Investiguen la cura del coronavirus nos oricios

Investiguen la cura del coronavirus nos oricios

Científicos de la Universidá de Patagonia (Arxentina) estudien una molécula presente nesta especie marina que puede ayudar a combatir el COVID-19.

La vacuna pudo tar delantre de los nuesos güeyos tou esti tiempu. Y ye que yá maxinábemos que nun había mal qu’una botellina de sidra con una docena d’oricios, el suañu llentu de cualesquier asturianu, nun pudiés remediar. Güei confírmase.

Según adelanta ADNSUR, un grupu de científicos arxentinos que lleva 15 años estudiando les propiedaes antivirales de los oricios, presentaron énte’l Ministeriu de Ciencia, Tecnoloxía y Innovación un proxectu pa desenvolver una terapia antiviral contra’l coronavirus. En pallabres del equipu, nun se trataría d’una vacuna, sinón d’una melecina d’ameyoramientu del sistema inmune pa prevenir l’afección de la enfermedá, pela que’l paciente va tar más fuerte y preparáu p’afronar el virus.

Los biólogos Tamara Rubilar y Dana Cardozo, responsables del equipu investigador, señalen que’l proxectu céntrase nel emplegu de metabolitos secundarios estrayíos de les güeves de la especie ‘Arbacia Dufresnii‘, un oriciu autóctonu de los golfos patagónicos, que podría tener capacidá de bloquiar la proteína fundamental del coronavirus. Sicasí, paez que munchos asturianos taríen yá planeando atropar dellos miles de kilos d’oriciu asturianu a mou preventivu, mientres que los organizadores del Festival del Oriciu de Bañugues (Gozón) y Güerres (Colunga) normalmente celebraos en marzu, frótense les manes pa les ediciones vinientes.

La televisión coreana descubre Casu y les madreñes

La televisión coreana descubre Casu y les madreñes

La canal coreana EBS amuesa Asturies y la so cultura nun documental

El reportaxe escomienza en Casu, nel Parque Natural de Redes, onde conocen al últimu madreñeru del pueblu de Bezanes. L’artesanu quixo enseñar el procesu de fabricación d’estes pieces de madera qu’entavía calcen munchos asturianos a diariu, especialmente en Casu, el que fore’l conceyu con mayor númberu de madreñeros de tou Asturies.

 

 

El presentador averóse tamién a los Picos d’Europa pa facer la Ruta del Cares y conocer la gastronomía asturiana; la fabada y el furmientu del quesu Cabrales nes cueves de Sotres.

 

4 visites n’asturianu pa esfrutar payares

4 visites n’asturianu pa esfrutar payares

“Ser Asturianu” afita’l so programa de visites guiaes n’asturllionés con una ruta cada sábadu del mes de payares.

L’éxitu de les rutes n’asturianu per Uviéu de los caberos dos meses garantiza la so incorporación definitiva a la ufierta d’ociu na capital asturiana. Tanto paisanos como visitantes amuesen cada vegada más interés por unes actividaes con un atractivu que reside en conocer la cara más auténtica d’Asturies, alloñada de tópicos y complexos. Amás, l’usu de la llingua asturiana, llonxe de ser una torga pa siguir la visita, tornóse nuna esperiencia d’inmersión na que poder averase a la cultura y la historia de los asturianos de forma fresca y prestosa.

Toles visites tán dirixíes por Denis Soria, guía oficial de turismu d’Asturies.

SÁBADU 9: RUTA DE LA REVOLUCIÓN D’OCHOBRE DE 1934

Feches y horarios

– Sábadu 9 de payares, 18h

Puntu d’alcuentru

Parque d’El Campillín (Uviéu).

Tarifes y reserves

– Adultos: 5€

– Menores de 12 años: De baldre

P’apuntare ye imprescindible acutar con antelación nel corréu lletrónicu infoserasturianu@gmail.com

SÁBADU 16: LA CATEDRAL NA LLITERATURA ASTURIANA

Feches y horarios

– Sábadu 16 de payares, 11:30h

Puntu d’alcuentru

Plaza d’Alfonso II (Uviéu).

