa ente la soca tradicional cola perspectiva ilustrada. Y ye que’l mensaxe qu’enzarra’l poema, anque esti estractu nun lo recueya plenamente, nun ye otru que la crítica al lluxu y a la idolatría del monarca (De Lorenzo Álvarez, 1996).

 

Muncho me fuelgo, compadre,

afayate cabo en casa,

que traigo que te contar

arriendes d’una semana.

Magar m’echó a’quisti mundu

la madre de la mio alma

ñin vi ñin cuidara ver

cosa tan endremoniada.

Daca acá el to tabaqueru,

echaré una fungarada,

porque la mio garapiña

escaecióseme en casa.

Tan achochecidu estó

que ñon sé lo que me pasa.

 

Por fuxir de la doctrina

que’l mio cura predicaba,

de dir el domingo a Uviedu

tentóme la mala trampa,

y mal apenes llegue

fasta l’arcu qu’apiegaba

con aquelles monxes prietes

qu’enxamás salen de casa,

cuando tanta de la xente

perinda arriba anublaba,

que parecín les abeyes

cuando quieren fer la enxambra.

Por aquel caminón nuevo

que fasta Xixón llegaba,

tantos vivientes fervín

y tanta xente colaba,

que parecía un formigueru

cuandu daquién lu destapa.

Quixe cuidar contra min

si quiciabes Santolaya

habrá baxadu del cielo

y dirín a visitalla,

o si nes santes reliquies

se hubiés abrido aquella arca,

que desde qu’Oviéu ye Oviéu

ñon se vio descerraxada.

 

Sea lo que for, dixe yo,

que ñon m’importa migaya,

y así dexéme de cuentos

y, como quien va en volanda,

a empuxones y emburriones

llegué por fin a la plaza.

Mas aquí (¡válame Dios!)

toda la sangre se cuaya,

respíguenseme los pelos

y el fígado se trastaya.

Allí un home s’aflaquez

acullá utru s’estrapa

y, todos entrepolados,

naide de vivir cuidaba.

Dixe yo si el día del xuiciu

será naquesta semana.

Mas como ñon había visto

al antecristo ñin nada

d’otres coses que nos llibros

el mio cura arrellataba,

volvióseme l’alma al cuerpo

y tomé una polgarada.

Vi tanto del cortinaxe

por toda la balconada,

que parecía el día del Corpus

cuando’l sacramentu pasa.

Vi allí puestu un talanqueru

y por d’arriba una tapa

que parecía el cobertixu

que tengo na mio tenada.

 

El revoltixu de xente,

que ñon teñín sofitancia,

apertáu me teñín

como sardina en bañastra.

Quixo Dios que dio las tres

y cata aquí que s’entama

una recua de señores

estropellar pela plaza

enriba d’unos borricos

con tanta de la cintaya

per enriba del focicu,

del rabu y de la pelambra,

qu’aunque ellos no estaben gordos,

con aquellafiguranza

poníanse ensoberbecíos

bufando la espumaraxa

(que en cuerpo del diablo entre,

decía la mio Mariana).

A lo postreru de todo,

viene un señoretu en traza

con un vestíu raxón

y ena manu una palanca

con un trapequín colgando

que parecía moxiganga.

Al par d’illi utru venía

con la vestimenta llarga,

una peluca canosa

y una torga so la barba,

y entrambos na talanquera

se poxeron cara a cara.

Estábense allí finsaos

fasta que’l de la palanca

entamó a un llau y a utru

sacudilla y solmenalla,

y al propriu tiempu illi solu

a voz en gritu falaba.

Dixo que’l rei y la reina

era xente d’emportanza,

todos dixeron amen

y yo di una carcaxada.

 

A isti tiempu (esto faláu)

tanto ruxir de campanes,

de tiros y d’escopetes

esmarañó pela plaza,

qu’acabé de sandecer

sin poder falar palabra.

Apenes s’aposentó

cuando vieno otra bandada

de señores a caballu

y otra tanta llistonada.

