fbpx

Curiosidaes

Orixe del Antroxu

Posted by on | Featured

El que mos visite nestes feches sorprenderáse de serguro al ver anunciáu el Carnaval pol nome d’Antroxu, o engurriará la cara al comprobar que llocalidaes como Nueva (en Llanes) celébrenlo ¡nada menos que’l 19 de marzu! Tranquilos, que too tien un por qué.

Cipriano el Hojalatero (Evaristo Valle, 1947)

Pa poder entendelo tornaremos a los díes de fiesta, fartura y escesos previos a la Cuaresma (Quadragesima, periodu de 40 díes previos a la Selmana Santa), qu’emprincipiaba’l Miércoles de Ceniza, momentu que los fieles recoyíense na austeridá y na reflexón, ayunando o abandonando’l consumu de carne. D’ehí la pallabra carnaval, del venecianu carnevale, de carne (carne) y levare (quitar).

Pero l’Antroxu (en delles partes; Antrueyu, Antruidu, Antroiru, Entroido…) nun tien res que ver col cultu cristianu. Remanez del llatín introitus (entrada), ya qu’antecedía al añu nuevu (solía escomenzar el mesmu día de Navidá), teniendo’l so orixe nes celebraciones campesines de la Europa pagana -como les Saturnales o Lupercales– armaes ente l’equinocciu d’iviernu hasta la primavera. Ello ye, en ciertu mou conmemorábase’l “nacimientu de la lluz”, cuando los díes empezaben a allargase, razón pola que tamién coinciden coles fiestes –cristianizaes- de Santa Llucía (20-23 d’avientu na Edá Media) y de La Candelaria o de la Lluz (2 de febreru). El ciclu agrariu reanudábase y la vida volvía a referver, pero había qu’ayudar a espertar a la tierra.

Esti ye l’aniciu, por cierto, de la curiosa tradición en delles zones del occidente asturianu de prender ramones de paya pa beneficiar la collecha; El Pachizu o Los Payones.

 

Asina, en munchos pueblos los vecinos amazcaraben, emprestándose a la fiesta y a la tresgresión, gastando bromes y faciendo sonar lloqueros. Esto venía acompañao tamién por banquetes abondosos y esaxeraos enantes de la Cuaresma, sobremanera de carne de gochu y de llambionaes (frixuelos, picatostes, casadielles…). Equí tenemos, asina, l’orixe de les célebres mazcaraes d’iviernu celebraes hasta la primavera, del nuesu verdaderu Antroxu.

‘Carnavalada de Oviedo’ (Evaristo Valle, 1928)

 

Y nun teníen llugar únicamente nes aldees, les pintures d’Evaristo Valle danmos testimoniu de la so celebración n’Uviéu. Tenemos constancia de L’Obispín, una mazcarada festexada dientro de la propia Catedral de San Salvador ente’l 18 d’avientu y los Santos Inocentes, o de personaxes tan pecuñares como La Destrozona, un varón vestíu de muyer que repartía escobazos a degüellu.

Otru testigu de l’Antroxu uvieín foi’l conocíu escritor carbayón Perfecto Fernández (Nolo), quien en 1906 recueye delles referencies na so obra “Veyures y Caxigalines”.

«¡Morrer tú?… Ha haber abondo
Pa que Xuanín ciarr’el güeyu
Sin ver d’isti añu les fiestes
Que se cellebren n’Uvieu
d’Antroxu les bullicioses
galanes de Samateu.»

Pero, ¡ai amigu! Col cleru topemos. La ilesia nunca nun vio con bon güeyu estes festividaes escandaloses, que tentó de restrinxiles por tolos medios a los díes previos al Miércoles de Ceniza (Xueves de Comadres, Domingu’l Gordu, Llunes y Martes d’Antroxu), anque nun siempre con éxitu. Foi la so prohibición tres la Guerra Civil lo que realmente determinó la so desapaición.

15961245149_f0172d8342_z
El Guirria de Ponga (fotografía: Desdeasturias.com)

Cola llegada de la Democracia munchos conceyos rescataron l’Antroxu, pero la influyencia de la televisión afitó’l referente nel Carnaval de Brasil, de Cádiz o de Tenerife, escaeciendo la tradición asturiana. Güei menos d’una decena d’estes mazcaraes sobrevivieron, cuasi toes recuperaes. Ye’l casu de Los Sidros y Les Comedies (Valdesoto, Siero), El Guirria (San Xuan de Beleño, Ponga), Os Reises d’El Valledor (Ayande), Os Reises de Tormaleo (Ibias), Los Zamarrones de Ḷḷena, Los Aguilandeiros de San Xuan de Villapañada (Grau) y Los Guilandeiros de Tinéu.

Otres, como Los Bardancos de Casu, Las Comparsas de Quirós, Los Aguilanderos de Xedré o La Puela o Los Zaparrastros de Ayer alcuéntrense n’hibernación, esperando ser retomaes polos sos vecinos.

antroxu
«Les Mazcaraes n’Asturies» (diseñu: Denis Soria)

Antroxando pallabres…

Nesti ambiente de folixa y socarronería nun faltaben los cantares y les coples inda presentes na tradición oral. Les más d’elles anónimes, anque entá conservamos l’autoría de dalgunes como les del popular Antón el Coque, resucitaes pol cantante Jerónimo Granda en 1977.

 

Por eso son tan valiososos estos otros versos recitaos por Araceli Noval, vecina d’Oles (Villaviciosa), porque amuesen la cara más instrospectiva del Antroxu, la más sobria y moralizante.

 

Conque non, si mos averamos a la so historia, L’Antroxu nun ye namás una fiesta de disfraces. Baxo la mázcara, llatente, escuéndese esi pulsu eternu ente’l llume que s’abre pasu baxo la fría calma de lo qu’un día foi primavera, convertíu asina nel ciclu mesmu de la vida.

La *xuventú ye folixa, ye diversión, ye folgueta.
Les penes y desengaños quédense pa la vieyera.
Vosotros sois l’Antroxu, nosotros la Cuaresma.

La lienda de la ponte del beisu de Ḷḷuarca

Posted by on | Featured

Sobre l’orixe de la lienda más conocida de la villa blanca

Asturies ye un país arrogante n’histories, calistraes davezu pol arume de los sos montes y viesques, del so mar o de la so sidra, pos na monotonía de los díes grises munchos de los nuesos cuentos y seres mitolóxicos xorrecieren al calor de la lleña, cuando non del alcohol…

Eso sábenlo bien los vecinos de la villa de Ḷḷuarca, que nun desaprovechen la ocasión pa rellatar con arguyu la lienda del pirata Cambaral, asocedida nel tiempu en que pirates berberiscos y otros malfechores afaraben les costes gallegues y asturianes al envís d’afogar la so sede en sangre y gafos vicios. El de más sonadía foi’l vil Cambaral, conocíu pola so crueldá y que tevo la osadía d’atacar la redolada de Ḷḷuarca. Pa la so mala fortuna, no más alto d’esta villa vivía’l señor de La Telaya, un home de gran inxeniu que llogró entama-y una bona, faciendo pasar a los sos homes por pescadores, y prindando al pirata dempués d’una dura batalla.

