6 visites guiaes pa descubir Asturies esti agostu

6 visites guiaes pa descubir Asturies esti agostu

Ser Asturianu ofrez un programa de visites guiaes diaries pa conocer Asturies per agostu.

Esti mes d’agostu ye posible conocer Asturies con un xeitu diferente. Ser Asturianu propón un calandariu de visites guiaes empobinaes tanto al visitante braniegu como al públicu asturianu. Dirixíes en tou momentu por Denis Soria, guía oficial acreditáu pol Gobiernu d’Asturies, delles van desenrollase en castellanu y en llingua asturiana, n’horarios distintos.

En castellanu, la visita guiada al cascu históricu a Uviéu tará disponible de miércoles a sábadu a les 11:00h, con posibilidá de visitar la catedral, mientres que’l tour pel barriu marineru de Cimavilla (Xixón) discurrirá de xueves a domingu a les 18:00h. D’igual mena, n’agostu retomaráse la yá consolidada Ruta de la Revolución d’Ochobre de 1934, un itinerariu pelos principales escenarios del conflictu na capital asturiana (15 y 29 d’agostu, 18:00h).

Les visites desendolcaes en llingua asturiana comprenderán la villa de Cuideiru (15 d’agostu, 11:30h), la Revolución d’Ochobre de 1934 (15 y 28 d’agostu, 18:00h), la Ruta Lliteraria pela Catedral (29 d’agostu, 11:30h) y Xixón (30 d’agostu, 11:30h).

Como nun podría ser d’otra manera, reforcemos les midíes de seguranza frente’l COVID-19 en tolos nuesos tours, implementando llimitación d’aforu pa cada actividá, nrs que sedrá obligatoriu l’usu de mázcara y onde existirá la opción de pagu lletrónicu. Sicasí, siempre va ser posible pagar la entrada en metálico 5 minutos primero de la visita.

Toles visites tienen un preciu de 10€ (5€, menores de 12 años).

Pa participar ye imprescindible la reserva previa, unviando un corréu a infoserasturianu@gmail.com o llamando al teléfonu 626 221 712.

Descubrir Asturies n’asturianu: 4 visites guiaes n’agostu

Descubrir Asturies n’asturianu: 4 visites guiaes n’agostu

Ser Asturianu ofrez un calandariu de visites guiaes en llingua asturiana a lo llargo del mes d’agostu

Esti mes d’agostu ye posible conocer Asturies al traviés de la so llingua. Ser Asturianu propón hasta cuatro visites guiaes desenrollaes dafechu n’asturllionés dirixíes pol guía oficial Denis Soria. Los tours inclúin la villa de Cuideiru (15 d’agostu, 11:30h), la Revolución d’Ochobre de 1934 (15 y 28 d’agostu, 18:00h), la Ruta Lliteraria pela Catedral (29 d’agostu, 11:30h) y Xixón (30 d’agostu, 11:30h).

Digual mena, reforcemos les midíes de seguranza frente’l COVID-19 en tolos nuesos tours, implementando una llimitación d’aforu pa cada actividá, nes que sedrá obligatoriu l’usu de mázcara y onde existirá la opción de pagu lletrónicu. Sicasí, siempre ye posible pagar la entrada en metálico 5 minutos primero de la visita.

Toles visites tienen un preciu de 10€ (5€, menores de 12 años).

¡Nun quedes ensin plaza! Acuta yá unviando un corréu a infoserasturianu@gmail.com o llamando al teléfonu 626 221 712.

CUIDEIRU: PIXUATOS & VIQUINGOS

Feches y horarios

– Sábadu 15 d’agostu, a les 11:30h.

Puntu d’alcuentru

Oficina de turismu.

Tarifes y reserves

– Adultos: 10€

– Menores de 12 años: 5€

P’apuntase ye imprescindible acutar primero nel corréu lletrónicu infoserasturianu@gmail.com

 

RUTA DE LA REVOLUCIÓN D’OCHOBRE DE 1934

Feches y horarios

– Vienres 14 y 28 d’agostu, a les 18:00h.