A lo postreru venía

ún tan llombríu de cara,

tan endromáticu y tiesu,

qu’a todos apovaraba.

Tría al pie un par de mozacos

con casaca engalionada

y otro rodiáu de plumes

que corría que volaba.

¿Será quizá d’allá riba

d’onde se descuelga l’agua

cuando llueve? Embaxador

que viníes tres la embaxada,

¿de qué pal añu que vien

tenremos meyor añada?

¡Malamán! Ñon será esto,

sinón una patarata.

Pero, sea lo que for,

allá éllos–yos les habia.

Aposóse del borricu

y a la talanquera entama

y, faciendo l’avenienza,

de la palanqueta agarra.

A mio ver el trapequín

foi d’alguna valenciana

del gloriosu San Cerbián,

según se sopelexaba.

Después d’esti emparamentu

escaparen de la plaza

y tanta xente tras ellos

que quedóu fartu afloxada.

 

Yo, que ñon quexi correr,

como aquel que ñon fai nada,

arriméme hacia les pipes

per onde’l vinu manaba.

Allené la mio montera y

zampémelo ena panza,

mas como yera tan floxu

no m’escalentó migaya.

Andaba a un lladu y a otru

La xente empaporetada,

sin que hombre nin muyer

tratás de dir para casa.

Da lluego qu’atapeció,

tanta de la rellumbranza

por todes partes había,

que parecía de mañana.

Sin saber lo que facía,

fui allá cabo una casa

que tenía tantes coses

por toda la balconada,

qu’a mio ver col xubiléu

voltiósele la portada

y col forru para fuera

paró toda la xelada.

Había allí tantes de lletres

escribides como carta,

falando de doña Luisa,

de flores y rotilancia

y otres muches engulemes,

que’l diablu que les parllara.

 

Estaben dos soldadones

fiendo allí la espantayada,

como si quiciaes el rei

tuviera allí la morada.

Adientro, nun portalón,

había un fatu de canaya

d’hombrucos y de muyeres

que parecín de cuayada.

Estaben tan mal vestios

qu’enseñaben una ñalga,

los codos y los cadriles.

Sin falar una palabra,

ñin travesaben bucáu

ñin bebín gotera d’agua.

Si quiciabes teñín vida,

comió–yosla la xelada.

Fartéme d’estar mirando

esta xente esblanquiñada

y volví–yos la trasera

dándo–yos una risada.

Eché andar per ende alante,

di comigo n’otra casa

onde facíen tantu ruidu

como hai nuna esfoyaza.

Metíme nun rinconín

amirar lo que pasaba.

 

Vi tantes de señoretes

con tanta emburuyetada

enriba de la cabeza,

que parecía una altabaca

cuando les lleven a unfrir,

y per detrás–yos colgaba

tantos de los farrapiezos,

que fasta el culo llegaba.

Estaben elles argutes

y bien bebides, en mi alma,

collorades y parlleres y,

cuando algún les miraba,

rellambínse los dedicos

y facínse la guiñada

agarraes de les manes

como xente rellocada.

Tanto saltar y brincar

no e cosa mui acertada.

Dempués que me fartuqué

de ver tanta rellumbranza,

entrugué a un curaplayón

que cabu min allí estaba:

—¡Ah, señor! Agora diga

si quiciaes la santa casa

se ganó de los cristianos,

qu’hai aquí tanta folgancia.

Respondióme: —¡Calla, burru!

¿Ñon ves qu’esta emparayanza

ye porque dixu’l corréu

qu’hoi el rei se coronaba?

—¡Vaya, vaya! dixi yo,

que tan bona va la danza.

Cuando cudié sobre min,

vi que yá riscaba l’alba.

 

Eché a fuxir como un cuhete

y cuando llegué a mio casa

entamó la mio Mariana

roñar como una espritada.

Non quixe tornar a Oviéu,

aunque toda la semana

los xastres y zapateros

ñon daben una puntada.

Fixeron mil perversures,

mas diz que ñon valín ñada,

e yo, como sou sesudu

y hombre ansi de capa parda,

ñon me paro ña poqueza

qu’a otros munchos amoriaba.