Enllenu de mancadures al berberiscu metiéronlu presu nes mazmorres de La Telaya a la espera de xusticia. La lienda repara, sicasí, na fía del señor de Ḷḷuarca, una rapacina con una pureza y piedá que la llevaron hasta los barrotes de la cárcele pa curiar les feríes de Cambaral. Cuando cruciaron les sos miraes pela primer vez, l’amor surdió cola mesma intensidá qu’aquelles foles azotaes escontra los cantiles nes nueches de galerna. Foi por esa mesma pasión que fuxeron una nueche, cuidando sortiar la vixilancia de los guardies confiaos, pero non la de so padre.

En llegando al puertu, onde esperaba una barca, los amantes cuntaron tar a salvu y fundieron selino nun besu baxo la lluz de la lluna. Pero’l padre de la mocina, azotáu y borrachu pola ira, corrió a tarazar cola so espada les cabeces de los amantes, que cayeron xuntes besándose per siempre al fondu de la mar. De magar entós, el llugar va ser conocíu polos lluarquinos como la ponte del beisu, mientres qu’ún de los barrios más marineros y populares, El Cambaral, fixo suyu’l nome del pirata.

Arruñando daqué al redor del orixe de la historia, que munchos pensaron ancestral, El Cambaral nun ha interpretarse como un nome árabe, turcu o bereber, sinón qu’en realidá fai referencia a un llugar con presencia de cámbaros. Pero amás, Juan Antonio Martinez Losada, cronista oficial de Ḷḷuarca, atribúi l’autoría d’esta lienda nada menos qu’al escritor y periodista Jesús Evaristo Casariego, quien fore director del RIDEA y una persona dada a la fabulación, faciendo pasar munches de les sos creaciones lliteraries por liendes recoyíes supuestamente de la oralidá pa -quiciás- otorgar al so llugar de nacimientu de mayor nobleza. Queda demostrao, asina, que la lienda del pirata Cambaral y la ponte del beisu, tienen un orixe eruditu y bastante nuevu.

Al final, paez que delles de les nueses liendes más conocíes y espardíes nun tienen un brillu tan vieyu nin tan popular, anque ye verdá que dalgún perdió la cabeza por amor…

Tags: , , , ,

Orixe y significáu de la bandera asturiana

Posted by on | Featured

Por Denis Soria

Ye’l símbolu más poderosu d’Asturies, el que mos fai visibles como pueblu, como identidá. Amosada con arguyu en viaxes y celebraciones, nunca nun foi difícil reconocer el coche d’un asturianu, pero pocos conocen la so historia…

Bandera asturiana. Fotografía: EL COMERCIO

 

¿Cuándo se crea la bandera d’Asturies?

En 1794, cuando’l Marqués de Camposagrado consultó a Xovellanos sobre l’escudu que debía portar el reximientu de nobles asturianos. Nuna carta espuesta güei na Xunta Xeneral, l’ilustráu va proponer l’emblema de los reis astures emplegáu primero de mudar la capital a Llión: la Cruz de la Victoria.

Yera esa mesma cruz de madera que portara Pelayu, según la lienda, na batallla de Cuadonga y qu’Alfonso III mandara recubrir d’oru y piedres precioses nel añu 908. Esa mesma que se conserva dende hai más de mil años na catedral d’Uviéu y que ta representada en dellos edificios prerrománicos. ¡Cuidadín! Enantes qu’eso, el reinu d’Asturies enxamás nun tuviere una bandera, pos los emblemes yeren símbolos que s’identificaben namás colos reis. Ye de magar el sieglu XVIII cuando escomienza a cuayar la idea de que la nación trescendía al monarca.

Basta pues para fixar el blasón de Asturias haber indicado la insigna de que nuestros reyes usaron como divisa propia. Fundado el reyno de León esta divisa se hizo si no más propria, más peculiar de Asturias (…)

 

¡L’omega siempre minúscula!

Le lletres alpha y omega qu’engolen de los sos brazos simbolicen el principiu y fin de toles coses, la eternidá.

[Apocalipsis, 1-8: “Yo soi l’Alpha y l’omega, diz el señor Dios; el que ye, el que yera, el que vien, el toupoderosu”.]

Lo qu’a munchos se-yos escapa, inclusive a Xovellanos, ye que l’omega ha ser SIEMPRE minúscula, ya que figura d’esta manera en toles sos representaciones en tiempos del reinu de los astures. Sicasí, l’error de poner dambes lletres en mayúscula foi recurrente a lo llargo de la historia.

Inscripción del palaciu d’Alfonso III (Uviéu)

 

El color de la bandera ye azul… o encarnao

Xovellanos recueye dambos colores como válidos, anque la oficial reconoza l’azul namás.

«(…) pudiera serlo también en representación y colocarse en campo de gules o encarnado según Díaz del Valle.»

Sala Constitución de la Xunta Xeneral d’Asturies. Fotografía: Xunta Xeneral d’Asturies

La primer vez que s’isó foi…

El 25 de mayu de 1808, en plena invasión francesa. Esi día, la Xunta Xeneral d’Asturies proclámase soberana, declara la guerra a Napoleón y crea l’Exércitu Defensivu Asturianu, pal que necesitaben dotar d’una bandera. La Xunta echa mano entós del informe de Xovellanos, optando pol color azul y amestándo-y el lema «Asturias nunca vencida».

Tiempu dempués, “l’azuleste” -como la llamaría l’escritor Fernán Coronas- va ser emplegada tímidamente nos escudos de l’autoridá provincial dende 1857, anque consta’l so usu en celebraciones y mítines a lo llargo del sieglu XIX y primeros del XX. Llegada la Guerra Civil, la cruz y el lleón son reproducíos nos emblemes del Conseyu Soberanu presidíu por Belarmino Tomás.

Milicia provincial d’Uviéu (“La Asturias Guerrera”, J.E.Casariego).
Vidreres de la Xunta Xeneral. Fotografía: Xunta Xeneral d’Asturies.

 

¿Y en democracia?

La primer bandera d’Asturias exhibida llueu de la dictadura franquista foi fecha en 1976 por Amelia Valcarcel, quien afirmó portala pela primer vegada nel Día de la Cultura celebráu na carbayera de Los Maizales.

Al añu siguiente, un 21 d’abril de 1977, Avilés tornaríase nel primer conceyu qu’isó la bandera asturiana oficialmente, gracies a la iniciativa del colectivu asturianista Conceyu Bable. Finalmente, La oficialidá pa la bandera nun va aportar hasta la aprobación de la Llei de la bandera de 1990.