Tarifes y reserves

– Adultos: 10€, inclúi preciu d’entrada a la catedral (7€)

– Menores de 12 años: De baldre

P’apuntase ye imprescindible acutar con antelación nel corréu lletrónicu infoserasturianu@gmail.com

SÁBADU 23: PRERROMÁNICU DEL NARANCO

Feches y horarios

– Sábadu 23 de payares, 11h

Puntu d’alcuentru

Centru d’Interpretación (Escueles vieyes de Naranco, Uviéu).

Tarifes y reserves

– Adultos: 8€

– Menores de 12 años: 3€

P’apuntase ye imprescindible acutar con antelación nel corréu lletrónicu infoserasturianu@gmail.com

SÁBADU 30: RUTA DE LA REVOLUCIÓN D’OCHOBRE DE 1934

Feches y horarios

– Sábadu 30 de payares, 18h

Puntu d’alcuentru

Parque d’El Campillín (Uviéu).

Tarifes y reserves

– Adultos: 5€

– Menores de 12 años: De baldre

P’apuntase ye imprescindible acutar con antelación nel corréu lletrónicu infoserasturianu@gmail.com

Ruta de la Revolución d’Ochobre de 1934

Ruta de la Revolución d’Ochobre de 1934

Un par de percorríos guiaos n’asturianu van visitar los escenarios de la revolución asturiana de 1934 n’Uviéu.

‘Ser Asturianu” torna a la capital pa somorguiase na Revolución d’Asturies de 1934, l’acontecimientu más importante que vivió Uviéu en tol sieglu XX. Una época marcada pol ascensu del socialismu y del facismu en mediu de la crisis de les democracies burgueses.

Los sábados 12 y 26 d’ochobre, a les 18h, ofrécese la oportunidá de conocer la última revolución obrera d’Europa occidental, onde la “Comuña Asturiana” llegaría a cariciar la idea d’una sociedá ensin clases, conquistando’l poder políticu, tomando y ocupando decenes de cuarteles y bancos, y suprimiendo -inclusive- la moneda. Dambes rutes, de 2h aproximaes de duración, escomenzarán nel parque d’El Campillín y tendrán un coste de 5€ (de baldre pa menores de 12 años).

Les visites tán dirixíes por Denis Soria, guía oficial d’Asturies, y cuenten col asesoramientu de la Fundación Juan Muñiz Zapico.

*Amás, los participantes podrán esfrutar de regalos y descuentos na campaña de micromecenalgu de “Depués d’Ochobre”, el primer xuegu de rol fechu n’asturianu.

Feches y horarios

– Sábadu 12 d’ochobre, 18h

– Sábadu 26 d’ochobre, 18h

Puntu d’alcuentru

Parque d’El Campillín (Uviéu).

Tarifes y reserves

– Adultos: 5€

– Menores de 12 años: De baldre.

P’apuntase ye imprescindible acutar con antelación nel corréu electrónicu infoserasturianu@gmail.com

Día d’Asturies nel Mercáu Artesanu de Xixón

Día d’Asturies nel Mercáu Artesanu de Xixón

Denis Soria, guía oficial de ‘Ser Asturianu’, tará a cargu del stand de Llaviana, promocionando’l potencial turísticu y el patrimoniu llingüísticu del conceyu.

Del 7 al 9 de setiembre tendrá llugar el Mercáu Artesanu y Ecolóxicu na Plaza Mayor de Xixón, una oportunidá bien afayadiza pa conocer l’artesanía y la cultura gastronómica asturiana, pero tamién la so llingua. El 9 de setiembre, Día d’Asturies, Llaviana tará presente con un stand perespecial, onde podremos informanos de mano al rodiu de les sos propuestes d’ociu y turismu al traviés de siete itinerarios culturales.

Mas el puestín d’información vien cargáu de sorpreses, ya que tarán a disposición dellos materiales del so Serviciu de Normalización Llingüística, pero tamién xuegos y talleres pa los más guahes. Cola actividá «Xugando coles pareyes» pasaremos un cachín bien prestosu buscando y empareyando diferentes dibuxos col so nome n’asturllionés.

Amás, a les 17h va haber un taller de tonada a cargu del gaiteru llavianetu Pablo Carrera, director del cuerpu de gaites de Llangréu, instrumentista acompañante de distintos cantautores y gaiteru oficial de varios concursos de tonada, como’l de Samartín del Rei Aurelio y el de Santa Marina (Mieres).