 

Adiós, compadre, que voi

a estar ena mio quintana.

Fasta el martes en La Pola,

que vo a vender una vaca.

La ferviente historia del noble moscón que semó’l terror na Asturies del sieglu XIV

Por Denis Soria

La fin de la Edá Media trexo a la nuesa tierra una serie de cambios perfondos; al dir desplazándose los centros de poder a Llión primero y al Reinu de Castiella dempués, Asturies vive una situación d’aislamientu motivada pola esclusión de la nobleza asturiana na realidá política. Con too ello, les crisis económiques y la decadencia de la sociedá feudal europea propiciaron una atmósfera de delincuencia xeneralizada. Nos milenta caminos d’aquella Asturies escura y asilvestrada existíen dende recaldadores illegales qu’estafaben a los mercaderes esixendo portalgos desorbitaos, hasta otros que directamente asaltaben a espada y cuchiellu a los viaxeros, que podíen perder la bolsa o l’honor nel meyor de los casos, o la vida nos más.

Y ye equí onde entra’l nuesu Gonzalu Peláiz, qu’a pesar del nome nun tien nada que ver con aquelli que se sublevara en 1132 contra’l rei de Llión en pro -paez ser- de la independencia d’Asturies. Esti conde, el de Cuaya, que yera analfabetu a conciencia y más feu qu’una nevera per detrás, nació en Villanueva (Grau) a últimos del sieglu XIII. Yá dende mozu empezó a cobiciar la villa de Grau, que tentó de tomar pola fuercia en dalguna ocasión. La cosa prometía. Esta pola taba baxo reguengu (ello ye, baxo xurisdicción directa del rei de Castiella), asina que cuando Fernando IV -con diez años namás- accede al tronu en 1295, Peláiz aprovecha la minoría d’edá del monarca y solicita la concesión de la villa. Los moscones, conocedores de los antecedentes del conde, dixeron que nin de Blas y unviaron una comitiva a la corte evitando les sos pretensiones.

Pero como Gonzalu Peláiz nun lo tomó mui bien, decidió cafiar tolo que pudo; afaró les tierres y aldees del conceyu y aniquiló a tol qu’entraba o salía de les muralles de la pola de Grau. Ansí, por más que los vecinos de la villa defendieren el so llar acérrimes, el comerciu y l’agricultura apararon dafechu, poniéndolos nuna situación realmente desesperada. Ello llevólos -en 1301- a rogar auxiliu al rei de Castiella, qu’inora la petición y más tarde al conceyu d’Uviéu, que nun-yos lu da por mor del conflictu ente l’Obispu de San Salvador (Fernando Gonzali) y el so Cabildu colos vecinos de la ciudá. Informáu Cuaya, amplía les sos malfetríes al alfoz d’Uviéu y al valle del Nora usando como resorte la fortaleza de Priorio (el rei Fernando IV ordenaría valtala, en devanéu, nel añu 1306) combalechándose col obispáu y compartiendo cola mitra’l botín de los sos crímenes.

Y como si too ello nun-y bastare, na nueche del 1 de marzu de 1308 llanza un ataque por sorpresa sobre Grau. Esta vez llogra trevesar les muries, masacra a cuasi tola población y priende fueu a la villa primero de tornar pa Cuaya col productu del saquéu. Persabiendo del desentendimientu del monarca castellanu con Asturies y en vengación por negase aquelli a reconoce-y “los sos derechos” sobre Grau, toma’l castiellu quirosanu d’Aguilar (de propiedá real) díes dempués.

La indignación de los asturianos arrama’l vasu y dalgunos homes d’armes d’Uviéu, más otros de los conceyos vecinos, axúntense a los supervivientes de la quema de Grau y alcuerden poner sitiu a la plaza onde s’alcontraba’l conde. Pero nun foi l’amenaza de les milicies conceyeres lo que-y fixo abandonar la torre, sinón el socorru oportunu del obispáu carbayón, quien -engarráu colos siervos y comerciantes de la capital- entréga-y oficialmente los baluartes de Priorio y Tudela xunto col Cotu de Lluniego y bien de refuerzos militares.