 

«Bable a la escuela, autonomía rexonal», manifestación del 22 de xunu del 1976.
Tags: , , , , ,

5 tradiciones asturianes de la Nueche d’Ánimes

Posted by on | Featured

Repasamos los mitos y tradiciones anteriores al Halloween más comunes n’Asturies

Va pocu tiempu, les tradiciones yeren un elementu d’identidá perimportante, de refuerzu d’una comunidá normalmente agrícola. Ye lóxico que col refalfiu del Halloween a munchos mos asalte una sensación de vacíu énte una celebración que tien al consumu y la ostentación como intención cimera. Y ye que la nuesa sociedá tovía nun tien los dos pies fuera d’esi mundu campesín, un mundu marcáu pol ritmu de les estaciones. Asina, sabemos que los gaélicos (irlandeses) conmemoraben, tres la collecha, el Samain (lliteralmente, el «final del branu»). Y anque presuponemos qu’otros pueblos célticos cuntaben con festividaes asemeyaes, nun hai abonda documentación al respective. Per otru llau, Manuel P. Villatoro señala que los romanos, tamién un pueblu indoeuropéu, honraben esi día a la diosa Pomona, la deidá de la seronda y de les mazanes. Col Papa Gregorio III vieno la cristianización, mudando la festividá de los «Mártires Cristianos» (Tolos Santos) al 1 de payares, pa facela coincidir cola fiesta pagana. Ello ye, «All Hallow’s Eve», acurtiada como Halloween, sedría la traducción al inglés de lo que nós llamamos «víespera de Tolos Santos», una celebración cristiana chiscada de tradiciones d’orixe paganu más o menos similares en toa Europa.

La cosa nun quedaba nun simple anglicismu si nun fore porque la festividá que -lliteralmente- se mos viende nun ye namás qu’un remake comercial frutu del cine y el marketing, alloñáu de les tradiciones del Oíche Shamhna o Halloween llevaes a Norteamérica polos emigrantes irlandeses. Y yá nun digamos de les propies. Pa con too, la resistencia a esta cultura manufacturada non siempre ta llibre de contradicción. De fechu, nos caberos años esporpolló la moda d’enmazcaralo baxo’l nome de Samaín, como queriendo dotalo de mayor autenticidá, pero pasándose pel arcu del trunfu la tradición asturiana. ¿Acasu llamalo n’irlandés resulta menos ayeno que facelo n’inglés?

Ponese a la defensiva tampoco nun ye una opción. Si Halloween vieno pa quedar, aprovechar el so tirón podría ser una oportunidá pa reinterpretalo en clave asturiana, y recuperar asina una parte del nuesu patrimoniu güei cercanu a la desapaición. Lo contrario diba ser como enfotase en lluchar contra una pantasma.

Equí vos trayemos dellos mitos y tradiciones asturianes de la Nueche d’Ánimes o la viéspera de Tolos Santos recoyíes pol etnógrafu Alberto Álvarez Peña.

 

1. L’AMAGÜESTU DE DIFUNTOS

El cementeriu de Banduxu tovía sigue decorándose con dibuxos de flores el día de Tolos Santos (Fotografía: David Tuñón).

Una de les costumes más arraigonaes consistía en facer amagüestos, una reunión que, si bien se repetía lo llargo de la seronda y del iviernu, la solemnidá de la viéspera de Tolos Santos obligaba dexar un puñáu de castañes embaxo d’un tapín, pa saciar la fame de los difuntos. Nesti sen, si restallaba dalguna castaña, significaba qu’un ánima llograra salir del purgatoriu. La tradición de dexar comida o agua na puerte de les cases y los camposantos tevo continuación hasta la década de 1940, al igual que la celebración de banquetes sobre les tumbes de los antepasaos, tal y como sigue faciéndose anguaño en México nel Día de Muertos. Falamos de rituales, sicasí tan antiguos y xeneralizaos como persiguíos, yá dende tiempos d’Alfonso X «el sabiu».

«Pero aún hasta hace poco, en la Montaña, que es lo mismo para el caso que en Asturias, a las diez de la mañana de ese día se ponían en las tumbas las ofrendas «consistentes en sebosos cuartos de carnero, rancio vino de Málaga y panes de dulce álaga»» (Domingo Cuevas, Antaño, 1904)

 

2. AFURACAR CALABACES

Expo «calabaces y calaberes». Fotografía: Xardín Botánicu de Xixón

La costume de vaciar calabaces (nabos, muncho primero que la hortalexa americana) ta rexistrada enforma en tol norte d’España hasta la segunda metá del sieglu XX. La xera correspondía a los neños, que posaben esti calabazón allumáu con veles nes puertes y ventanes o nes encruceyaes de caminos, onde se supón que s’apaecen les ánimes.

 

3. LA GÜESTIA

Naquellos llugares podía ún alcontrase guapamente colos espíritus, pos na Nueche d’Ánimes la llende ente’l mundu de los vivos y de los muertos desdibuxaba per unes hores. El peor infortuniu pal caminante yera topase cola Güestia, una procesión d’almes en pena. Nada de lo que los muertos ofrecieren había que lo aceptar, en cuantes qu’ello conllevaba tornar tamién en difuntu y vagar pa con ellos pa tola eternidá. De la mesma manera, tampoco nun convenía contrarialos. Si convidaben a comida lo meyor yera simular que se mazcaba, de lo contrario nun hubiés sal de frutes capaz d’aparar tan fatal destín.

 

4. LA MAR QUE DEVUELVE LOS MUERTOS

En dellos pueblos pesqueros, como en Cuideiru, nun se podía salir a faenar. Los pixuetos preferíen arriar les veles y quedar en tierra esa nueche énte’l temor de que les redes recoyeren los güesos d’aquellos marineros afogaos na mar. Anque nun yera l’únicu peligru que podíen atopar:

«Antiguamente los pescadores de Cudillero no salían a la mar la noche de todos los Santos ni la del día de la Encarnación. Pero una vez, la noche de todos los Santos, salieron dos lanchas a la pesca y al pasar frente a la concha de Artedo, vieron que, sobre el agua, casi a orilla de tierra, ardían muchas luces. Los marineros enfilaron las proas de sus lanchas hacia aquellas luminarias y rema que rema, porque allí las olas rompían con mucha fuerza, llegaron allá y vieron llenos de miedo, que las luces eran producidas por huesos que había puesto allí la Güestia».

(Aurelio del Llano, Del folckore asturiano, 1977)

 

5. L’AGUINALDU

Nenos pidiendo l’aguinaldu en Robléu (Cerecea, Piloña). Añu 1930.

Nada d’esi fusilable «trucu o tratu». Les llambionaes había que les ganar, como n’Antroxu, conque los rapazos salíen coles cares entafarraes de cernada -ensin mazcaritase- a pidir cantando peles cases, onde la recompensa solía consistir en chorizu, llinguaniza, castañes o ablanes. Y si había suerte, dalgún frixuelu (el terror de Pablo Casado).

