La Estaya de la Llingua d’Avilés pon en marcha una nueva edición de CaleyAvilés, con cuatro visites guiaes gratuites per distintos llugares de la villa y el conceyu.
Un añu más (y yá van cuatro), el programa de visites guiaes n’asturllionés desembarca esti branu na Villa del Adelantáu pa descubrir los secretos de les sos cais, parques y edificios. La primera de les rutes tendrá llugar el vienres 28 de xunu nel Parque Ferrera, coincidiendo col Día Mundial de los Árboles, pa conocer de cerca la cultura alredor de les especies asturianes más representatives presentes n’Avilés. Esti itinerariu botánicu repetiráse’l 19 de xunetu nel Parque de la Madalena.
N’agostu y setiembre espérenmos dos visites dirixíes por Denis Soria (guía oficial de Ser Asturianu). La primera, pel cascu históricu d’Avilés (2 d’agostu), centraráse nel pasáu medieval y modernu de la villa y va incluyir la entrada a la capiella de Los Alas, con salida a les 19 h na Plaza’l Parche (frente Conceyu). La visita postrera, como novedá, va ser nel cementeriu de La Carriona y el barriu de Miranda (6 de setiembre). Esti camposantu, obra de Bausá (1888-1890), forma parte de la ruta de cementerios significativos d’Europa, al empar que’l de Ḷḷuarca. La visita dará acabación nel cercanu barriu de Miranda, ún de los puntos con mayor interés etnográficu d’Avilés.
P’asistir a toles visites ye necesaria la inscipción previa:
Teléfonu: 985 54 55 08
Corréu electrónicu: [email protected]
Asturiano 
Español