Asitiada nel Parque Natural de Redes, la ruta de Los Cabornos ye un paséu de cuasi dos hores per ún de los sotos de castañales centenaries más representativos del valle del Nalón.
Asturies ye la mancha de castañales más grande d’Europa, con alredor de 58.000 ha, anque pocos de los sos castañeos aprovéchense económicamente. A pesar de cuntar con variedaes autóctones de castaña de bona calidá, como la valduna (de gran sonadía en Les Regueres), namás producimos 120 tonelaes al añu, lloñe de los nuesos vecinos gallegos y llioneses. La so rellación cola cultura tradicional asturiana, pa con too, foi y ye pergrande; los sos frutos serondiegos calmaron la fame nos años de miseria y la so madera foi la que más s’emplegó na construcción d’horros y paneres (inclusive nes galeríes de les mines de carbón).
Escomenzaremos nel pueblu de Campiellos, en Sobroscubiu, al que s’accede dende Rusecu. Debemos aclarar que’l nome d’esti conceyu (Sobroscubiu) fai honor a la so guapura vertical, pos n’asturllionés un escobiu nun ye otra cosa qu’un pasu estrenchu o un llugar pindiu, al tiempu que los sos habitantes son conocíos como coyanes. La llocalidá caltién una muestra fascinante d’arquitectura tradicional, colos tabiques de ciebu o cebatu, les sos tenaes o los sos horros con dalgunos pegoyos ensin cantería, característicos de la zona. Nós vamos siguir la ruta -señalizada mui curioso- per detrás de la bolera, hasta aportar a un rótulu qu’indica la zona de Los Malatos.
A pocos metros toparemos les primeres cuerries o corripes, unes muries de piedra circulares onde s’almacenen les castañes cañueles (les que cayen de les cañes del árbol). Ellí tapécense con fueya y feleches pa caltener la humedá y conservales per más tiempu, hasta qu’esgayen del muergu o oriciu (esto ye, cuando esmorguen), d’ehí’l nome de les pinces de madera coles que tradicionalmente se pañen los muergos; les morgaces. Otru xeitu de caltener les castañes ye ensugales o fumales nes cases, quedando dures y engurriaes; son les conocíes mayuques, qu’acompañaron los potaxes muncho primero d’arribar la pataca.
Continuaremos pela La Llosa’l Llanu trevesando una viesca adevesada de rebollos (Quercus pyrenaica), colos sos tueros irregulares endolcaos por mofos y alíquenes. Llueu va esperanos un camín de baxada con vistes sobre’l Picu la Xamoca (1281 m) onde mos aguarden decenes de castañales centenaries. Tal vez mos podia sorprender que les castañales de Los Cabornos nun seyan altes y allargaes, como cabría esperar d’árboles maderables, sinón que les más d’elles son grandes tueros gruesos y rebaxuelos. A lo llargo de sieglos estos árboles empobinaos a la producción de castañes foron sometíos a inxertos y podes que dexaron la madera del interior albentestate, a espenses de la voracidá de los mofos, y pali pali estos tueros quedaríen güecos dafechu. Sedríen éstos los llamaos cabornos o caboxos, con unes formes imposibles qu’inspiraríen seres fantásticos, como trasgos y busgosos.
D’otra banda, per muchu tiempu existió la creyencia de que fora un árbol trayíu polos romanos, mas l’analís del pólen fósil alluga la so presencia nel Cantábricu dende hai, a lo menos, 21.000 años. ¡Asturianos de pura cepa!
Desgraciadamente, tres miles d’años el so reináu ta amenazáu pola viespa de la castañal, una plaga d’orixe chinu mui dañible que pica les yemes formando unos bogayos que dificulten el crecimientu del árbol y mengüen la producción de frutos hasta un 70%. Nun ye un problema pa tomar a la llixera, puesto que nun hai un solu castañéu n’Asturies que nun tea afectáu.
Nel camín de xubida hasta La Cullá l’Arcu alcontraremos dellos exemplares perguaos de carbayos albares (Quercus petraea), más arrechos que los carbayos comunes, chiscaos por claros estraos de gamones dende onde tendremos vistes de picos emblemáticos como’l Cuyargayos (1391 m) o del propiu valle del Nalón a l’altura de Comiyera. Dende equí podemos garrar l’esvíu hasta La Xamoca o continuar pel camín de baxada que mos llevará hasta’l puntu de partida en Campiellos. Esta ruta circular cenciella de malpenes 2,5 km completarémosla en 1,5 h, conque podemos dicir que ye bien afayadiza pa facela con nenos.
L’asturianu pierde los dientes por beber la sidra frío y les castañes calientes.
Agostu secu, castañes en cestu; agostu moyáu, el castañéu ya ta atropáu.
Castañes verdes per nadal saben bien y pártense mal.
En tiempu la castaña, el que la paña la paña.
Asturiano 
Español