«Queden con Dios señores
Nosotros con Dios nos vamos
Hasta l’añu venideru
Qu’en so casa mos veamos»

Pela cueta, si nun recibíen nada:

«Allá arriba n’aquel altu
Hai un perru cagando
Pa los amos d’esta casa
Que nun me dan aguinaldu.»

 

 

Tags: , , , , ,

¿Por qué Asturies ye un Principáu?

Posted by on | Featured
Munchos asturianos piensen que’l títulu tien que ver col reinu d’Asturies, mas la causa real ye mucho más humillante

 

Nin Pelayu nin los reis asturllioneses tienen que ver col orixe d’un títulu que se remonta al sieglu XIV, mientres Europa desangraba pola Guerra de los 100 años. Asturies yera entós un territoriu más del reinu de Llión, integráu agora na Corona de Castiella. Y en mediu d’esti xaréu nacerá el nuesu protagonista, Alfonso Enríquez, fíu bastardu d’Enrique de Trastámara, siendo la so crianza confiada a Rodrigo Álvariz de les Asturies, ún de los nobles más poderosos del so tiempu. So padrastru acabaría encariñándose col elli y va face-y heriede del condáu de Noreña, de Xixón, y de cuasi trés quintes partes d’Asturies, xunta delles posesiones en tierres de Llión.

Mentanto, había en Castiella dos hermanos engarraos pol tronu, Enrique y Pedro I (el cruel), que nun aparaben de buscase’l llombu. Y nun ye una forma de falar. Enrique va imponese en cosiendo a Pedro a puñalaes (lo que n’Asturies conocemos como «facere un Tomasín«), un socesu que va abrir la puerte a Alfonso a tornase n’herederu, poniendo la so espada al serviciu del exércitu castellanu y buscando’l favor de so padre coles sos fazañes n’Andalucía y Portugal. Pero ésti tenía otros planes. Pa roblar la paz con Portugal, Enrique II prepára-y la boda con Isabel de Viseu.

Alfonso nun podía tar más decepcionáu, llueu de tantu esfuerzu so padre «recompensáralu» con otra bastarda, y non cola heredera llexítima del tronu portugués.

Torre de los Álvariz de les Asturies (Trubia, Xixón)

Pero de la que muerre Enrique, en 1379, Alfonso va perder otru tren al adelantase so hermanastru Xuan, quien echó tovía más lleña al fueu prohibiendo a los nobles cobrar impuestos a la Ilesia. En 1383 Alfonso conspira contra elli, pero los sos planes vense frustraos pol obispu d’Uviéu, Gutierre de Toledo. Lloñe d’achantar, enterándose de los preparativos pal matrimoniu ente Xuan I y Beatriz, la heredera llexítima del tronu portugués, el conde acaba montando un espolín. Yera l’acabóse…

Viendo cómo’l tronu se-y esmucía de les manes, l’historiador xixonés Estanislao Rendueles escribe qu’Alfonso tentó entós de crear un estáu independiente de la Corona na primavera de 1382, ofreciendo’l puertu de Xixón a ingleses y portugueses. Fracasó. Les tropes castellanes invaden Asturies per mar y tierra, y aplasten la resistencia de los castiellos de Cangas y de Tinéu. Dempués del asediu de Xixón Alfonso ye prindáu y tolos sos dominios van a ser confiscaos pola Corona. Nada distinto a un desallugu de los d’agora… D’esti xeitu, la importancia de la rebelión foi determinante pa que Xuan I creás el PRINCIPÁU D’ASTURIES en 1388, una fotocopia de la conquista inglesa de Gales que supeditaba los señoríos asturianos directamente a l’autoridá real. Y non, esti títulu nun yera un premiu, yera un mecanismu de sometimientu a los castellanos.

«(…) que la tierra de las Asturias que nós tomamos para la Corona del Regno por los yerros que el conde Alfonso nos fizo…

Xuan I de Castiella

Enrique III (fíu de Xuan I) y Catalina de Lancaster van ser los primeros príncipes, y Asturies tornaráse nun Risk particular onde s’entrenarán na xera del gobiernu. Tal paecía que la historia del nuesu conde diba acabar equí, pero la muerte repentina de Xuan I en 1390 y la minoría d’edá d’Enrique III provocó un caos nel qu’Alfonso supo tener porgüeyu, y dempués de 6 años presu recobró por fin la so llibertá y posesiones. Taba preparando pa facer otru intentu d’independencia en 1395, the last, el definitivu, l’arrancadera…

Darréu, los castellanos entren n’Asturies pel puertu Payares con una fuercia de 2.600 homes, y asedien la ciudá de Xixón pela segunda vez. Alfonso Enríquez marchará a Baiona p’axuntar apoyu militar, pero entós, ¿quién quedaba al mandu de la defensa de la villa? Nada menos que la so muyer, la portuguesa Isabel, y los sos partidarios, como Cortés de Parres, mui inferiores en númberu, pero apoyaos na morfoloxía del peñón de Cimavilla, aisláu dafechu na marea. El rigor del iviernu enfrió los ánimos y dambes partes alcordaron una tregua na que se que buscó la mediación del rei de Francia, pero la guerra reanudá n’agostu. Nesi tiempu los castellanos ensayarán l’usu d’artillería contra les muralles, no que diba ser el primer testimoniu del emplegu de pólvora nel norte peninsular.

Dempués d’un mes resistiendo a la desesperada, Isabel rinde la plaza énte a falta de refuerzos. Yera 6 de setiembre, una efeméride va quedar per siempre grabada a fueu na historia d’Asturies:

“Quemaronse los palacios del rey Pelayo (…) y también la Iglesia de La Virgen María, levantada sobre el faro herculino, las casas todas de la ciudad, la Iglesia de San Juan levantada sobre el templo de Apolo, la torre Augusta fue demolida y también los establecimientos de las cohortes, todo fue demolido y quemado y se arrojó sal sobre las tierras para hacerlas infértiles”…

Enrique III de Castilla
Desgraciadamente, cuasi tolo que conocemos sobre esta historia correspuende a la versión de los vencedores, como la crónica de López de Ayala, que participó en persona nel asediu de Xixón. Cronistes qu’estraron los sos escritos de falsedaes tales como que la «mala fembra» d’Isabel quemara la villa primero d’entrar los castellanos…
«Mas este chronista (…), e todos os mais escriptores Castelhanos, mostrarão-se sempre e mostrarão-se ainda hoje tão pouco affeiçoados ao Senhor D. João I, que tudo quanto elles dicem em desabono do caracter deste Illustre Principe, deve ficar, pelo menos duvidoso (…)»

Como castigu, Enrique III va retirar a Xixón el privilexu de comerciar per mar, que pasaba agora a San Vicente de la Barquera, y prohibirá a los vecinos volver a poblar Cimavilla, teniendo de buscase la vida na zona de Somió per munchos años (y non nos xalés de güei, precisamente). Pero hebo otres consecuencies; la cayida en desgracia de les families partidaries de los Noreña y l’ascensu de les valedores de los intereses castellanos, asina como’l fortalecimientu de l’autoridá de Gutierre de Toledo, responsable de la castellanización de la Ilesia asturiana. Xunta eso, el «Principáu» va vivir un procesu de disgregación formal del reinu de Llión, desvinculándolu de dalgunes de les sos instituciones y creando otres, como la Xunta Xeneral, alicada polos borbones tres reconocer al Principáu como mayorazu rexu dende 1707, tal vez pa compensar la implantación d’un organismu centralista como yera la Real Audiencia (1717).