Nun yera (el castiellu de Tudela) pocu choyu. Anque nel solar qu’antaño ocupó güei malpenes queden unes poques piedres amontonaes con poca xuxa, yera daquella una de les fortaleces más imponentes d’Asturies. Amás, asitiábase nuna ubicación estratéxica; guardando’l Cotu de Lluniego y a la entrada mesma de la capital asturiana, onde toles recues de mercaderes que veníen del camín de Castiella pagaben portalgu.

Los asaltos a les caravanes nun se fixeron esperar, interrumpiendo’l comerciu de la ciudá per meses. Y como la pela és la pela, los uvieínos nun diben quedar coles manes en bolsu mientres Cuaya facía lo que-y pegaba la gana. Accedieron a contratar a un mercenariu pa facer frente al conde; Suer del Dado, un ayerán que tenía -xunto colos sos homes- sonadía de ser el meyor guerreru d’ente la brava nobleza asturiana. En pocos meses consiguen caltener a Peláiz a raya y restablecer el comerciu. Uviéu aprovecha l’impasse pa firmar -el 21 d’ochobre de 1309- una Carta de Xermandía con Grau. Esta alianza permitirá-yos organizar meyor l’ayuda militar, polo qu’al poco contraten a otru noble batallador; Suer Menendi de Valdés. Resulta interesante que fore precisamente un Valdés el que punxera les armes al serviciu de los conceyos, pos Valdés yera tamién la segunda muyer de Cuaya; Urraca Suari (vilba de Menén Suari de Valdés), que volviera casar col polémicu Don Gonzalu obligada de xuru polos problemes financieros que llevaba arrastrando.

Nos seis años siguientes tien llugar una auténtica guerra civil ente’l bandu laicu (la causa de los conceyos) y l’eclesiásticu (representáu pol obispáu d’Uviéu y el Conde de Cuaya) hasta que -por fin- la rexente del recién coronáu Alfonsu XI, María de Molina, unvia una carta al Obispu de San Salvador y al so Cabildu poniéndolos pingando y esixéndo-yos que retiraren l’apoyu a Gonzalu Peláiz.. Al tiempu, manden al Comenderu Real (Rodrigu Álvariz de les Asturies, conde de Noreña) pa encargase del gobiernu del país.

Llega Rodrigu a terrén d’Asturies cola seña real y bien llueu acuden al so llau les milicies conceyeres que planten cara a Peláiz hasta que llogren neutralizalu nel castiellu de Tudela. El sitiu dura cuatro meses y empléguense pa ello máquines de guerra que’l Comenderu solicita a les autoridaes uvieines, desafiando’l requerimientu interpuestu pol Obispu pa que los fierros et cuerdas del Engenio nun salieren de la capital.

Por fin, na primavera de 1316 les tropes tomen la plaza. Enteraos los de Grau, y fartos yá de tantos años de calamidaes, entren nes tierres de Cuaya tronzando y quemando tolo que pillen. Pero como mala yerba nunca muerre, Gonzalu Peláiz escapa en dalgún momentu del asediu y exiliáse en Navarra -piénsase- hasta la so muerte.

Nos meses que siguieron a la toma de la fortaleza Rodrigu Álvariz, quien complementaría’l gobiernu d’Asturies cola llucha contra los musulmanos de Granada, ordena confiscar les propiedaes de Gonzalu y valtar el baluarte de Tudela pa evitar que sirviere de puntu d’apoyu pa futuros llevantamientos contra la corona. Quién diba pensar que vaiga ser so fíu adoptáu, Enrique de Trastámara (bastardu d’Alfonso XI), el que prienda la mecha n’Asturies dando pasu a la Guerra Civil Castellana (1351-1369) y dalgunos años más tarde’l so nietu; Alfonso Enríquez el que se subleve contra so tíu, Juan I de Castiella, hasta la toma de Xixón en 1395. Pero en fin, d’ello falaremos otru día.