Punto d’alcuentru

El Fontán

Tarifes y reserves

– Adultos: 10€

– Menores de 12 años: 5€

P’apuntase ye imprescindible acutar primero nel corréu lletrónicu infoserasturianu@gmail.com

LA CATEDRAL NA LLITERATURA ASTURIANA

Feches y horarios

– Sábadu 29 d’agostu.

Puntu d’alcuentru

Plaza Alfonso II (Uviéu/Oviedo).

Tarifes y reserves

– Adultos: 15€

– Menores de 12 años: 5€

P’apuntase ye imprescindible acutar primero nel corréu lletrónicu infoserasturianu@gmail.com

XIXÓN: CIMAVILLA MARINERA

Feches y horarios

– Domingu 30 d’agostu.

Puntu d’alcuentru

Lletrones (puertu deportivu).

Tarifes y reserves

– Adultos: 10€

– Menores de 12 años: 5€

P’apuntase ye imprescindible acutar primero nel corréu lletrónicu infoserasturianu@gmail.com

Cuideiru, ¿un pueblu viquingu n’Asturies?

Cuideiru, ¿un pueblu viquingu n’Asturies?

Por Denis Soria

La imaxe d’esta villa ye icónica. Cuideiru ye una xuntanza de color y vida encaramada sobre un anfiteatru arramáu que tien al mar por escenariu. Por elli los sos vecinos reciben el nomatu de pixuatos, en referencia al pexe y polo tanto al oficiu de pescador, mayoritariu hasta hai unes décades. Nun ye raro, y ye que los vecinos d’As Figueiras (Castripol) son tamién conocíos como pixotos.

Cuidadín, non tolos que viven en Cuideiru ostenten esti xentiliciu. Los que se dedicaben a otros oficios (al comerciu o a la llabranza fundamentalmente) yeren conocíos como caízos, por ocupar el barriu de La Cai. De fechu, tradicionalmente estes dos comunidaes llevábense a matar, tando inclusive escluyíos estos últimos de participar en delles fiestes (y yá nun digamos los vaqueiros). Porque yá se sabe, qu’en pueblu pequeñu, infiernu grande

La villa de Cuideiru (Foto: Mampiris).

La Ribera (GETTY IMAGES)

Pero muncho se dixo y se diz sobre los sos vecinos, especialmente alredor del so orixe nos viquingos qu’afararon les costes europees hai un mileniu y -supuestamente- asentaos equí o acerca de la so fala, distinta al restu y estrada de pallabres de raigaños nórdicos. Una lienda que cobró fuercia nos caberos años seducida pola épica de les noveles y les series de televisión. Sicasí, ¿qué hai de verdá en too esto? ¿Existe un dialectu pixuatu? Y… ¿Son realmente los sos vecinos descendientes de los normandos?

vikings-season-3-spoilers

Reproducción de los drakkars o långskip lordomanos para la famosa serie Vikings.

Les cróniques medievales asturllioneses fálenmos ciertamente d’hasta cuatro foles d’estes incursiones de turistes escandinavos pel Reinu de los Astures ente los sieglos IX y XII. N’efectu, nel branu del añu 844 foi avistada una flota viquinga na costa de Xixón al aldu de Galicia, onde s’entregaron a la rapiña. El rei Ramiro I derrotólos a los pies de la Torre d’Hércules, quemándo-yos alredor de 70 naves, anque los supervivientes continuaríen les sos correríes pel Al-Ándalus saquiando Lisboa y Sevilla.1 Inclusive Uvieo foi asaltada en tiempos d’Alfonso III, motivando la construcción de La Torre Vieya de Samiguel, anexa a la Catedral. Magar que n’ocasiones los propios monarques recurrieron a los sos servicios, bien pa les sos lluches intestines o bien pa la guerra escontra los musulmanes, como nel casu d’Alfonso II escontra Hisham I nel 795.2

Por embargu, a pesar de cuntar con indicios d’asentamientos temporales en Galicia, el que fora ún de los territorios peninsulares más castigaos polos sos ataques, nun poseyemos prueba documental nin arqueolóxica nenguna qu’acredite l’establecimientu improbable de grupos de normandos na nuesa tierra.