Y ansí, llueu de dir d’equí per acullá, en 1977, dos años dempués de la restauración de la monarquía, Felipe de Borbón recuperará’l títulu de «príncipe d’Asturies», celebrao por munchos asturianos. Otros, empara, verán nel títulu l’alcordanza humillante de la derrota d’Asturies y de la quema de Xixón.

¿Pero qué foi del conde de Noreña? Polo que paez, foi asesináu por orde del rei en 1406. La so familia, refuxada en Portugal, fundará’l poderosu llinaxe de los Noronha (Noreña), del que’l recuerdu más tanxible pudiés ser guapamente’l palaciu -pervisitáu- de los duques de Bragança, en Guimarães, llevantáu por D. Alfonso y Constança de Noronha, fíu d’Isabel y Alfonso Enríquez.

 

Palaciu de los Duques de Bragança, Guimarães (Fotografía: VisitPortugal)
Tags: , ,

El Tragamón, la viesca máxica de Xixón

Posted by on | Featured
Carbayera’l Tragamón. Fotografía: Manuel M.V.

El carbayu (quercus robur) foi consideráu como un árbol sagráu por munchos pueblos d’Europa: los druides celebraben les sos ceremonies pañando fexes d’arfueyu de les sos cañes, que dempués usaríes nes sos pociones, los griegos consagrábenlos a Zeus, hebo carbayos llevantaos n’honor a Xúpiter nos siete oteros de Roma y La Biblia alude al carbayu ente les munches maderes coles que se construyó l’Arca de Noé. Ye amás el símbolu del pueblu vascu, pos yera baxo’l carbayu de Gernika onde los reis xuraben respetar los fueros. Y foi gracies a ún d’estos famosos y vieyos árboles, allugáu na cai Uría, pol que los uvieínos reciben cariñosamente (o non) el xentiliciu de carbayones.

Una de les matielles más grandes y vieyes de Xixón podemos atopala nel barriu de Cefontes (de cien fontes), solar del apellíu Cifuentes. Trátase de la Carbayera’l Tragamón, un llugar mui buscáu poles families xixoneses pa pasar la tarde del domingu. Dellos suelen xebrala en dos, refiriéndose a la viesca asitiada al norte de la carreterina de La Isla como la Carbayera de los Maizales. Ésta recibe’l so nome de un antigu merenderu próximu con bastante sonadía nos 70, pero nun existe como tal, sinón que ye una continuación de la del Tragamón, integrada parcialmente dientro del cierru del Xardín Botánicu Atlánticu dende 2003.

Guapu y interesante ye’l nome de Tragamón, qu’apaez na documentación del sieglu XVI como «Tregomón», lo que mos invitaría a pensar que vendría de «tres del gamón», una planta silvestre de flores blanques. Por embargu, nada se sabe con certeza.

Tola carbayera ye Monumento Natural, con exemplares d’hasta 500 años y 28 m d’altura. Divídese en dos zones: la que pertenecía a la finca de La Isla, y la de terrén comunal. La primera respuende a un crecimientu más natural ensin intervención humana, en tanto que la segunda foi aprovechada polos vecinos pa lleña hasta 1905, d’ehí’l crecimientu más irregular y al tiempu tan fascinante.

Esta zona tevo una gran importancia na historia de La Transición n’Asturies, ya qu’equí se celebró’l famosu Día de la Cultura ente 1972 y 1984, una gran fiesta onde llegaron actuar Ana Belén y Víctor Manuel, Nuberu, Rosa León y un cientu d’artistes cercanos a los movimientos d’esquierda. El so gran promotor foi Óscar Roza Riera, natural de Cimavilla, quien ilusionó a los sos collacios pa entamar esti eventu qu’axuntó varios colectivos y que foi, en resultes, l’aniciu de nuevos movimientos y partíos na amorgada dictadura franquista.

¿Ye Gigia l’orixe de Xixón?

Posted by on | Featured

¿Por qué’l nome de la mayor villa y conceyu d’Asturies continúa siendo una incógnita?

La denomación de la villa y conceyu de Xixón camudó na documentación histórica a lo llargo de los sieglos. Geygion, Gigon, Giion, Gyjon, Xijon, Jixon y Xixón son delles de les formes que se pueden rastrexar nel papel. Pueden paecer diferentes, pero tanto l’asturllionés como’l castellanu pronunciábenlo de forma cuasimente idéntica hasta’l sieglu XVI, momentu en que’l castellanu entama a vocalizalo como l’actual «j». Asina, el castellanu va caltener en ciertu mou la grafía antigua con una pronunciación novedosa, mientres que l’asturianu caltendrá la pronunciación histórica con una grafía daqué más moderna (documentada yá dende 1634).

Vista de la costa central d’Asturies, Pedro Teixeira (1634)

¿Pero d’ónde vien esi nome tan estrañu? Naide lo sabe con certeza, anque nun faltaron teoríes de lo más disparatao. Tirso d’Avilés señaló’l so orixe nel nome de ‘Gerión’, un xigante mitolóxicu al qu’Hércules va afanar les oveyes, al tiempu que Gregorio Menéndez Valdés propondrá ‘Ogixas’, ún de los nomes de Noé. Hebo hasta quien quixo ver el nome d’un rei etiope, ‘Gigon’. Sicasí, una de les propuestes de mayor éxitu y sonadía foi ‘Gigia’. La semeyanza gráfica y fonética (anque namás aparentemente) d’esta vieya urbe romana col nome en castellanu va otorga-y gran popularidá, al puntu de bautizar l’asociación de vecinos y dalgunos nomes comerciales. Por embargu, el propiu Xovellanos espresó les sos duldes al rodiu la so viabilidá, pos Gigia (pronúnciese guíguia) yera en verdá’l nome d’una población de l’Asturia cismontana, ello ye, allugada en territoriu de la provincia de Llión. Un nome que pudo inclusive evolucionar a l’actual Cea.

Descartao queda, poro, identificar Gigia con Xixón, como apunta Ramón d’Andrés nel so Diccionariu toponímicu de Xixón (2007). Equí podremos descubrir delles coses interesantes sobre ésti y otros topónimos del conceyu, recoyendo delles hipótesis daqué más científiques. Les principales resúmense en dos; una desenrollada por Unamuno en referencia a un posible SAXUM, un oteru o peñasca (verosímil si atendemos al perfil de Cimavilla) y otra elevada por Xose Lluis García Arias en tornu al xenitivo d’un poseesor, tal vez IAIONUS, IEIONIUS o GEGIONUS.