Volviendo al nuesu conde preferíu, ye evidente qu’esti personaxe debió dexar una güelga bien fonda nos moscones pa que, siete sieglos dempués, la so alcordanza siga tovía viva na tradición oral del conceyu de Grau.

Como vemos, el mitu del prototipu de caballeru feudal empáticu y bonable colos sos súbditos, a los que protexía de bárbaros y cuélebres, ye una falacia. El medievu foi una dómina na que les élites politiques nun duldaben n’aprovechar la so situación pa satisfacer los sos placeres mundanos pasando penriba del bientar de la xente del común. Una época na que la desigualdá y corrupción taben a la orde del día… Por desgracia, dende la Edá Media poco cambiemos como sociedá nesi sen.

Seis propuestes asturianes pa los llocos de los quesos

Por Denis Soria

Toos conocen el Quesu Cabrales, pero con una tradición ganadera milenaria que se remonta a les tribus astures, la mancha quesera más grande d’Europa ofrez munches más alternatives pal nuesu paladar. Asturies ye’l país de los 40 quesos. Güei trayémosvos seis d’ellos.

1. Quesu Casín

Esti quesu debe’l nome al conceyu de Casu, nel valle altu del Nalón, anque la so producción abarca tamién Sobrescoyu y Piloña, conceyos qu’integren la DOP. Ellabórase con pasta amasao a partir de lleche crudo de vaca casina, una raza autóctona del monte asturianu. Piénsase que ye ún de los más antigos, pos ta documentáu dende’l sieglu XIII.

Ye un quesu de tastu fuerte y mantecosu. La so particularidá reside en que, una vuelta desuerao, amásase formando gorollos que se dexen reposar unos díes pa dempués pasalos per una máquina de rabilar cuantes veces se queria aumentar el picor y la intensidá del sabor. Finalmente, grábense con un marcu de madera al envís d’identificar la quesería.

Cuenta con cuatro queseríes: Ca Llechi, El Viejo Mundo, Quesería Reciegos y La Corte (les dos últimes vistables). Amás, la fin de selmana postrera d’agostu tien llugar el Certame del Quesu Casín nos altos de La Collá d’Arniciu (Casu), un momentu afayadizu pa conocer les últimes novedaes y esfrutar d’unes vistes bien guapes al Parque Natural de Redes.

2. Quesu Gamonéu

Ellaborao nos conceyos de Cangues d’Onís y Onís, ye ún de los trés quesos azules que se faen nel entornu de los Picos d’Europa. El so tastu ye asemeyáu daqué al Cabrales, pero’l preciu nun tien res que ver. Ello ye que la so producción ye muncho más pequeña y artesanal.

Lo que lo fai tan especial ye tanto’l so afumáu como la so curación en cueva, ente dos y cinco meses, que consigue una consistencia semidura, con manches de penicilium espardíes pela corteya y un sabor penetrante. Ellabórase a partir de lleche de vaca, oveya y cabra, si bien nel casu del quesu Gamonéu del Puertu han mecese a lo menos dos tipos de lleche (mínimu un 10% la d’ovín y/o caprín). La producción d’esta variedá acútase a los meses de primavera y branu, tiempu de pastoréu nes vegues y mayaes, razón pola que ye más cotizada que la del Gamonéu del Valle.

Con cerca de 18 queseríes inscrites na DOP, tolos 23 d’ochobre celébrase en Benia, capital del conceyu d’Onís, el Certame del quesu Gamonéu, que s’allarga a la fin de selmana.

3. Quesu de Los Beyos

Con Indicación Geográfica Protexida (IPG), produzse nos conceyos asturianos de Ponga y Amieva y nel llionés d‘Oseya de Sayambre. El so nome vien del escobiu de Los Beyos.

El quesu de Beyos puede ellaborase con lleche de vaca, cabra y oveya, magar qu’ensin amestar. Ye un quesu cremoso, fácil d’esfaraguyar al corte y daqué acedo, más intensu nos d’oveya y de cabra, y más suave nos de vaca.