Los pixuatos inda siguen fieles a l’actividá pesquera.

Sí acasu de celtes britones, refuxaos cristianos que fuxíen de la invasión anglosaxona de les Isles Britániques nel sieglu VI pa llugares como Armórica (la Bretaña francesa actual), Galicia y Asturies, onde fundaríen la Diócesis de Britonia. Inda güei conservamos topónimos qu’evidencien la so presencia, como El Bretón (La Madalena, Avilés), Bretones (Belonciu, Piloña) o La Playa los Bretones (Vidiago, Llanes).

 

Pa con too, resulta mui aventurao afirmar que foren estos britones o viquingos los fundadores de Cuideiru. ¿Y qué hai de la so herencia nel dialectu local? Quiciás podia desilusionar a más d’ún, y ye que la fala pixuata nun ye nenguna particularidá, sinón que resulta idéntica al asturianu faláu en Pravia o en Grau. Ello ye, que nun existe un dialectu pixuatu.

 

Más allá de la xíriga rellacionada cola mar y la pesca, la fala de los pixuatos y de los sos vecinos caracterízase pol fuerte zarramientu vocálicu (fonti/fontis, gatu/gatus), l’apertura de la tónica na diptongación de /ǒ/  y /ĕ/ llatinos (pueblu-puablu, bien-bian) o l’emplegu de los diptongos /éi, ou/ (veiga, mariñeiru, outru…). Na mesma web del Conceyu pueden consultase delles pallabres comunes, dalgunes realmente interesantes.

Asturllionés occ. Tipo A Asturllionés central Castellano std
Bulichi Boliche Boliche (red, aparejo)
Castiallu Castiellu Castillo
Chama Chama Palo que se coloca en el carel de una embarcación donde se pone el estrobo para fijar el remo].
Chicoti Chicote Chicote (extremo, remate o punta de cuerda, o pedazo pequeño separado de ella.)
Fuau Fueu Fuego
Gaxarti Gaxarte Gancho, garfio
Guai Güei Hoy
Guavada Güevada Hueva
Guayu Güeyu Ojo
Güichi Güinche Guinche (grúa o torno para subir cajas o material)
Llubricante Brugre, llocántanu Bogavante
Lleichi Lleche Leche
Quiquirimandi Cascoxu Caracol
Zurria Orbayu, orpín, muga, zurria Llovizna

L’Amuravela

Pero si realmente queréis oyer una bona muestra del asturllionés del baxu Nalón podéis averavos el día de San Pedru (29 de xunu) a la multitudinaria fiesta de L’Amuravela, declarada Bien d’Interés Turísticu Nacional en 1979, un sermón laicu cargáu de rima y soca que resume tolo asocedío nel añu.

Dende hai más de 30 años l’encargáu de recitalu ye l’escritor Cesáreo Marqués, anque foron célebres otros narradores como Xuacu Gaitanu o Xuan de la Cuca. Paez ser que por mor del escozor de les pallabres d’esti últimu’l párracu decidió prohibir la fiesta per 1900, recuperándose de nuevo en 1946.

Dichos versos escomiencen asina:

Nel nomi de Xuasús
ya la Virxi Soberana,
vou ichar l’Amuravela
comu San Pedru asperaba.

A lo que, tres recitar el sermón, conclúi con un saludu al santu nel códigu náuticu:

Mientras Cuideiru viva
ya duri la Fonti’l Cantu,
vei San Pedru a la Ribera
con toudus lus demás Santus.

¡Amura vela!
¡Isa vela!
¡Fuau a babor!
¡Fuau a estribor!

¡Viva Pedru!

 

¿Y d’ónde vien esta tradición? Nun se sabe con certeza, pero se diz que l’orixe ta venceyáu al regresu de los marineros que participaron na conquista de La Florida enrolaos na nave «El Espíritu Santo», hai más de 400 años.

