Ser Asturianu ofrez un programa de tours en llingua asturiana en xunetu

Ser Asturianu propón tres visites guiaes n’asturllionés dirixíes pol guía oficial Denis Soria. Les visites previstes consistirán en Cuideiru, pixuatos & viquingoos (sábadu 10 y sábadu 24, 12:00h), la Ruta de la Memoria Histórica Xixón ¡en guerra! (vienres 9 y sábadu 17, 19:00h) y la Ruta de la Revolución d’Ochobre de 1934 (vienres 16 y sábadu 24, 19:00h).

Digual mena, reforcemos les midíes de seguranza frente’l COVID-19 en tolos nuesos tours, implementando una llimitación d’aforu d’alcuerdu Resolución del 5/5/2021, siendo obligatoriu l’usu de mázcara y una distancia de seguranza ente non convivientes de 1.5 m

 

TARIFES:

  • Adultos: 10 €
  • Menores de 18 años (acompañaos): 5€.

*El pagu faise 5 min primero de la visita.

 

FECHES Y HORARIOS:

XIXÓN ¡EN GUERRA! (1’5h)

Panorámica xeneral de la Guerra Civil na ciudá de Xixón, ente’l branu de 1936 hasta la cayida del Frente Norte n’ochobre de 1937. Adentrarémonos pelos escenarios clave a lo llargo de la contienda, l’aniciu de los primeros combates, la sede del Conseyu Soberanu d’Asturies y Llión, la prisión provisional o los principales refuxos antiaéreos, averándomos a les secueles del asediu dempués de 15 meses de bombardeos sobre población civil.

  • Vienres 9 de xunetu // 19 hores.
  • Sábadu 27 de xunetu // 19 hores.

Salida: Teatru Jovellanos (Xixón)

CUIDEIRU, PIXUATOS & VIQUINGOS ! (1’5h)

Ye’l pueblu marineru más retratáu d’Asturies, y ye que la maxa qu’inspira Cuideiru vien alimentando munches liendes alredor del so orixe viquingu o de les raíces escandinaves de la so fala. Pero, ¿qué hai de cierto nello? Acompáñanos pa descubrite les sos cais, la so historia, los sos miradorios y la so etnografía. ¡Aprenderémoste inclusive a falar en “pixuatu”!

  • Sábadu 10 de xunetu // 12 hores.
  • Sábadu 24 de xunetu // 12 hores.

Salida: Oficina de turismu de Cuideiru

RUTA DE LA REVOLUCIÓN D’OCHOBRE DE 1934 (2h)

Proponémoste un viaxe a la Revolución d’Asturies de 1934, l’acontecimientu más importante que vivió Uviéu en tol sieglu XX. Una época marcada pol ascensu del socialismu y del facismu en mediu de la crisis de les democracies burgueses. Acompáñanos peles cais de la capital nesti itinerariu históricu pa conocer la última revolución obrera d’Europa occidental, onde la “Comuña Asturiana” llegó a cariciar la idea d’una sociedá ensin clases, conquistando el poder políticu, tomando y ocupando decenes de cuarteles y bancos, y suprimiendo -inclusive- la moneda.

  • Vienres 16 de xunetu // 19 hores.
  • Sábadu 24 de xunetu // 19 hores.

Salida: Plaza d’El Fontán (Uviéu).

*Consultes: infoserasturianu@gmail.com // 626 221 712 // 639 41 42 16