Existen trés certámenes d’esti quesu:

• San Xuan de Beleño (Ponga): Domingu últimu de mayu.
• Amieva: Primer sábadu de xunu.
• Oseya de Sayambre (Llión): Ochobre.

4. Quesu Pría

Propiu de la parroquia costera de Pría, nel conceyu de Llanes, esti quesu tien lo singular de ser ellaborao con lleche de vaca y mantega d’oveya. De les sos muches variedaes, la más demandada ye’l famosu ḥumáu de Pría, un quesu afumao con madera de carbayu, tienro, de tastu semidulce y prestosu.

5. Quesu picón

Ye ún de los quesos más enigmáticos d’Asturies y, a xulgar pola so ellaboración, de los más antigos. La so producción ye doméstica cuasi dafechamente, arrequexada al monte meridional asturianu, onde tien nomes distintos y variaciones según el conceyu: queisu de fonte, queisu d’odre, queisu de bota o queixu de vexiga en Quirós, Proaza y Somiedu, quisu picón en Ḷḷena y quisu d’Urbiés nel valle de Turón (Mieres).

Trátase d’un quesu fecho a base de calostru o caliestru (lleche de vaques paríes de recién), poco graso, pastoso y cremoso, ideal pa untar. El so sabor nun ye aptu pa tolos gustos, pos ye particularmente intensu y picante, motivu pol qu’en delles cases suelen amestar cantidaes pequeñes d’aguardiente de miel o mantega, p’amatagar l’acidez.

Anque una vuelta cuayada la masa puede desuerase en fardeles de tela, en dellos pueblos siguen faciéndolo en pelleyes de corderu o cabritu, onde se dexa formentar al calor del llume de la cocina pa que sude’l sueru. Trés meses más tarde pásase a una fonte o tarreña onde se remueve a lo llargo d’ocho meses pa que’l mofu de la superficie s’esparda de manera homoxénea.

Esti quesu en peligru de desaniciu ye enforma difícil de mercar, conque lo recomendable ye acudir a les distintes feries:

• Certame del Quesu d’Urbiés (Mieres): Segundu domingu de xunu.
• Certame del Quesu de Bota (Bermiego, Quirós): Primeros de xunu.
• Certame del Quesu de Fonte (Proaza): Primeros de febreru.

6. Quesu Afuega’l Pitu

Al empar que’l Casín, ye ún de los quesos asturianos más antigos, y de fechu ta documentao como moneda de pagu d’impuestos nel sieglu XVIII. Faise con lleche de vaca carreña o frisona en pequeñes caseríes, si bien antaño la so producción taba presente en cuasi tolos conceyos ente’l Narcea y el Seya. Poseye la so propia DOP de magar el 2008.

L’orixe del so nome, raru cuanti si más, dio llugar a interpretaciones alloriaes. Pa unos el nome alude a que, al tragar, la so testura pastosa apégase al paladar y al gargüelu, como un pitu. Otros defenden que se debe al procesu de desueráu de la variedá de puñu, na que s’afuega’l trapu o fardela pa recudir primero d’engolala.

El quesu Afuega’l Picu preséntase en trés modalidaes, curaos, semicuraos o tienros y hasta cuatro variedaes en función de la so forma: Atroncáu blancu, de forma troncocónica, de color blancu y ensin amasar o Atroncáu roxu, de forma troncocónica, con pimentón (lo que-y da un color encarnáu) y amasao. Les otres variedaes son de trapu o de puñu, Trapu blancu y Trapu roxu, que s’estremen de les anteriores pola so forma ronda y pol desueráu en trapos o fardeles.

El certame más importante d’estu quesu tien llugar a últimos de xineru en La Foz (Morcín), onde participen delles queseríes llegaes de diferentes conceyos: Tinéu (Tierra de Tineo), Salas (Valle del Narcea, Agrovaldés, El Viso y La Arquera) Grau (Ca Sanchu, Borbolla y Temia), Pravia (La Peñona y Rey Silo) y Morcín (La Figar).