Zumba la pelleya…

 

Referencies:

  1. Carlos Sánchez, J., 2012, “Los ataques vikingos y su influencia en la Galicia de los siglos IX-XI”. Anuario Brigantino: 5. URL: http://anuariobrigantino.betanzos.net/Ab2010PDF/2010%20057_086%20VIKINGOS%20EN%20GALICIA.pdf
  2. Chao, R., 2015, “Los ataques vikingos al reino asturleonés”. Corazón de León. URL: http://corazonleon.blogspot.com.es/2015/09/los-ataques-vikingos-al-reino.html
4 visites n’asturianu pa esfrutar payares

4 visites n’asturianu pa esfrutar payares

“Ser Asturianu” afita’l so programa de visites guiaes n’asturllionés con una ruta cada sábadu del mes de payares.

L’éxitu de les rutes n’asturianu per Uviéu de los caberos dos meses garantiza la so incorporación definitiva a la ufierta d’ociu na capital asturiana. Tanto paisanos como visitantes amuesen cada vegada más interés por unes actividaes con un atractivu que reside en conocer la cara más auténtica d’Asturies, alloñada de tópicos y complexos. Amás, l’usu de la llingua asturiana, llonxe de ser una torga pa siguir la visita, tornóse nuna esperiencia d’inmersión na que poder averase a la cultura y la historia de los asturianos de forma fresca y prestosa.

Toles visites tán dirixíes por Denis Soria, guía oficial de turismu d’Asturies.

SÁBADU 9: RUTA DE LA REVOLUCIÓN D’OCHOBRE DE 1934

Feches y horarios

– Sábadu 9 de payares, 18h

Puntu d’alcuentru

Parque d’El Campillín (Uviéu).

Tarifes y reserves

– Adultos: 5€

– Menores de 12 años: De baldre

P’apuntare ye imprescindible acutar con antelación nel corréu lletrónicu infoserasturianu@gmail.com

SÁBADU 16: LA CATEDRAL NA LLITERATURA ASTURIANA

Feches y horarios

– Sábadu 16 de payares, 11:30h

Puntu d’alcuentru

Plaza d’Alfonso II (Uviéu).

Tarifes y reserves

– Adultos: 10€, inclúi preciu d’entrada a la catedral (7€)

– Menores de 12 años: De baldre

P’apuntase ye imprescindible acutar con antelación nel corréu lletrónicu infoserasturianu@gmail.com

SÁBADU 23: PRERROMÁNICU DEL NARANCO

Feches y horarios

– Sábadu 23 de payares, 11h

Puntu d’alcuentru

Centru d’Interpretación (Escueles vieyes de Naranco, Uviéu).

Tarifes y reserves

– Adultos: 8€

– Menores de 12 años: 3€

P’apuntase ye imprescindible acutar con antelación nel corréu lletrónicu infoserasturianu@gmail.com

SÁBADU 30: RUTA DE LA REVOLUCIÓN D’OCHOBRE DE 1934

Feches y horarios

– Sábadu 30 de payares, 18h

Puntu d’alcuentru

Parque d’El Campillín (Uviéu).

Tarifes y reserves

– Adultos: 5€

– Menores de 12 años: De baldre

P’apuntase ye imprescindible acutar con antelación nel corréu lletrónicu infoserasturianu@gmail.com

5 tradiciones asturianes de la Nueche d’Ánimes

5 tradiciones asturianes de la Nueche d’Ánimes

Repasamos los mitos y tradiciones anteriores al Halloween más comunes n’Asturies

Va pocu tiempu, les tradiciones yeren un elementu d’identidá perimportante, de refuerzu d’una comunidá normalmente agrícola. Ye lóxico que col refalfiu del Halloween a munchos mos asalte una sensación de vacíu énte una celebración que tien al consumu y la ostentación como intención cimera. Y ye que la nuesa sociedá tovía nun tien los dos pies fuera d’esi mundu campesín, un mundu marcáu pol ritmu de les estaciones. Asina, sabemos que los gaélicos (irlandeses) conmemoraben, tres la collecha, el Samain (lliteralmente, el “final del branu”). Y anque presuponemos qu’otros pueblos célticos cuntaben con festividaes asemeyaes, nun hai abonda documentación al respective. Per otru llau, Manuel P. Villatoro señala que los romanos, tamién un pueblu indoeuropéu, honraben esi día a la diosa Pomona, la deidá de la seronda y de les mazanes. Col Papa Gregorio III vieno la cristianización, mudando la festividá de los «Mártires Cristianos» (Tolos Santos) al 1 de payares, pa facela coincidir cola fiesta pagana. Ello ye, «All Hallow’s Eve», acurtiada como Halloween, sedría la traducción al inglés de lo que nós llamamos “víespera de Tolos Santos”, una celebración cristiana chiscada de tradiciones d’orixe paganu más o menos similares en toa Europa.

