CUIDEIRU

Pali pali diremos ascendiendo peles sos caleyes hasta algamar Cimavilla y el barriu d'El Trasgu, dende onde acolumbraremos unes vistes perguapes de los barcos y lanches del so puertu o de los sos barrios coloríos (El Tolombréu, Llapozu, La Telaya, La Furmiga…), asina como del llugar u s'emplazaba l'antigu faru de La Casa’l Fuau. Pero nun marcharemos ensin conocer El Baluarti, cola so ilesia gótica de San Pedru, realmente única.

P'acabu, descubriremos les liendes marineres frente la enigmática Fonti’l Cantu y falaremos de la so rellación con San Pedru (29 de xunu) y la multitudinaria fiesta de L’Amuravela, declarada Bien d’Interés Turísticu Nacional en 1979, un sermón laicu cargáu d'humor, y una oportunidá única de sentir l'asturllionés del Baxu Nalón del que daremos delles pincelaes d'una forma amena y gayaspera.

Pero muncho se dixo y se diz sobre los pixuatos, especialmente acerca del so orixe nos vikingos qu'afararon les costes europees hai un mileniu y -supuestamente- asentaos equí o alredor de la so fala, distinta al restu y estrada de pallabres de raigaños nórdicos. Una lienda que cobró fuercia nos caberos años seducida pola épica de les noveles y les series de televisión. Sicasí, ¿qué hai de verdá en too esto? ¿Existe un dialectu pixuatu? Y… ¿Son realmente los sos vecinos descendientes de los normandos?