Tamién a les 18h los«Gaiteros del Carbón», integráu por alumnos mozos de gaita y de percusión de les escueles de música de «A Mansalva» y de «Reija», impulsada por Pablo Carrera y qu’actúa con indumentaria de mineru..

Horariu

De 11:00 a 15:00 h y de 17:00 a 21:00 h (llunes hasta les 20:00 h).

 

Fiesta de la Sidra de Xixón: Programa completu

Fiesta de la Sidra de Xixón: Programa completu

El llagaderu Miguel Ángel Vigón va ser distinguíu col ‘Tonel d’Oro 2019′.

A lo llargo de la Fiesta de la Sidra Natural celebraránse visites guiaes per Cimavilla con salida a les 11:30h en Les Lletrones (el preciu de 10€/pax inclúi preba de sidra final).

Info y reserves: xixonenruta@gmail.com | 626 221 712 / 684 605 548

Programa completu en PDF

Llunes 19

Mercadín de la Sidra y la Mazana / Xardinos de la Reina / 11.00 h. a 24.00 h.
“Arte na Cai” Música y Baille Tradicional Excelsior / Plaza Italia / 20.00 h.
Plantación del Pumar Tradicional n’homenaxe al Tonel d’Oru 2019 (Miguel Ángel Vigón Toyos)

Martes 20

Mercadín de la Sidra y la Mazana / Xardinos de la Reina / 11.00 h. a 24.00 h.

Ciclu de Conferencies “Conoz la Sidra”/ Plaza Mayor / 13.00 h.
Inaciu Hevia Llavona (Comunicador Social de la cultura y historia de la sidra) Historia de la botella de sidra asturiana.

Grupu de Salú ya Igualdá del Conseyu de la Mocedá de Xixón / Tarima de Begoña / 19.00 h. a 21.00 h.
• Taller de chapes
• La historia de la sidra por países
• Pasapallabra sobre la fiesta de sidra tradicional

La entidá xuvenil va facer tamién dos intervenciones al rodiu del consumu responsable de sidra’l día 23 nel Récor d’Escanciáu de Sidra, y el día 25 na Plaza Mayor.

Ciclu de Conferencies “Conoz la Sidra” / Plaza Mayor / 19.00 h.Eduardo Vázquez Coto (Xestor sidreru y espertu nel contestu internacional de la sidra) La sidra más salvaje del mundo en el contexto internacional.

Dúo Llocantaru / Plaza Mayor / 19.30 h.

Actuación musical curtia“Arte na Cai” Grupu Folclóricu “El Turruxón” / Plaza Italia / 20.00 h

Miércoles 21

Mercadín de la Sidra y la Mazana / Xardinos de la Reina / 11.00 h. a 24.00 h.

Ciclu de Conferencies “Conoz la Sidra” / Plaza Mayor / 13.00 h. Luis Benito García Álvarez (Profesor universitariu y especialista en cultura sidrera) Historia y cultura de la sidra n’Asturies.

Ciclu de Conferencies “Conoz la Sidra”/ Plaza Mayor / 19.00 h. Xuan de Con Redondo (Antropólogu especializáu en cultura sidrera) ¿Por qué falamos de la sidra como patrimoniu cultural?

Dúo Llocantaru / Plaza Mayor / 19.30 h. Actuación musical curtia.

“Arte na Cai” Agrupación Folclórica Asturiana Los Xustos / Plaza Italia / 20.00 h.

Xueves 22

Mercadín de la Sidra y la Mazana / Xardinos de la Reina / 11.00 h. a 24.00 h
Concursu Meyor Sidra Ellaborao n’Asturies
Premiu Eloxu d’Oro Fiesta de la Sidra de Xixón 2019 – Primer Corte (ensin públicu)

Ciclu de Conferencies “Conoz la Sidra” / Plaza Mayor / 13.00 h.
Yolanda Trabanco Olmo (Directora de Marketing y Comunicación y Área d’Eventos de Sidra Trabanco) La muyer nel mundu de la sidra

XXVI Concursu Oficial d’Echadores / Plaza Mayor / 17.30 h.
Puntuable pal Campeonatu d’Asturies 2019
Entrega del Premiu a la “Etiqueta Más Guapina”, X Edición Grupo Sidrastur