La cosa nun quedaba nun simple anglicismu si nun fore porque la festividá que -lliteralmente- se mos viende nun ye namás qu’un remake comercial frutu del cine y el marketing, alloñáu de les tradiciones del Oíche Shamhna o Halloween llevaes a Norteamérica polos emigrantes irlandeses. Y yá nun digamos de les propies. Pa con too, la resistencia a esta cultura manufacturada non siempre ta llibre de contradicción. De fechu, nos caberos años esporpolló la moda d’enmazcaralo baxo’l nome de Samaín, como queriendo dotalo de mayor autenticidá, pero pasándose pel arcu del trunfu la tradición asturiana. ¿Acasu llamalo n’irlandés resulta menos ayeno que facelo n’inglés?

Ponese a la defensiva tampoco nun ye una opción. Si Halloween vieno pa quedar, aprovechar el so tirón podría ser una oportunidá pa reinterpretalo en clave asturiana, y recuperar asina una parte del nuesu patrimoniu güei cercanu a la desapaición. Lo contrario diba ser como enfotase en lluchar contra una pantasma.

Equí vos trayemos dellos mitos y tradiciones asturianes de la Nueche d’Ánimes o la viéspera de Tolos Santos recoyíes pol etnógrafu Alberto Álvarez Peña.

 

1. L’AMAGÜESTU DE DIFUNTOS

El cementeriu de Banduxu tovía sigue decorándose con dibuxos de flores el día de Tolos Santos (Fotografía: David Tuñón).

Una de les costumes más arraigonaes consistía en facer amagüestos, una reunión que, si bien se repetía lo llargo de la seronda y del iviernu, la solemnidá de la viéspera de Tolos Santos obligaba dexar un puñáu de castañes embaxo d’un tapín, pa saciar la fame de los difuntos. Nesti sen, si restallaba dalguna castaña, significaba qu’un ánima llograra salir del purgatoriu. La tradición de dexar comida o agua na puerte de les cases y los camposantos tevo continuación hasta la década de 1940, al igual que la celebración de banquetes sobre les tumbes de los antepasaos, tal y como sigue faciéndose anguaño en México nel Día de Muertos. Falamos de rituales, sicasí tan antiguos y xeneralizaos como persiguíos, yá dende tiempos d’Alfonso X “el sabiu”.

«Pero aún hasta hace poco, en la Montaña, que es lo mismo para el caso que en Asturias, a las diez de la mañana de ese día se ponían en las tumbas las ofrendas “consistentes en sebosos cuartos de carnero, rancio vino de Málaga y panes de dulce álaga”» (Domingo Cuevas, Antaño, 1904)

 

2. AFURACAR CALABACES

Expo “calabaces y calaberes”. Fotografía: Xardín Botánicu de Xixón

La costume de vaciar calabaces (nabos, muncho primero que la hortalexa americana) ta rexistrada enforma en tol norte d’España hasta la segunda metá del sieglu XX. La xera correspondía a los neños, que posaben esti calabazón allumáu con veles nes puertes y ventanes o nes encruceyaes de caminos, onde se supón que s’apaecen les ánimes.