Conxetures aparte, l’orixe del nome de la villa y conceyu más pobláu d’Asturias sigue siendo, anguaño, un auténticu misteriu.

 

[«la billa de xixon» 29 d’agostu de 1635] Incluyíu nun informe sobre defensa que remitió Fernando Valdés a Felipe IV., trátase del planu de Xixón más vieyu que se conserva.

 

Tags: , ,

10 coses que nun sabíes sobre la montera picona

Posted by on | Featured

 

1. ¿D’ónde vien la montera picona?

N’orixe foi un gorru con dos ales que podíen baxase pa protexer les oreyes del fríu, mas inoramos la so antigüedá. De mano podemos rastrexala de magar el sieglu XVIII, polo que guapamente pudo usase yá na Edá Media.

Como diximos, pel iviernu baxábense les ales para capiar el bastiáu, l’orbayu o la nortiada, pero en branu tamién podía usase de visera, gracies a la solombra del so picu baxu, como fai esti vecín de Cangues retratáu en 1895 por William Selkirk.

 

2. La montera tien partes y toes tienen nome.

La que cubre la cabeza llámase «casquete», mientres que los llaterales reciben el nome de «ales o «nales», terminaes nun «picalín». A partir d’ehí estremamos un par de variantes:

A) La de dos picos.
B) La repicona o picona propiamente, que suel tener reborde.

 

3. ¿El Quixote con montera picona?

El famosu fidalgu manchegu foi inmortalizáu con montera picona pol pintor xixonés Evaristo Valle en 1948. Dellos dicen que quixo ironizar col personaxe de Cervantes por cuenta de la imaxe pésima que da de los asturianos na so novela…

 

 

4. El xeitu de llevala podía indicar l’estáu civil. ¡MEYOR QUE’L TINDER!

  1. Si taba col ala arrecha: casáu y formal.
  2. Si taba col ala terciada: disponible.
  3. Si tenía empoxaos dos enfileres de cabeza encarnada nel reborde: namoráu y correspondíu.

Amás, antiguamente’l picalín adornábase con un ramillín o una plumba de pavu real, que dempués se regalaba a la namorada.

 

 

5. La montera nun se quitaba dientro la ilesia siquieramente

Lo qu’enoxó al obispu d’Uviéu (el castellanu Agustín González Pisador), quien obligó a los asturianos a descubrise nel templu dende 1786.

 

6. Les muyeres tamién llevaron montera

Pero van abandonala bien ceo, de manera qu’en 1889 namás se documenta ente les vecines de Ponga y Amieva (anque siguió siendo habitual que les viudes llevaren puesta la montera del so maríu difuntu).

La carbayona Marica Andayón (1764-1848), heroína de la Guerra de la Independencia, yera conocida por vistir montera y capa masculina, conque yera nomada machistamente como Pericu Andayón.

 

 

7. Y los vaqueiros d’alzada…

Talmente como describió Xovellanos, pero foron sustituyéndola a lo llargo del sieglu XIX pol sombreru llionés como elementu de diferenciación pa colos xaldos.

 

 

8. Foi emplegada nel pueblu cántabru de Tresviso

Por mor de la so gran rellación con Cabrales.

 

 

9. La Pola Siero yera la capital de la montera picona

La mayor parte de les que s’usaben n’Asturies facíense equí, llegando a figurar 20 xastres y montereros en 1771.

 

10. Los últimos n’usar la montera a diario foron…

Ulpiano García, el sacamueles de Salcéu (Quirós), y Antonio Campillo (el tíu Casona), nacíu en Bulnes (Cabrales). Dambos llegaron a conocese nes fiestes de San Mateo d’Uviéu en 1924, convidaos pol etnógrafu asturianista Aurelio del Llano.

Nun fuimos quien a averiguar l’añu en que morrieren, namas qu’en 1928 Aurelio del Llano escribe nes sos Bellezas de Asturias qu’Ulpiano yera entóncenes l’únicu asturianu en vistir el traxe del país, polo tanto ye posible qu’Antonio morriés primero d’esa fecha.

La uniformización de la moda qu’impunxo la Revolución Industrial acelerará l’ocasu de la montera nel cambiu de sieglu, siendo abandonada dafechu como pieza d’usu diariu na década de 1920. Dende entós pervivirá nes solemnidaes, como símbolu de la identidá asturiana.

En Ser Asturianu tuvímoslo claro, la montera picona representaba como nengún otru iconu l’espíritu d’asturianía, ello ye que decidimos que tenía que ser la nuesa marca. ¡Un arguyu!

En fin, agora yá sabes lo básico sobre la montera picona, ¿a qué esperes pa ponela na mollera?

 

 

 

 

 

TOP 10 Torres medievales asturianes

Posted by on | Featured

Asturies llegó tener cerca de 300 fortaleces defensives. Delles controlaben rutes comerciales, otres sirvieron de defensa escontra musulmanes o escontra castellanos. Munches otres, por embargu, foron construyíes como un símbolu permanente del estatus de les families más poderoses del país. Proponémoste un viaxe per diez torres medievales asturianes. ¡Conozles!

 

1. Torrexón de Llanes


Declaráu Monumentu Nacional en 1876, alcuéntrase na propia villa de Llanes, al llau del Conceyu. La so construcción remóntase a 1270, nel reináu d’Alfonso X el Sabiu, quien nesi añu otorga fueros nuevos a la villa xunto col privilexu d’erguer una muralla. Asina, piénsase que la torre actual taría asociada a la muralla medieval cola función de vixía y de defensa, anque llegaría sirvir como prisión del conceyu. Cuntaba amás con un fuexu y una ponte lllevadiza.

Restauráu en 1954, acueye güei la oficina de turismu.

 

2. Torre de Banduxu (Proaza)

 

Con 12 metros d’altor y 7 de diámetru, la Torre de Banduxu o Torre de los Tuñón ta considerada como una de les torres defensives asturianes meyor conservaes del periodu baxomedieval y la única que continúa habitada. Podemos atopala na impresionante aldea medieval de Banduxu, nel corazón de los Valles del Osu, nel conceyu de Proaza. La fortaleza, que marca la llende ente los barrios de Toral y El Palaciu, foi llevantada como símbolu de poder pola familia Álvarez de Banduxu ente los sieglos XII y XV. Na so planta cimera presenta un escudu coles armes de los Tuñón, los Miranda y los Banduxu alredor d’un cuartel con una torre con una llanza.

Esti edificiu sirvió tamién como prisión y casa del conceyu.

