Per más de doscientos años, la identidá del arquitectu encargáu de llevantar la conocida como Torre del Reló de Lluanco foi un misteriu pa los investigadores. Hasta agora.
Tolo que se conocía al rodiu l’orixe del edificiu yera anecdótico; malpenes que la so fecha de construcción s’allugaba en 1705 o que yá cuntaba daquella con un reló p’arguyu de los lluanquinos, dao lo raro y escaso d’estos apareyos na época. Una información que, con too, nun cuadraba cola campana fechada en 1752, cuasi mediu sieglu de diferencia.
D’esta miente, tres revisar concienzudamente la documentación del conceyu, l’historiador gozoniegu Ignacio Pando García-Pumarino vien d’asoleyar un acta de recepción por lliquidación fecháu en 1759, recoyéndose como autor l’arquitectu ilustráu candasín Manuel Reguera (1731-1798), siendo mayestru d’obres Manuel García Hevia.
Reguera foi el responsable de munches obres de gran sonadía mientres el periodu de la Ilustración n’Asturies, como’l pórticu de la ilesia de Santu Domingo d’Uviéu o la biblioteca de la Universidá, pero tamién participó nes del Balneariu de Les Caldes, l’Hospital o l’Hospiciu, toes elles al calor de la nueva política asistencialista del Conseyu de Castiella, presidíu por Pedro Rodríguez de Campomanes.
Como señalen dende l’Asociación Avante, entá queda por contrastar y ordenar muncha información, pero too parez apuntar a que na so construcción foi determinante l’entusiasmu del movimientu ilustráu asturianu.
Asturiano 
Español