 

3. LA GÜESTIA

Naquellos llugares podía ún alcontrase guapamente colos espíritus, pos na Nueche d’Ánimes la llende ente’l mundu de los vivos y de los muertos desdibuxaba per unes hores. El peor infortuniu pal caminante yera topase cola Güestia, una procesión d’almes en pena. Nada de lo que los muertos ofrecieren había que lo aceptar, en cuantes qu’ello conllevaba tornar tamién en difuntu y vagar pa con ellos pa tola eternidá. De la mesma manera, tampoco nun convenía contrarialos. Si convidaben a comida lo meyor yera simular que se mazcaba, de lo contrario nun hubiés sal de frutes capaz d’aparar tan fatal destín.

 

4. LA MAR QUE DEVUELVE LOS MUERTOS

En dellos pueblos pesqueros, como en Cuideiru, nun se podía salir a faenar. Los pixuetos preferíen arriar les veles y quedar en tierra esa nueche énte’l temor de que les redes recoyeren los güesos d’aquellos marineros afogaos na mar. Anque nun yera l’únicu peligru que podíen atopar:

«Antiguamente los pescadores de Cudillero no salían a la mar la noche de todos los Santos ni la del día de la Encarnación. Pero una vez, la noche de todos los Santos, salieron dos lanchas a la pesca y al pasar frente a la concha de Artedo, vieron que, sobre el agua, casi a orilla de tierra, ardían muchas luces. Los marineros enfilaron las proas de sus lanchas hacia aquellas luminarias y rema que rema, porque allí las olas rompían con mucha fuerza, llegaron allá y vieron llenos de miedo, que las luces eran producidas por huesos que había puesto allí la Güestia».

(Aurelio del Llano, Del folckore asturiano, 1977)

 

5. L’AGUINALDU

Nenos pidiendo l’aguinaldu en Robléu (Cerecea, Piloña). Añu 1930.

Nada d’esi fusilable “trucu o tratu”. Les llambionaes había que les ganar, como n’Antroxu, conque los rapazos salíen coles cares entafarraes de cernada -ensin mazcaritase- a pidir cantando peles cases, onde la recompensa solía consistir en chorizu, llinguaniza, castañes o ablanes. Y si había suerte, dalgún frixuelu (el terror de Pablo Casado).

“Queden con Dios señores
Nosotros con Dios nos vamos
Hasta l’añu venideru
Qu’en so casa mos veamos”

Pela cueta, si nun recibíen nada:

“Allá arriba n’aquel altu
Hai un perru cagando
Pa los amos d’esta casa
Que nun me dan aguinaldu.”

 

 

Ruta de la Revolución d’Ochobre de 1934

Ruta de la Revolución d’Ochobre de 1934

Un par de percorríos guiaos n’asturianu van visitar los escenarios de la revolución asturiana de 1934 n’Uviéu.

‘Ser Asturianu” torna a la capital pa somorguiase na Revolución d’Asturies de 1934, l’acontecimientu más importante que vivió Uviéu en tol sieglu XX. Una época marcada pol ascensu del socialismu y del facismu en mediu de la crisis de les democracies burgueses.

Los sábados 12 y 26 d’ochobre, a les 18h, ofrécese la oportunidá de conocer la última revolución obrera d’Europa occidental, onde la “Comuña Asturiana” llegaría a cariciar la idea d’una sociedá ensin clases, conquistando’l poder políticu, tomando y ocupando decenes de cuarteles y bancos, y suprimiendo -inclusive- la moneda. Dambes rutes, de 2h aproximaes de duración, escomenzarán nel parque d’El Campillín y tendrán un coste de 5€ (de baldre pa menores de 12 años).

Les visites tán dirixíes por Denis Soria, guía oficial d’Asturies, y cuenten col asesoramientu de la Fundación Juan Muñiz Zapico.

*Amás, los participantes podrán esfrutar de regalos y descuentos na campaña de micromecenalgu de “Depués d’Ochobre”, el primer xuegu de rol fechu n’asturianu.

Feches y horarios

– Sábadu 12 d’ochobre, 18h

– Sábadu 26 d’ochobre, 18h

Puntu d’alcuentru

Parque d’El Campillín (Uviéu).

Tarifes y reserves

– Adultos: 5€

– Menores de 12 años: De baldre.

P’apuntase ye imprescindible acutar con antelación nel corréu electrónicu infoserasturianu@gmail.com