 

3. Torrexón de Villamoréi (Sobroscubiu)

 

El Torrexón de Villamoréi, conocíu n’época medieval como’l Torrexón de Tielva, ye tolo que queda del vieyu Castiellu de los Aceales. Too apunta a que foi construyíu nel sieglu VIII pol rei astur Alfonso I sobre los restos d’una fortaleza d’orixe romanu. La so función yera guardar el Camín d’Acéu, l’antiga vía de comunicación que trevesaba los montes asturianos dende Llión pel Puertu de Tarna hasta’l Valle del Nalón. De fechu, yera ún de los caminos principales qu’usaben los pelegrinos pa dir a venerar les reliquies de la catedral de San Salvador d’Uviéu. Foi donáu nel sieglu XII a la Orde de Santiago, mas va abandonase nel sieglu XV llueu de la fundación de la Pola d’Oviñana (güei La Polina).

P’acceder a elli dende l’aldea de Villamoréi (Sobroscubiu) escomenzaremos una ruta cenciella chiscada pol espesor de carbayos y castañales con unes vistes de plasmar sobre l’embalse de Rusecu. A pesar de la guapura de les sos ruines nun recomendamos ascender a la Peña los Moros, onde se llevanta’l torrexón, visto lo peligroso del senderu.

 

4. Torre Vieya de Viḷḷamouros (Cadavéu, Valdés)

 

A malpenes 10 min de Ḷḷuarca alcuéntrase esta guapa fortaleza señorial reconvertida güei n’hotel de lluxu. La tradición cunta que perteneció a un caballeru llamáu Pelayu (coetaneu y homónimu del rei Pelayu) que vencerá a los musulmanes a l’altura de Curniana. A xulgar polos afayos arqueolóxicos na so redolada paez ser que’l so orixe taba nuna vieya torre militar romana, reconstruyida en delles ocasiones a lo llargo los sieglos IX, XII, IV y XV. Nel reinu de los ástures posiblemente tuviés interés estratéxicu escontra les incursiones viquingues.

Un escudu na casona adegaña a la torre recueye la conocida lleenda de Viḷḷamouros en tornu a la figura de Diego Pelaiz, un noble que, desterráu y priváu de tolos sos bienes por orde del rei Mauregato, pon la so espada al serviciu d’Alfonso «el Castu». Restituyíu Alfonso II nel tronu d’Asturies, Diego Pelaiz recupera la torre dempués d’espulsar a un tagayu de moros que s’apropiara de la fortaleza y que moraben nella en xunto con dalgunes doncelles cautives.

 

A los sos pies podemos lleer un poema grabáu en piedra del escritor Fernán Coronas (el Padre Galo), que reza asina:

«Subre’l cielu clariosu
firme negreya
cargada de memorias
La Torre Vieya.
Dica’l sou picu subu
sin escalada
ya vei esqueicidas cousas
la mía mirada.»

 

5. Torre de Revillagigedo (Xixón)

 

L’actual palaciu de Revillagigedo alcuéntrase na Plaza del Marqués de Xixón y, anque la mayor parte de la contrucción fore llevantada nel sieglu XVIII por Carlos Miguel Ramírez de Xove (güelu de Xovellanos y primer Marqués de Santisteban del Mar de Nataoyo), pocos saben que la so torre este ye d’orixe medieval (del sieglu XV). La torre oeste irguióse, de fechu, al envís de caltener la simetría.

 

6. Turrixón de Trubia (Xixón)

 

Tamién en Xixón, mas na redolada de la ciudá, el Turrixón o Turruxón de Trubia ye ún de los iconos de la parroquia de L’Abadía Cenero. Nel so momentu constituyía una de les propiedaes principales del poderosu Rodrigo Álvariz de les Asturies, mas va ser mercáu posteriormente pola familia Valdés (la rama de San Cucao de Llanera) nel sieglu XVI.

Magar la so función militar y de control, poseye un númberu infrecuente de ventanes (consérvense ocho) qu’albidren un usu residencial. A ello habría sumar un gran corredor allugáu nel tercer andar de la so fachada noroeste, güei desaniciáu (al igual que la muralla perimetral). Ta declaráu Bien d’Interés Cultural y anguaño ye de propiedá municipal.

 

7. Casa-torre de la Rúa (Uviéu)

 

Asitiada na plaza de la catedral, la Casa-torre de la Rúa ye otru de los edificios emblemáticos de la ciudá d’Uviéu. La parte más antiga ta datada nel sieglu XIII, perteneciendo con posterioridá al contador de los Reis Católicos, Rodrigo de la Rúa. Foi reformada nel sieglu XV, época a la que s’ascribe la so característica ventana de cruz.

Al ser de los pocos edificios que se salvó de la gran quema de  la Nuechebona de 1521 ye ún de los inmuebles más antigos de la ciudá. Güei ta catalogada como Bien d’Interés Cultural, cola categoría de monumentu, protección que compatiliza con un usu hosteleru centráu en bodes, eventos y celebraciones. Sicasí, los dos últimos andares tán acutaos como residencia privada de los sos propietarios, los marqueses de Santa Cruz de Marcenao.

 

8. Torre Vieya de Samiguel

 

Anque dacuando pase desapercibida, la Torre Vieya de Samiguel alcuéntrase nún de los llaterales de la catedral de San Salvador d’Uviéu. La so fechura más antiga parte d’ente los años 884-885 d.C., cuando Alfonso III promueve la construcción d’una fortaleza defensiva ensin malpenes ventanes pa protexer les ayalgues del reinu de les frecuentes incursiones viquingues.

A últimos del sieglu XI va amestase un cuerpu románicu a mou de campanariu con ocho arcos de mediu puntu con capiteles vexetales. A pesar de la so remodelación, nel transeptu de la muria norte inda se conserva una inscripción fundacional:

Nel nome del señor Dios y del nuesu salvador Xesucristu, y a la gloria de toos, de la gloriosa Santa María Virxe, a los dolce apóstoles y restantes santos mártires… el príncipe Alfonso fíu del rei Ordoño de santa memoria mandó edificar esta fortificación cola esposa Scemena, naciéndo-yos dos fíos, pa que la defensa de la fortificación del aula del tesoru d’esta santa ilesia permaneza ensin dañu; precaviendo que nada pereza, pos los xentiles suelen entainar col so exércitu pirata naval, Dios nun lo queria. Esta obra ofrecida por nós, seya concedida en perenne posesión a la mesma ilesia.

 

9. Torre de Peñerúes (Morcín)

 

Podemos alcontrala sobre una llomba próxima a la llocalidá de Campo (Peñerúes), en conceyu de Morcín. Dende esti pueblu podemos inclusive realizar una ruta d’ascensión hasta la torre pa llueu contemplar una panorámica incomparable sobre l’embalse de Los Afilorios.

Ye posible que seya una torre de vixilancia d’orixe romanu, mas foi reconstruyida en tiempos d’Ordoño I y remocicada nel sieglu XII. Tien unos imponentes 17 metros d’altura, anque la so fachada sur argayás dafechu.

 

10. Torre de los Valdés-Salas

 

Na villa de Salas podemos visitar el castiellu y torre de los Valdés Salas, del siglo XV. Reconstruyida llueu d’argayar en 1959, la fortaleza foi dotada d’unes casielles esquinaes inexistentes na orixinal. El so interior acueye’l muséu prerrománicu de Samartín de Salas.