“Arte na Cai” Asociación de Coros y Dances Jovellanos / Plaza Italia / 20.00 h

Vienres 23

Mercadín de la Sidra y la Mazana / Xardinos de la Reina / 11.00 h. a 24.00 h

Récor Mundial d’Escanciáu Simultaneu / Playa de Poniente (a l’altura l’edificiu de salvamentu) / 18.00 h.
18.00 h.Vamos entamar a baxar pa la Playa. La Organización va ufiertar les primeres 9.581 botelles (9.580 + 1) pa superar el récor del añu pasáu. Y pa ello, necesitámoste; nun dexes de venir. Pa que nun nos vague la espera cuntamos cola Banda de Gaites Villa de Xixón

20.30 h. aprox. VAMOS BATIR EL RÉCOR MUNDIAL echando toos xuntos “EL CULÍN” Cola participación d’Alberto Rodríguez d’Escenapache.
Tola xente HA TRAYER EL SO VASU y va haber un accesu especial pa que los participantes que vengan cola so botella nun tengan de facer cola.
Por cada vasu de sidra de la fiesta que se vienda esti día, Laboral Kutxa va entregar 1€ a L’asociación Apaci Cardiopatías Congénitas.

Sofiten: Laboral Kutxa y la Denominación de Origen Protegida Sidra de Asturias.
Sidra del récor: Sidra Sopeña, Meyor Sidra Tradicional d’Asturies 2019 Ganadora del Concursu concedíu pol Conseyu Regulador de la DOP sidra d’Asturies.

Grupu de Salú ya Igualdá del Conseyu de la Mocedá de Xixón / Playa de Poniente / Dende les 18 00h.
Por una fiesta de la sidra responsable, onde lo importante ye pasalo bien cola xente.
Prueba d’alcoholemia / Información sobre l’alcohol / campaña #AlVolanteNiUnCulín / Gafes de simulación…

¡Vamos ensayar! Cancios de Chigre / Plaza Mayor / 22.00 h.
Cola actuación de la Sociedá Torner y del públicu asistente. Dirixe: Carlos José Martínez.

Sábadu 24

Mercadín de la Sidra y la Mazana / Xardinos de la Reina / 11.00 h. a 24.00 h.
Cancios de Chigre / Plaza Mayor / 21.00 h.
Cola actuación de la Sociedá Torner y del públicu asistente. Dirixe: Carlos José Martínez

Domingu 25

Mercadín de la Sidra y la Mazana / Xardinos de la Reina / 11.00 h. a 22.00 h.

Actu protocolariu “Obsequiu del Primer Culín” / Plaza Mayor y Plaza’l Marqués / 12.00 h.
Nel trescursu del actu Ana González, ’alcaldesa de Xixón o’l so representante va dar la bienllegada a les y los llagareros participantes y va conceder el “Tonel d’Oro” a Miguel A. Vigón Toyos.
Darréu Cristina Norniella Sánchez en representación de Sidra Huerces, ganadora del Premiu “Eloxu d’Oro 2018”, y Andrés Canal Palacio, en representación de Sidra Canal, ganadora del “Premiu del Públicu 2018”, van echar los primeros culinos de la Fiesta.
La música ponla la Banda de Gaites Villa de Xixón. Al rematar l’actu va entamar la preba de sidra nes casetes.

Grupu de Salú ya Igualdá del Conseyu de la Mocedá de Xixón / Playa de Poniente / Dende les 18.00 h
Por una fiesta de la sidra responsable, onde lo importante ye pasalo bien cola xente.
Prueba d’alcoholemia / Información sobre l’alcohol / campaña #AlVolanteNiUnCulín / Gafes de simulación…

Aconceya’l Xuráu del Premiu Meyor Sidra Natural Ellaborao n’Asturies
Premiu Eloxu d’Oro Fiesta de la Sidra de Xixón 2019 – Segundu corte (escenariu) / Plaza Mayor / 12.30 h.
El Xuráu va aconceyar pa facer la preba y decidir la sidra ganadora del cuncursu

Entrega del Premiu Meyor Sidra Natural Ellaborao n’Asturies
Premiu Eloxu d’Oro Fiesta de la Sidra de Xixón 2019 / Plaza Mayor / 14.00 h. (hora aproximada)

A les 15.00 h. la Banda de Gaites Villa de Xixón va interpretar l’Asturies, Patria Querida col que va ponese’l ramu a la preba de sidra.