El palaciu, del sieglu XVI, conéctase a la torre per aciu d’una ponte d’arcu de mediu puntu. Foi ésti’l llugar de nacimientu de Fernando Valdés Salas, inquisidor xeneral y fundador de la Universidá d’Uviéu. Ye posible contemplar el so rellumante sepulcru na cercana colexata de Santa María La Mayor, obra de Pompeyo Leoni.

Tags: , , , , , ,

El mayor muséu de molinos, n’Asturies

Posted by on | Featured

Abiertu al públicu en 1998 tres rehabilitar un molín familiar centenariu, el muséu de molinos d’O Mazonovo (Taramunde), ye’l mayor espaciu museográficu dedicáu a estos inxenios.

Taramunde xuega al esconderite. Escabúllesemos ente A Serra d’Ouroso y los montes d’Eiros, tupíos pola solombra d’una viesca autóctona güei daqué asediada polos ocalitos.

Tamos nos confines del occidente d’Asturies, más allá d’A Garda un cartel marca una frontera qu’hai un tiempu pensáremos cruciar. L’agua marmúllamos en “a fala” (el gallegu d’Asturies); O Rego das Mestas, O Rego do Inferno, O Rego da Salgueira, O Río Turía… Pura poesía. Chiscando, retumba’l so ecu mudu en decenes de molinos fariñeros, fragües de fierro (mazos) o batanes pa tratar los texíos. Too mos fala d’un tiempu nel que’l so xorrecimientu per tola “comarca” del Eo-Navia dio nome a la xeografía. Asina ye que tenemos El Mazonovo en Bual, El Mazonovo de Santalla d’Ozcos y el que mos toca; O Mazonovo de Taramunde.

 

 

La singularidá d’esti molín ye que tien un orixe indianu. Nel añu 1899 Manuel López-Cancelos regresa a Taramunde tres probar fortuna n’Arxentina y decide instalar un molín de maquila a orielles del ríu Cabreira. El so allugamientu yera ideal, al llau de la capital del conceyu y nel camín de confluyencia de varies aldees cercanes. En 1921 les sos cuatro mueles yá nun daben abastu pa procesar tol cereal, polo que deciden añader otres dos. En 1929 lleguen a instalar una dinamu col oxetivu de lletrificar les poblaciones de Taramunde, A Veiga de Llan y Nogueira, pero tres cuasi cien años moliendo’l trigu, el maíz y el centén del conceyu cesó la so actividá a principios de los años noventa. Finalmente, en 1998 los nietos de Manuel acuerden rehabilitar el conxuntu p’acondicionalu como espaciu museográficu, convirtiéndolu d’esti xeitu nel Muséu de los Molinos d’O Mazonovo.

 

Anque realizar una visita con un guía oficial ye siempre lo más recomendable, O Mazonovo ye un muséu abondo interactivu. Tirando d’una palanca, el visitante pue accionar por sigo mesmu los mecanismos que faen rotar les ruedes, los rodeños, los árboles y les mueles. Asina, un gran chorru d’agua surde violentamente emburriando un engrane con delles pieces que cobren vida con una lóxica máxica, como si fore un xigante de madera.

Tradicionalmente’l molín o moliño pertenecía a un propietariu, y a ésti acudíen los llabradores a moler el cereal pa obtener la fariña cola qu’amasar el pan. Polo xeneral nun se pagaba con dineru, sinón que’l molineru quedaba con una parte de lo que procesaba; la maquila. Pero claro, siempre habría dalgún que maquilara más de la cuenta, d’ehí qu’heba tantu cancioneru y refraneru tradicional onde’l molineru nun siempre salía precisamente bien paráu.

A moliñeira taba de parto

e o moliñeiro nun tiña un cuarto.

A moliñeira votou a parir

e o moliñeiro votou a fuxir.

Cien xastres, cien molineros y cien texedores, son trescientos lladrones.

 

El percorríu continúa hasta un saltu d’agua artificial bien guapu creáu pa reconducir l’agua del ríu Cabreira hacia les aceñes, anque na sienda toparémonos con un molín asiáticu y un monjolo brasileñu ufriéndomos un poco de contestu na evolución d’estos inxenios a lo llargo del tiempu y l’espaciu.

La so variedá y bayura de pieces (alredor de 19) conviértenlu nel mayor muséu de molinos d’Europa. «Tenemos cerca de 30.000 visitantes a lo llargo del añu» esplica Carlos López-Cancelo, descendiente d’una saga de molineros dende hai cuatro xeneraciones y actual dueñu del muséu, ye amás nietu del mesmu Manuel López-Cancelo. «El turismu español sigue siendo’l principal, magar que tamién llogramos captar el francés o l’alemán en menor midida». El caltenimientu d’O Mazonovo susténtase cuasi dafechu na venta d’entraes y -de xemes en cuando- nel suministru del escedente llétricu a la rede de distribución llocal, polo que siempre tán buscando la manera d’atrayer más visites. «Sacamos un proxectu pa llamar l’atención d’aquellos pelegrinos que quieran facer della parada nel camín de regresu». Esta inquietú por crecer y ameyorar ye lo que lo fai verdaderamente atractivu al conxuntu. Y ye que «O Mazonovo ta na primer posición de TripAdvisor d’ente tolos museos d’Asturies» sorraya.

 

 

Otra baza del muséu ye’l so valir didácticu. Dende hai tiempu trabayen con varios colexos pa poner en valir estos elementos etnográficos tamién ente les nueves xeneraciones y tresmitir nos rapazos l’amor al pasáu. Toos tienen oportunidá de ver, deprender y esperimentar, y si superen una pequeña prueba escrita pueden recibir ¡nada menos qu’un diploma de molineru! Anque tenemos de confesar que nós fiximos trampa…

 

¿Cómo llegar?

Dende Castripol hasta A Veiga pela N-640 (N-642 nel casu de partir dende Ribadeo) y llueu a Taramunde pela AS-21. Na parte sur del pueblu de Taramunde apaez indicáu’l muséu, cuntando con aparcadoriu de vehículos.

Horarios

Del 1 de marzu al 30 de xunu y del 1 d’ochobre al 12 d’avientu.

· 10:30 a 13:30 | 14:30 a 17:00 – Últimos de selmana y festivos

Del 1 de xunetu al 30 d’agostu

· 10:30 a 13:30 | 14:30 a 19:00 – Tolos díes

Del 1 de setiembre al 30 de setiembre

· 10:30 a 13:30 | 14:30 a 17:30 – Tolos díes

Tarifes

Entrada individual

· Mayores de 10 años…………………….. 3,90€

· Menores de 10 años…………………….  1,50 €

Grupos

· Normal (mínimu 17 persones)…………… 2,90€

· Escolares…………………………………… 1,50€

(2,90€ ente’l 1 de xunetu y el 30 de setiembre)

 

astAsturiano
es_ESEspañol astAsturiano